ރާއްޖެއަށް ފޮނުވަން އުޅުނު 33 މިލިއަން ރުފިޔާގެ މަސްތުވާތަކެއްޗާއެކު އިންޑިއާއިން ބަޔަކު ހައްޔަރުކޮށްފި
30 ސެޕްޓެމްބަރު 2026 | ބުދަ 03:53އިންޑިއާގެ ޓުޓިކޮރިންއިން ކަނޑުމަގުން ރާއްޖެއަށް ފޮނުވަން އުޅުނު 17 ކްރޯޑް ރުޕީސްގެ ހަޝިޝް އޮއިލް އަތުލައިގަނެ، އެ މައްސަލައިގައި ހަތަރު މީހަކު ހައްޔަރުކޮށްފި. މީގެ އިތުރުން މެލޭޝިއާއިން ޗެންނާއީއަށް ދިޔަ ފަސިންޖަރެއްގެ އަތުން 1.2 ކްރޯޑް ރުޕީސްގެ ގަންޖާ އަތުލައިގަނެފައިވާއިރު، މި މައްސަލަތަކާ ގުޅިގެން ރާއްޖޭގައި ހަރަކާތްތެރިވާ ނެޓްވޯކްތައް ދެނެގަތުމުގެ ތަހުގީގު އިންޑިއާ ފުލުހުން ދަނީ ކުރަމުން
އިންޑިއާ އާއި ޕާކިސްތާން ގުޅޭ ބޯޑަރު ކައިރިން އަތުލައިގަތް 11 ކިލޯގެ ހެރޮއިންއާއެކު، އިންޑިއާގެ ބޯޑަރ ސެކިއުރިޓީ ފޯސް (ބީ.އެސް.އެފް) ގެ ޑެޕިއުޓީ އިންސްޕެކްޓަރ ޖެނެރަލް (ޑީ.އައި.ޖީ) އެމް.އެފް ފާރޫގީ އާއި އެ ފޯސްގެ އެހެން އޮފިސަރުން ފޮޓޯއަކަށް ހުއްޓިގެން. މި ފޮޓޯ ނަގާފައިވަނީ 2013 ސެޕްޓެމްބަރު 2 ގައި | ގެޓީ އިމޭޖަސް
އިންޑިއާގެ ޓެމިލް ނާޑޫގެ ދެ ސަރަހައްދެއްގައި ހިންގި ވަކިވަކި ދެ އޮޕަރޭޝަނެއްގައި، 18 ކްރޯޑް ރުޕީސް (ގާތްގަނޑަކަށް 33 މިލިއަން ދިވެހި ރުފިޔާ) އަށް ވުރެ ގިނަ ފައިސާގެ މަސްތުވާތަކެތި އެ ގައުމުގެ ކަމާބެހޭ އިދާރާތަކުން އަތުލައިގަނެފި އެވެ. މީގެ ތެރޭގައި ރާއްޖެއަށް ފޮނުވަން އުޅުނު ކަމަށް ތުހުމަތު ކުރެވޭ ހަޝިޝް އޮއިލްގެ އިތުރުން، ޗެންނާއީ އިންޓަނޭޝަނަލް އެއާޕޯޓުން ފަސިންޖަރެއްގެ އަތުން އަތުލައިގަތް ހައިޑްރޯފޮނިކް ގަންޖާ ހިމެނެ އެވެ. ޓުޓިކޮރިންގައި ހިންގި އޮޕަރޭޝަނުގައި ހަތަރު ފިރިހެނަކު ހައްޔަރުކޮށްފައިވާއިރު، ޗެންނާއީ އެއާޕޯޓުން މަސްތުވާތަކެތި އަތުލައިގަތް މައްސަލައިގައި އަންހެން ފަސިންޖަރަކު ވަނީ ހައްޔަރުކޮށްފަ އެވެ.
ފުލުހުން މައުލޫމާތު ދޭ ގޮތުގައި، ޓުޓިކޮރިންއިން އަތުލައިގަތް 17 ކްރޯޑް ރުޕީސްގެ އަގުހުރި 67 ކިލޯގެ ހަޝިޝް އޮއިލްއަކީ، ކަނޑުމަގުން ބޯޓެއްގައި ރާއްޖެއަށް ފޮނުވުމަށް ރާވާފައިވާ ތަކެއްޗެވެ. މީގެ އިތުރުން، ކުއާލަލަމްޕޫރުން ޗެންނާއީއަށް އައި ފަސިންޖަރެއްގެ ދަބަހުން، ގާތްގަނޑަކަށް 1.2 ކްރޯޑް ރުޕީސްގެ އަގުހުރި 3.4 ކިލޯގެ ހައިޑްރޯފޮނިކް ގަންޖާ އެއާޕޯޓުގެ ކަސްޓަމްސް އޮފިސަރުން ވަނީ އަތުލައިގަނެފަ އެވެ.
ޓުޓިކޮރިންގައި ހިންގި އޮޕަރޭޝަނަކީ މަސްތުވާތަކެތީގެ މުއާމަލާތެއް ހިނގަން އުޅޭކަމަށް ލިބުނު މުހިންމު މައުލޫމާތަކާ ގުޅިގެން ހިންގި އޮޕަރޭޝަނެއް ކަމަށް އިންޑިއާގެ ފުލުހުން ބުންޏެވެ. ފުލުހުންގެ ހާއްސަ ޓީމަކުން މި ތަކެތި އަތުލައިގަތީ ޕޫބަލަރަޔަރްޕޫރަމް ސަރަހައްދުންނެވެ. ތަހުގީގުން މިހާތަނަށް އެނގިފައިވާ ގޮތުގައި، މި ތަކެތި ކޮއިމްބަތޫރުން ޓުޓިކޮރިންއަށް ގެންގޮސްފައިވަނީ މިދިޔަ ހޯމަ ދުވަހު ކާރެއްގަ އެވެ.
ފުލުހުން ހާމަކުރި ގޮތުގައި، މި މައްސަލައިގައި ތުހުމަތު ކުރެވޭ މީހުން ރާވާފައި އޮތީ ބޯޓެއްގައި ކަނޑުމަގުން މި ތަކެތި ރާއްޖެއަށް ފޮނުވާލުމަށެވެ. ހައްޔަރުކުރި ހަތަރު މީހުންނަކީވެސް ޓުޓިކޮރިންއަށް ނިސްބަތްވާ މީހުންނެވެ. ހަޝިޝް އޮއިލް އުފުލުމަށް ބޭނުންކުރި އުޅަނދުވެސް ފުލުހުން މިހާރު ވަނީ ހިފަހައްޓާފަ އެވެ. މި މައްސަލަ މިހާރު ވަނީ މަސްތުވާތަކެއްޗާ ބެހޭ ގާނޫނުގެ (އެންޑީޕީއެސް އެކްޓް) ކަމާބެހޭ މާއްދާތަކުގެ ދަށުން ރަޖިސްޓްރީކޮށްފަ އެވެ.
ކޮއިމްބަތޫރުގައި މި ހަޝިޝް އޮއިލް އުފެއްދި މަސްދަރު ހޯދުމަށާއި، ރާއްޖޭގައި މި ތަކެއްޗާ ހަވާލުވުމަށް މަޑުކޮށްގެން ތިބި ބައިނަލްއަގުވާމީ ނެޓްވޯކްގެ މެންބަރުން ދެނެގަތުމަށް ފުލުހުން ދަނީ ހައްޔަރުކުރި މީހުންނާ ސުވާލުކުރަމުންނެވެ. މި މައްސަލައިގެ އިތުރު ތަހުގީގުތައް މިހާރު ދަނީ ކުރިއަށެވެ.
ޗެންނާއީގައި ހިނގި ހާދިސާއާ ގުޅޭގޮތުން ޖޮއިންޓް ކޮމިޝަނަރ އޮފް ކަސްޓަމްސް ކޭ.އެމް ގުރު ރާޖޭޝް ނެރުއްވި ބަޔާނެއްގައި ވިދާޅުވީ، އެއާ އިންޓެލިޖެންސް ޔުނިޓުގެ އޮފިސަރުން މެލޭޝިއާއިން އައި އިންޑިއާގެ އަންހެން ފަސިންޖަރަކު ހުއްޓުވައި ބަލައި ފާސްކޮށްފައިވާ ކަމަށެވެ. އޭނާގެ ޗެކް-އިން ބެގޭޖް ބަލައި ފާސްކުރުމުގެ ތެރޭގައި، ޕްލާސްޓިކް ކަވަރުތަކުގައި ވެކިއުމް ޕެކްކޮށްފައި ހުރި ހައިޑްރޯޕޮނިކް ގަންޖާ ފެނިފައިވާ ކަމަށް އޭނާ ވިދާޅުވި އެވެ.
