ޕީއާރު ޓީމަކީ ކުރިއަށް ދިއުމަށް ލިބޭ އެންމެ ބޮޑު ހިތްވަރު : ޝްރައްދާ

"އާޝިގީ 2" އިން ބެލުންތެރިންގެ މަގްބޫލުކަން ހޯދި ޝްރައްދާ ކަޕޫރޫ ފަހަކަށް އައިސް އޭނާ ކުޅޭ ފިލްމްތައް ފްލޮޕަކަށް ވުމުން އޭނާގެ ޕީއާރު ޓީމް ބަދަލުކުރަން އުޅޭ ކަމުގެ އަޑުތައް މީޑިއާގައި ދަނީ ފެތުރެމުންނެވެ.

ޝްރައްދާ އެންމެ ފަހުން ކުޅެފައިވާ ދެ ފިލްމް ކަމަށްވާ "ރޮކްއޮން 2" އަދި "އޯކޭ ޖާނޫ" ވެފައިވަނީ ފްލޮޕަކަށެވެ.

ޝްރައްދާގެ މި ނާކާމިޔާބީއަށް ފަހު އޭނާގެ މެނޭޖަރުންގެ ޓީމު ބަދަލުކޮށް އާ ޕީއާރު އެޖެންސީއެއް ހޯދަމުން ދާކަމަށް ވަނީ މީޑިއާ ރިޕޯޓްތައް ބުނެފައެވެ. އަދި ޝްރައްދާއަށް ފިލްމްތަކުން ލިބޭ ފުރުސަތުތައް ނިންމުގައި އެންމެ އިސް ރޯލެއް ކުޅޭނީ އޭނާގެ ބައްޕަ ޝަކްތީ ކަޕޫރު ކަމަށް ވެސް މީޑިއާ ރިޕޯޓްތައް ވަނީ ބުނެފައެވެ.

އެވާހަކަތަކަށް ރައްދުދީ އޭނާގެ ޕީއާރު ޓީމާ ގުޅޭ ގޮތުން ޝްރައްދާ ކޮށްފައިވާ ޓްވީޓެއްގައި ވަނީ ދުނިޔޭގައި އުޅޭއިރު އަޑިގަނޑަކަށް ފަހު އުސްގަނޑެއް އަންނަ ގޮތަށް ފިލްމްތައް ކާމިޔާބުވާ ފަހަރާއި ނާކާމިޔާބުވާ ފަހަރު އަންނާނެ ކަމަށެވެ. އަދި އެފަދަ ކޮންމެ ވަގުތެއްގައި އޭނާގެ ޓީމު އޭނާއާ އެކު ވުން އެއީ އޭނާއަށް ލިބުން އެންމެ ބޮޑު ނަސީބު ކަމަށާއި ޓީމްގެ މެންބަރުން ދެކެ، ލަފްޒުތަކަކުން ބަޔާން ކޮށްދެވޭ ވަރަށް ވުރެ ވެސް ބޮޑަށް ލޯބިވާ ކަމަށް ޝްރައްދާގެ ޓްވީޓްގައި ވެއެވެ.

ޝްރައްދާގެ ދެން ރިލީޒް ކުރުމަށް ހަމަޖެހިފައިވާ ދެ ފިލްމަކީ "ހާފް ގާލް ފްރެންޑް" އާއި "ހަސީނާ: ދި ކްއީން އޮފް މުމްބާއި" އެވެ.