އެމެރިކާގެ ލަސް ވެގަސްގައި އެންމެ ގިނަ ކެސީނޯ ހިންގަނީ ސައުދީގެ ޝާހީ އައިލާއިން: އަމްރު

އެމެރިކާގެ ލަސް ވެގަސްގައި އެންމެ ގިނަ ކެސީނޯ ހިންގަނީ ސައުދީގެ ޝާހީ އާއިލާއަށް ނިސްބަތްވާ ބޭފުޅުން ކަމަށް އެމްޑީޕިގެ ޕޮލިސީ ކޮމެޓީގެ މުޤައްރިރު ހުސެއިން އަމްރު ވިދާޅުވެއްޖެއެވެ.

އާދީއްތަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަމުން އަމްރު ވިދާޅުވީ ސަރުކާރުން ފ. އަތޮޅު ސައުދީ އަރަބިއްޔާއަށް ވިއްކާލަން އުޅޭކަމުގެ އަޑުތައް ފެތުރިފައިވާއިރު ސައުދީ އަކީ މުސްލިމް ގައުމެއްކަމަށް ބުނެ އެކަމާއި ކަންބޮޑުވުން ފާޅުނުކޮށް ނުތިބެވޭނެ ކަމަށެވެ. ސައުދީގައި ކެސީނޯތައް ހިންގުން މަނާ ވިޔަސް، އެގައުމުގެ ޝާހީ އާއިލާތަކުން އެމެރިކާގައި ކެސީނޯތައް ހިންގަމުން ދާކަމުގެ މައުލޫތުލިބިފައިވާ ކަމަށާއި ފ.އަތޮޅު ސައުދީއަށް ވިއްކާލުމަށް ފަހު އެއަތޮޅުގައި ކުރިއަށް ގެންދަން ނިންމާފައި ވަނީ ކޮންކަހަލަ ޕްރެޖެކްޓެއްކަން ސަރުކާރުން ހާމަކުރަންޖެހޭ ކަމަށެވެ.

"ސައުދީގެ ޕްރިންސެއް މީހަކު ރޭޕްކުރާކަމުގެ ވާހަކައާއި، އެފަދަ ވާހަކަތަކަކީ ދެކެވޭ ވާހަކަތައް. އެހެންކަމުން އެފަދަ ގޮތަކަށް އަޅުގަނޑުމެންނަށް ސައުދީގެ ކަންކަން ފާހަގަކުރެވެނީ" ހުސެއިން އަމްރު ވިދާޅުވިއެވެ.

ދުނިޔޭގެ ޤައުމުތަކުގައި ބިމާއި ގުޅޭ ގޮތުން ބޮޑެތި ހަނގުރާމަތައްވެސް ކޮށްފައިވާކަން ފާހަގަކޮށް އަމްރު ވިދާޅުވީ ދުނިޔޭގެ އެކި ކަންކޮޅުގައި ބިންތަކަށް ތޮޅޭއިރު، ފ. އަތޮޅު ވިއްކާލުމަކީ އާދައިގެ ކަމެއް ނޫން ކަމަށެވެ.

އަމްރު ވިދާޅުވީ ދިވެހި ރައްޔިތުން ބަނޑަށް ޖެހިފައި ނުވާއިރު ބިންތައް އެގޮތަށް ވިއްކަން ނުޖެހޭނެ ކަމަށާއި މިދާ ގޮތަށް ދާކަމުގައި ވާނަމަ ގްރީކަށް ވެގެން ދިޔަ ގޮތަށް ރާއްޖެ ވެސް ބަނގުރޫޓް ވެގެންދާނެ ކަމަށެވެ. ރާއްޖެ ބަނގުރޫޓް ނުވާނަމަ ބިންތައް ވިއްކަން ޖެހޭ ހާލަތަށް ދާން ނުޖެހޭނެ ކަމަށް ވެސް އޭނާ ވިދާޅުވި އެވެ.

މައުލޫމާތު ލިބިފައިވާ ގޮތުގައި ސައުދީ ރަސްގެފާނު އަންނަ މަހު ރާއްޖެއަށް ކުރައްވާ ދަތުރުފުޅުގައި ފ. އަތޮޅު ބައްލަވައިގަތުމާ ގުޅޭ ގޮތުން އެއްބަސްވުންތަކުގައި ސޮއިކުރައްވަން ވަނީ ނިންމަވައިފަ އެވެ. އެކަމަށް ބާރުލިބޭ ގޮތަށް ރައީސް އަބްދުﷲ ޔާމީންވެސް ވާހަކަދައްކަވާފައިވާއިރު، ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ ސަރުކާރު މެމްބަރުންވެސް ގެންދަވަނީ އެކަމަށް ބާރުލިބިދޭގޮތަށް ވާހަކަދައްކަވަމުންނެވެ. މިހާތަނަށްވެސް އެކަން ދޮގުކޮށް ރަސްމީ ގޮތުން ސަރުކާރުގެ ފަރާތުން އެއްވެސް އެއްޗެއް ހާމަކޮށްފައެއް ނުވެއެވެ.

ތޭވީސް ރަށާއި، ރީތި ފަރުތަކާއި، ފިނޮޅުތައް ހިމެނޭ ފ. އަތޮޅު ވިއްކާލައިފިނަމަ އެއީ ދިވެހިރާއްޖޭގެ ތާރީހުގައިވެސް ޤައުމުގެ އަތޮޅެއް ބޭރުގެ ބަޔަކަށް ވިއްކާލެވޭ ފުރަތަމަ ފަހަރަށްވެގެންދާނެ އެވެ. ދުނިޔޭގެ އެންމެ ކޮރަޕްޓް ސަރުކާރުތަކުގެ ތެރޭގައި ހިމެނޭ ސައުދީ ސަރުކާރުގެ އިސްވެރިންނަށް ޤައުމުން ބައެއް ވިއްކާލާކަމުގެ އަޑުތައް ފެތުރިފައިވާއިރު، އެ ސަރަހައްދުގައި ޤައުމުގެ ދުސްތޫރުގެ ބާރުވެސް ނުހިނގާނެ ބައެއް ފަރާތްތަކުން ބުނެ އެވެ.

ރައްޔިތުންގެ މެދުގައި މި މައްސަލައާ ބެހޭ ގޮތުން ވަރަށް ބޮޑަށް ކަންބޮޑުވުން ފާޅު ކުރަމުން ގެންދާ އިރުވެސް ސަރުކާރުން އަދިވެސް މިކަން އޮތްގޮތް ރައްޔިތުންނަށް ސާފުކޮށެއް ނުދެ އެވެ.