އަށާރަ އަހަރު ފަހުން ޔާޔާ ޓުރޭ ފުޓްބޯޅަ ކުޅުން ހުއްޓާލައިފި

ކުރީގެ މެންޗެސްޓަރ ސީޓީ އަދި ބާސެލޯނާގެ ލެޖެންޑް ޔާޔާ ޓޫރޭ އަށާރަ އަހަރު ފުޓްބޯޅަ ކުޅުން ހުއްޓާލައިފިއެވެ.

އުމުރުން 35 އަހަރުގެ އައިވަރީ ކޯސްޓުގެ ތަރި ޔާޔާ ޓުރޭ ފުޓްބޯޅައިން ރިޓަޔާ ކުރިކަން އިއުލާން ކޮށްފައިވަނީ އޭނާގެ އެޖެންޓް ޑިމިތްރީ ސެލުކް ކުރި ޓްވީޓެއްގައެވެ.

ޑިމިތްރީ ބުނީ ކުޅުމާ ދުރަށް ޖެހުމަށް ފަހު ދެން ޓޫރޭ ފެންނާނީ ކޯޗެއްގެ ގޮތުގައި ނޫނީ ސްޕޯޓިން ޑައިރެކްޓަރެއްގެ ގޮތުގައި ކަަމަށެވެ. އެހެން ނަމަވެސް އޭނާ ކޯޗުކަން ކޮށްދޭނީ ކޮން ކުލަބަކަށް ކަމެއް ޑިމިތްރީ ނުބެނެއެވެ.

އުމުރުން 18 އަހަރުގައި ޕްރެފެޝަނަލް ފުޓްބޯޅަ ބެލްޖިއަމްގެ ބެވްރެން އިން ފެށި ޓޫރޭ ވަނީ ކެރިއަރު ނިންމާލުމުގެ ކުރިން ހަތް ކްލަބަކަށް ކުޅެފައެވެ. ދެހާސް ހަތަރު ވަނަ އަހަރު އައިވަރި ކޯސްޓުގެ ގައުމީ ސްކޮޑްގައި ހިމެނި ޓޫރޭ ވަނީ އެ ޓީމަށް ތިން ވޯލްޑް ކަޕްގައި ކުޅެފައެވެ. އެއީ އެ ޓީމު ފުރަތަމަ ފަހަރަށް ވޯލްޑް ކަޕަށް ކޮލިފައިވި 2006 ވަނަ އަހަރާއި 2010 ވަނަ އަހަރުގެ އިތުރުން 2014 ވަނަ އަހަރުއެވެ.

ޑިޑިއޭ ޑޮރްގްބާގެ އަށް ފަހު އައިވަރީ ކޯސްޓުގެ ކެޕްޓަން ކަން ޓޫރޭ ހަވާލުވެފައި ވަނީ 2014 ވަނަ އަހަރުއެވެ. ގައުމީ ޓީމަށް ކުޅުން އޭނާ ހުއްޓަލާފައި ވަނީ 2016 ވަނަ އަހަރުގެ ސެޕްޓަމްބަރު މަހުގެ 20 ވަނަ ދުވަހުއެވެ. އައިވަރީ ކޯސްޓުގެ ގައުމީ ޓީމަށް އޭނާ ވަނީ 20 ގޯލް ކާމިޔާބު ކޮށްދީފައެވެ.

ޓޫރޭގެ ފުޓްބޯޅަ ކެރިއަރުގައި އެންމެ ގިނަ ދުވަސް ހޭދަކޮށްފައި ވަނީ މެންޗެސްޓާ ސިޓީގައެވެ. އެ ކްލަބުގައި ހޭދަކުރި ނުވަ އަހަރުގެ ތެރޭގައި ޓޫރޭ ވަނީ އެ ކްލަބަށް ތިން ޕްރިމިއާ ލީގާއި އެފްއޭ ކަޕާއި ދެ ލީގުގެ އިތުރުން އެއް ކޮމިއުނިޓީ ޝީލްޑް ހޯދައިދީފައެވެ.

އިނގިރޭސިވިލާތުގައި ހޭދަކުރި ދުވަސްވަރު ޓޫރޭއަށް ވަނީ ނަސްލީ ތަފާތު ކުރުންތަކާއި ކުރިމަތިލާން ޖެހިފައެވެ. ރިޓަޔާ ކުރުމުގެ ކުރިން ޓޫރޭ ކުޅެފައި ވަނީ ގްރީސްގެ ސުޕަލީގުގެ އޮލިމްޕިއާކޯސް އަށެވެ.