މިދިޔަ ހުކުރު ދުވަހު ރިލީޒް ކުރި ފިލްމު " ރަންގޫން" އަށް ބޮކްސް އޮފީހުގައި މާބޮޑު ކާމިޔާބީއެއް ނުލިބޭ ކަމަށް މީޑިއާ ރިޕޯޓްތައް ބުނެފިއެވެ.
އެކަން ހާމަ ވެފައިވަނީ ފިލްމު އެޅުވިތާ ދެވަނައަށް ވީ ދުވަހު 6.07 ކްރޯޑް ރުޕީސް ލިބިފައި ވީއިރު ތިން ވަނަ ދުވަހު ވެސް ފައިސާ ލިބިފައިވަނީ އެ އަދަދާއި ގާތްކުރާ އަދަދަކަށް ވާތީއެވެ.
ވިޝާލް ބާރްދްވާޖް ޑައިރެކްޓްކޮށްފައިވާމި ފިލްމަކީ ދުނިޔޭގެ ދެވަނަ ބޮޑު ހަނގުރާމައިގެ ދުވަސްވަރު ހިނގާދިޔަ ކަންތައްތަކެއް ދައްކުވައިދޭ ފިލްމެކެވެ.
ސައިފް އަލީ ޚާން އާއި ޝާހިދް ކަޕޫރު އަދި ކަންގަނާ ރަނައުޓްގެ ތިނެސްކަން ލޯބީގެ މަންޒަރުތަކެއް ދައްކުވައިދިން ނަމަވެސް މި ފުލްމަށް ބެލުން ތެރިންގެ މާބޮޑު ޝައުގެވެރިކަމެއް ލިބިފައި ނުވާ ކަމަށް މީޑިއާ ރިޕޯޓްތައް ބުނެއެވެ.
"ރަންގޫން" ފާހަގަކުރެވިފައިވަނީ ވަރަށް ގިނަ ލަވަތަކެއް ހިމެނޭ ފިލްމެއްގެ ގޮތުގަ އެވެ. ޖުމުލަ 12 ލަވަ މިފިލްމުގައި ހިމަނާފައިވާއިރު އޭގެ ތެރެއިން 10 ލަވައަކީ އިންޑިއާގެ މަޝްހޫރު ޅެންވެރިޔާ ގުލްޒާރްގެ ޅެންތަކެވެ.
