ދެ އަހަރުގެ އެއްބަސްވުމަކާއެކު ސާންތި އެނބުރި އީގަލްސް އަށް
ސާންތި އެ ކްލަބާއެކު ވެފައި ވަނީ ދެ އަހަރުގެ އެއްބަސްވުމެއް
ކްލަބު އީގަލްސްގެ ކޯޗު އިހުސާން އަބްެދުލް ޣަނީ (ސާންތި)
މިދިޔަ ސީޒަންގައި ކްލަބު އީގަލްސް އަށް ޕްރެޒިޑެންޓް ކަޕް ފުޓުބޯޅަ މުބާރާތް ކާމިޔާބުކޮށްދިން ތަޖުރިބާކާރު ކޯޗު އިހުސާން އަބްދުލް ޣަނީ (ސާންތި) އެ ކްލަބުގެ ކޮންޓްރެކްޓް އާކޮށްފި އެވެ.
ސާންތި އެ ކްލަބާއެކު އެއްބަސްވެފައި ވަނީ ދެ އަހަރު ދުވަހު މަޑުކުރުމަށެވެ. މިކަން ސާންތި ވަނީ ރާއްޖެއެމްވީ އަށް ވެސް ކަށަވަރުކޮށްދީފަ އެވެ.
ސާންތި ބުނީ އޭނާ އީގަލްސްގެ ކޮންޓްރެކްޓް އާކުރީ އެޓީމުގެ ކުޅުންތެރިންގެ މުސްތަގުބަލާ ދޭތެރޭ ވިސްނައި އެ ކުޅުންތެރިންނާއެކު އަނެއްކާވެސް ކާމިޔާބީއެއް ހޯދުމަށް ބޭނުންވާތީ ކަމަށެވެ.
ސާންތި ފާހަގަކޮށްލެވެނީ ޒުވާން ކުޅުންތެރިންތަކެއް ދިވެހި ފުޓުބޯޅައަށް ނެރެދިން ކޯޗެއްގެ ގޮތުގައެވެ. އަދި އަބަދުވެސް ތިރިން ޕާސް ޖަހައިގެން ރީތި ފުޓުބޯޅައެއް ކުޅުވުމަށް ސާންތި މަސައްކަތް ކުރެއެވެ.
މިދިޔަ އަހަރުގެ ސީޒަން ނިންމާލުމަށްފަހު ސާންތި ބުނެފައި ވަނީ އޭނާއަކީ މީގެ ހަތަރު އަހަރު ކުރިން ރަނގަޅު ޓީމެއް އުފެއްދުމަށް ބުރަކޮށް މަސައްކަތް ކުރި މީހެއް ކަމަށާއި އަދި ދުވަސް ތަކަކަށްފަހު އެ އުންމީދު ފުރިހަމަ ވުމުން އުފާވާ ކަމަށެވެ. މީގެ އިތުރުން ސާންތި ބުނެފައި ވަނީ އޭނާ އަބަދުވެސް ބޭނުންވަނީ ރާއްޖޭގެ ދަނޑުތަކަށް ޒުވާން ކުޅުންތެރިން ނުކުމެ ގައުމީ ޓީމުގައާއި އޭނާގެ ކްލަބުގައި މޮޅު ކުޅުމެއް ދައްކާ ކާމިޔާބީތައް ހާސިލްކުރާތަން ދެކުމަށް ކަމަށެވެ.
ވޭތުވެދިޔަ ސީޒަންގައި ޕްރެސިޑެންޓްސް ކަޕް އީގަލްސްއަށް އުފުލާލަދީ ސާންތި ވެފައިވަނީ 27 އަހަރުގެ ކްލަބްގެ ތާރީޚްގައި އެންމެ ކާމިޔާބު ކޯޗަށެވެ.
އީގަލްސްއިން އަންނަ ސީޒަނަށް ތައްޔާރު ވުމުގެ ގޮތުން މިހާރުވަނީ ގައުމީ ޓީމުގެ އަހުމަދު ނާޝިދު (ނާއްޓޭ)ވެސް ޓީމަށް ގެނެސްފައެވެ.
