ސަފީރުކަމުގެ ފަތްކޮޅު އެމެރިކާގެ ސްޓޭޓް ޑިޕާޓްމަންޓާއި ތިލްމީޒާ ހަވާލު ކޮށްފި
8 މެއި 2019 | ބުދަ 08:53އޭނާގެ ސަފީރުކަމުގައި ދިވެހިރާއްޖެ އާއި އެމެރިކާ އާއި އޮތް ގުޅުން ބަދަހިކުރުމަށް މަސައްކަތް ކުރައްވާނެ ކަމަށް ވިދާޅުވި
މަގާމުގެ ފަތްކޮޅު ޝޯ ޕީ ލާލްއަށް އެރުވުމަށް ފަހު ސަލާމްކުރައްވަނީ
ދިވެހިރާއްޖެއިން އެމެރިކާއަށް ކަނޑައެޅުއްވި ސަފީރު ތިލްމީޒާ ހުސެއިން ސަފީރު ކަމުގެ ފަތްކޮޅުގެ ކޮޕީއެއް، އެމެރިކާގެ ސްޓޭޓް ޑިޕާޓްމަންޓުގެ ޗީފް އޮފް ޕްރޮޓޮކޯލް، ޝޯ ޕީ ލޯލާ އަށް އަރުވައިފި އެވެ. ސަފީރުކަމުގެ ފަތްކޮޅު ޝޯ ޕީ ލޯލަށް ތިލްމީޒާ އަރުވާފައިވަނީ ބުދަ ދުވަހުއެވެ. މަގާމުގެ ފަތްކޮޅު ޝޯ ޕީ ލާލްއަށް އެރުވުމަށް ފަހު، ތިލްމީޒާ ވަނީ މަގާމުގެ މަސްއޫލިއްޔަތުތަކާއި ހަވާލުވެވަޑައިގެންފައެވެ.
މަގާމުގެ ފަތްކޮޅު ޝޯ ޕީ ލާލްއަށް އަރުވަނީ
ރާއްޖެއިން އެމެރިކާއަށް ކަނޑައަޅުއްވާފައިވާ ސަފީރުގެ އިތުރުން، ތިލްމީޒާ އަކީ ރާއްޖެއިން ޔޫއެން އަށް ކަނޑައަޅުއްވާފައިވާ ދާއިމީ މަންދޫބުވެ.
ތިލްމީޒާއަކީ މިންތީގެ ހަމަހަމަކަން ހޯދައިދިނުމަށް މަސައްކަތް ކުރައްވާ ފަރާތެއްގެ އިތުރުން، ތިމާވެށި ހިމާޔަތް ކުރެއްވުމުގައި މަސައްކަތް ކުރައްވަމުން އަންނަ ފަރާތެކެވެ. ތިލްމީޒާ އަކީ ވުމަންސް އާރތް ކްލައިމެޓް އެކްޝަން ނެޓްވޯކްގެ ބޯޑް މެމްބަރެކެވެ. މީގެ އިތުރުން ކްލައިމެޓް ޖަސްޓިސް ވޯކިން ގްރޫޕްގެ ޗެއަރކަމުގެ މަގާމުވެސް ތިލްމީޒާ އަދާކުރައްވައެވެ. 2013 ވަނަ އަހަރު ހޮވި ސަތޭކަ ވުމަންސް ކްލައިމެޓް ލީޑަރުންގެ ތެރޭގައި ތިލްމީޒާ ވަނީ ނޮމިނޭޓް ވެފައިވެއެވެ. ތިލްމީޒާ މަތީ ތައުލީމް ހާސިލްކުރެއްވީ ބިޒްނަސް މެނޭޖްމަންޓްގެ ދާއިރާ އިން އެމެރިކާގެ ޔުނިވާސިޓީއަކުންނެވެ.
ރާއްޖެޓީވީގެ "ހަފްތާ ބަންދު" ޕްރޮގްރާމްގައި ވާހަކަ ދައްކަވަމުން ތިލްމީޒާ ވިދާޅުވީ އޭނާގެ ސަފީރުކަމުގައި ދިވެހިރާއްޖެ އާއި އެމެރިކާ އާއި އޮތް ގުޅުން ބަދަހިކުރުމަށް މަސައްކަތް ކުރައްވާނެ ކަމަށެވެ. އަދި ރާއްޖެއިން އެމެރިކާއަށް އެހީވެދޭނެ ދާއިރާތައް ހޯދައި ބަލައި އެ ކަމަށް މަސައްކަތް ކުރައްވާނެ ކަމަށެވެ.
ކުރީގެ ރައީސް ޔާމީންގެ ވެރިކަމުގެ ދުވަސްވަރު ރާއްޖެ އާއި އެމެރިކާ އާއި ދެމެދު އޮތް ގުޅުން ހީނަރުވެފައިވީ ކަމުގައިވީ ނަމަވެސް، ރައީސް ސޯލިހުގެ ސަރުކާރާއި އެކު އެ ގުޅުން ވަނީ އަނެއްކާ ވެސް ވަރުގަދަވެފައެވެ.
