ކިހާދުއްފަރު ރިސޯޓް މުވައްޒިފުންގެ ހައްގުގައި ބ. އަތޮޅު ރައްޔިތުން ކުރާ މަސައްކަތުގައި ބައިވެރިވާނަން: ޝިހާމް
ކިހާދުއްފަރު ރިސޯޓްއިން ހުއްދަ ނުހޯދާ ރާ ވިއްކާ މައްސަލައެއްވެސް ލޭބާރ ޕާޓީއަށް ލިބިފައިވޭ
ލޭބަރ ޕާޓީގެ ޗެއަރޕާސަން އަހްމަދު ޝިހާމް
ކިހާދުއްފަރު ރިސޯޓް މުވައްޒިފުންގެ ހައްގުގައި ބ. އަތޮޅު ރައްޔިތުން ކުރާ މަސައްކަތުގައި ބައިވެރިވާނެ ކަމަށް ލޭބަރ ޕާޓީގެ ޗެއަރޕާސަން އަހްމަދު ޝިހާމް ވިދާޅުވެއްޖެއެވެ.
ކިހާދުއްފަރު ރިސޯޓްގެ 250 މުވައްޒިފުންނަށް މުސާރަ ނުދީ، އަދި ސާރވިސް އެލަވަންސް ނުދޭތާ އެތައް މަހެއްވެގެން އެ ކަމުގެ ކަންބޮޑުވުން ފާޅުކޮށް ލޭބާރ ޕާޓީން ވަނީ ބުރާސްފަތި ދުވަހު ނޫސްވެރިންގެ ބައްދަލުވުމެއް ބާއްވާފައެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝިހާމް ވިދާޅުވީ ކިހާދުއްފަރު ރިސޯޓް މުވައްޒިފުންގެ ހައްގުގައި ތެދުވާނެ ކަމަށް، ބ.އަތޮޅުގެ ރައްޔިތުން ބުނެފައިވާ ކަމަށެވެ. ބ. އަތޮޅުގެ ރައްޔިތުން ކުރާ މަސައްކަތަށް ލޭބާރ ޕާޓީން އެއްބާރުލުންދޭނެ ކަމަށާއި އެކަމުގައި ބައިވެރިވާނެ ކަމަށް ޝިހާމް ވިދާޅުވިއެވެ.
"ބ.އަތޮޅުގެ ގިނަ ރައްޔިތުން އެކަމާއި ކޮންސާރންވާ ކަމަށް ބުނެފައިވޭ. މަޑުން ނުތިބޭނެ ކަމަށާއި، އެކްޝަން ނަގާނެ ކަމަށް. އެކަމުގައި ލޭބާރ ޕާޓީން ބައިވެރިވާނަން" ޝިހާމް ވިދާޅުވިއެވެ.
ކިހާދުއްފަރު ރިސޯޓްގެ މުވައްޒިފުންގެ މުސާރަ އާއި ސާރވިސް ޗާޖް ނުދީގެން އެކަމުގެ ކަންބޮޑުވުން ހިއްސާކުރި ތިން މުވައްޒިފަކު ވަޒީފާއިން ވަކިކޮށްފައިވާ ކަމަށް ލޭބާރ ޕާޓީން ވަނީ ބުނެފައެވެ. އެ ތިން މުވައްޒިފުންގެ މައްސަލަ ޓްރައިބިއުނަލްއަށް ހުށަހަޅާފައިވާ ކަމަށް ވެސް އެ ޕާޓީން ވަނީ ބުނެފައެވެ.
ކިހާދުއްފަރު ރިސޯޓްއިން ހުއްދަ ނުހޯދާ ރާ ވިއްކާ މައްސަލައެއް ވެސް ލޭބާރ ޕާޓީއަށް ލިބިފައިވާ ކަމަށް ޝިހާމްވަނީ ވިދާޅުވެފައެވެ.
ކިހާދުއްފަރު ރިސޯޓަކީ ދިވެހި މެނޭޖްމަންޓަކުން ހިންގާ ރިސޯޓެކެވެ.
