ރާއްޖޭގައި ބަންދުކޮށްފައި ހުރި މިޞްރުގެ ޑޮކްޓަރު މިނިވަންކޮށް ޤައުމަށް ފޮނުވާލައިފި
30 ސެޕްޓެމްބަރު 2026 | ބުދަ 03:43ރާއްޖޭގައި ބަންދުކޮށްފައި ހުރި މިޞްރުގެ ޑޮކްޓަރު ޕީޓާ ސަމާން މަރްޒޫކް މިނިވަންކުރުމަށް އެ ޤައުމުގެ ފޮރިން މިނިސްޓްރީން ދިވެހި ސަރުކާރާއެކު ކުރި މަޝްވަރާތަކުގެ ނަތީޖާއެއްގެ ގޮތުން އޭނާ މިނިވަންކޮށް މިހާރު ވަނީ އަނބުރާ ޤައުމަށް ފޮނުވާލާފައި
ދިވެހިރާއްޖޭގައި ބަންދުކޮށްފައި ހުރި މިޞްރުގެ ރައްޔިތަކު މިނިވަންކޮށް، އޭނާ އަނބުރާ ޤައުމަށް ފޮނުވާލުމުގެ އިންތިޒާމުތައް އެ ޤައުމުގެ ފޮރިން މިނިސްޓްރީން ހަމަޖައްސައިފި | އިޖިޕްޝަން ގެޒެޓް
ދިވެހިރާއްޖޭގައި ބަންދުކޮށްފައި ހުރި މިޞްރުގެ ޑޮކްޓަރެއް ކަމަށްވާ ޕީޓާ ސަމާން މަރްޒޫކް މިނިވަންކޮށް، އޭނާ އަނބުރާ ޤައުމަށް ފޮނުވާލުމުގެ ކަންކަން އެ ޤައުމުގެ ފޮރިން މިނިސްޓްރީން ހަމަޖައްސައިފި ކަމަށް އެ މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނެފި އެވެ.
މިޞްރުގެ މިނިސްޓަރ އޮފް ފޮރިން އެފެއާޒް، އިންޓަރނޭޝަނަލް ކޯޕަރޭޝަން އެންޑް އިޖިޕްޝަން އެކްސްޕެޓްރިއޭޓްސް، ބަދުރު އަބްދުލްއާތީ ވަނީ، ދިވެހިރާއްޖެއަށް ކަނޑައަޅާފައި ހުންނަ ސްްރީލަންކާގައި ހުންނަ މިޞްރުގެ އެމްބަސީއަށް، ދިވެހި ސަރުކާރުގެ ކަމާބެހޭ އިދާރާތަކާ އަވަސް ފުރުޞަތެއްގައި މުއާމަލާތް ކުރުމަށް އަންގަވާފަ އެވެ. އެއީ ޕީޓާ ސަމާން މަރްޒޫކް މިނިވަންކުރުމުގެ މަސައްކަތް އަވަސްކުރުމަށާއި، އޭނާއަށް ބޭނުންވާ ކޮންސިއުލަރ އެހީތެރިކަން ފޯރުކޮށްދިނުމަށެވެ.
މީގެ އިތުރުން، މި މައްސަލައިގައި ހިނގަމުންދާ ކަންކަމާއި، އޭނާ މިނިވަންކޮށް އަނބުރާ ޤައުމަށް ގެންދިއުމަށް ކުރެވެމުންދާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރުމަށް، އެ މިނިސްޓްރީގެ ކޮންސިއުލަރ ސެކްޓަރުން ދިޔައީ އޭނާގެ އާއިލާއާ ގަވާއިދުން ގުޅަމުންނެވެ.
މި މަސައްކަތްތަކުގެ ތެރެއިން، އެސިސްޓަންޓް ފޮރިން މިނިސްޓަރ ފޯ ކޮންސިއުލަރ އެފެއާޒް އެންޑް އިޖިޕްޝަންސް އެބްރޯޑް، އެމްބަސެޑަރު ހައްދާދު އަބްދުލް ތައްވާބު އަލް-ޖައުހަރީ ވަނީ، ރާއްޖޭގެ ފޮރިން މިނިސްޓްރީގެ ކޮންސިއުލަރ ޑިޕާޓްމަންޓުގެ އިސްވެރިޔާއާ ބައްދަލުކުރައްވައި ގިނަ މަޝްވަރާތަކެއް ބާއްވަވާފަ އެވެ.
އެ ބައްދަލުވުންތަކުގައި އަލް-ޖައުހަރީ ވަނީ، ބަންދުގައި ހުރި މިޞްރުގެ މީހާއަށް ރަނގަޅު ގޮތުގައި މުއާމަލާތްކުރުން ކަށަވަރުކުރުމަށާއި، އޭނާގެ މައްސަލަ ވީހާވެސް އަވަހަކަށް ހައްލުކޮށް މިނިވަންކުރުމުގެ މުހިންމުކަމުގެ މައްޗަށް ބާރުއަޅުއްވާފަ އެވެ.
މި މަސައްކަތްތަކުގެ ނަތީޖާއެއްގެ ގޮތުން، އޭނާ މިނިވަންކުރުމަށް ދިވެހި ސަރުކާރުން އެއްބަސްވި އެވެ.
ޕީޓާ ސަމާން މަރްޒޫކް އެނބުރި މިޞްރަށް ދިއުމުން، އަލް-ޖައުހަރީ ވަނީ ފޮރިން މިނިސްޓްރީގައި އޭނާއާއި އޭނާގެ އާއިލާއާ ބައްދަލުކުރައްވާފަ އެވެ.
މި މައްސަލަ ހައްލުކޮށް، އޭނާ ރައްކާތެރިކަމާއެކު އަނބުރާ ޤައުމަށް ގެނައުމަށް ފޮރިން މިނިސްޓްރީއާއި ކަމާބެހޭ އިދާރާތަކުން ކުރި މަސައްކަތްތަކަށްޓަކައި، އޭނާގެ އާއިލާއިން ވަނީ ޝުކުރު އަދާކޮށްފަ އެވެ.
