އަންނަ މާޗް މަހުގެ ދެވަނަ ދުވަހު އޮލިމްޕަހުގައި އެޅުވުމަށް ހަމަޖެހިފައިވާ "މަލިކާ" އަށް ބޮޑު ތަރުހީބެއް ލިބެމުންދާ ކަމަށް ފިލްމްގެ މާކެޓިން ހެޑް ހުސައިން ނޫރައްދީން ބުނެފިއެވެ.
މައުލޫމާތު ދެމުން ނޫރު ބުނީ މި ފިލްމުގެ ޓިކެޓް އާދިއތް ދުވަހު ވިއްކަން ފަށާފައިވާއިރު މި ފިލްމަށް ހީކުރި ވަރަށްވުރެ ވެސް ބޮޑު ތަރުހީބެއް ލިބެމުންދާ ކަމަށެވެ.
މި ފިލްމުގެ ޖުމްލަ 20 ޝޯ ދެއްކުމަށް ނިންމާފައިވާ ކަމަށާއި ނަމަވެސް މިހާރު ވިއްކަމުންދަނީ ފުރަތަމަ ފަސް ޝޯގެ ޓިކެޓު ކަމަށްވެސް އޭނާ ބުންޏެވެ.
އަންނަ މާޗް މަހުގެ 2 ގައި ފިލްމް ޕްރިމިއާކުރުމުގެ ކުރިން މާޗް 1 ގައި މީޑިއާ ތަކާއި ދައުވަތު ދެވޭ ފަރާތަކަށް ފިލްމްގެ ޚާއްސަ ސްކްރީނިންއެއް ބާއްވަން ނިންމާފައިވާ ކަމަށެވެ.
މާރޗް 2 އިން 20 އަށް އޮލިމްޕަހުގައި އެޅުވުމަށް ހަމަޖެހިފައިވާ މި ފިލްމްގެ ޕްރިމިއާ ޝޯގެ ޓިކެޓްގެ އަގަކީ 200 ރުފިޔާ އެވެ. އަދި އިތުރު ޝޯތަކުގެ ޓިކެޓް ވިއްކުމަށް ހަމަޖެހިފައިވަނީ 100 ރުފިޔާ އަށެވެ.
އަހުމަދު ނާސިރު ( މައްލާ) އާއި އިބްރާހިމް ރަޝީދު (އިއްބެ) ޕްރޮޑިއުސް ކޮށްފައިވާ މި ފިލްމަކީ ބިންމާ އިބްރާހިމް ވަހީދު ލިޔެފައިވާ އާއިލީ ލޯބީގެ ހަދިސާއެއްގެ މައްޗަށް ބިނާކޮށް ތައްޔާރު ކޮށްފައިވާ ފިލްމެކެވެ.
މި ފިލުމްގައި ހިމެނޭ ތަރިންގެ ތެރޭގައި ފިލްމީ ދާއިރާއަށް އަލަށް ތައާރފްވާ ނުޒުހަތު ޝުއައިބް (ނުޒޫ) އާއި މަރިޔަމް ޝަކީލާ، އިސްމާއިލް ޒާހިރު، އަލީ ފާރޫގް، އަހުމަދު އަސިމް، ފާތިމަތު އާޒިފާ، ޖުމައްޔިލް ނިމާލް، އަލީ އާޒމް، ސުޖީތާ އަބްދުﷲ އަދި އަހުމަދު ޝާކިރު ހިމެނެއެވެ.
