ޕާކިން ޒޯންތަކާއެކު މާލޭގެ މަގުމަތި ހުސްކުރަނީ
6 މެއި 2019 | ހޯމަ 07:12ކުރިއަށް އޮތް ހަފްތާގެ ތެރޭގައި އިތުރު ޕާކިން ޒޯންތައް ހުޅުވިގެންދާނެ
ފިނޭންސް މިނިސްޓްރީ ސަރަހައްދުގައި ތަރައްޤީކުރި ޕާކިން ޒޯން
މާލޭގެ އެކި ސަރަހައްދުތަކުގައި އަލަށް ހުޅުވާ ޕާކިން ޒޯންތަކާއިއެކު އެ ސަރަހައްދުތަކުގެ މަގުތަކުގައި ޕާކްކުރުން މަނާކޮށް، މަގުތައް ހުސްކުރާނެ ކަމަށް މާލެ ސިޓީ ކައުންސިލުން ބުނެފި އެވެ.
ރާއްޖެޓީވީގެ ސުންގަޑި ޕްރޮގްރާމްގައި ވާހަކަ ދައްކަވަމުން މާލެ ސިޓީ ކައުންސިލްގެ މެމްބަރު އަހުމަދު ޒަމީރު ވިދާޅުވީ ފިނޭންސް މިނިސްޓްރީ ހިމެނޭ ސަރަހައްދުގައި އަލަށް ތަރައްޤީކުރި ޕާކިން ޒޯން ނިމި، ކުރިއަށް އޮތް ދެ ތިން ދުވަހެއްގެ ތެރޭގައި ހުޅުުވާލާނެ ކަމަށެވެ. އަދި އެ ޕާކިން ޒޯންގައި ދެ ފުރޮޅުލީ އުޅަނދުތަކަށް އެއްވެސް ފީއަކާއި ނުލާ ޕާކްކުރެވޭނެ ކަމަށާއި، ނަމަވެސް ޕާކިން ޒޯންގައި ހަތަރު ފުރޮޅުލީ އުޅަނދުތައް ޕާކްކުރުމަށް ފީއެއް ނަގާނެ ކަމަށް ޒަމީރު ވިދާޅުވި އެވެ.
ޒަމީރު ވިދާޅުވީ އެ ޕާކިން ޒޯން ހުޅުވުމާއެކު ފެން ބިލްޑިންގ އިން ފެށިގެން، ގިޔާސުއްދީން ސުކޫލާއި ހަމައަށް މަގުމަތީގައި ޕާކްކުރުން މަނާކުރެވޭނެ ކަމަށެވެ. އެޔާއެކު އަމީނީ މަގުގެ އެންމެ ބާރު ބޮޑު އެއް ސަރަހައްދަށް ބޮޑު ލުޔެއް ލިބިގެންދާނެ ކަމަށް އޭނާ ވިދާޅުވި އެވެ.
"ވޯޓަރ ސަޕްލައިން ފެށިގެން ގިޔާސުއްދީނާއި ދޭތެރޭގައި އަމީނީ މަގު އަޅުގަނޑުމެން ހުސްކޮށްލާނަން. އެ ދޭތެރޭގައި އެ ހުރި ހުރިހާ ސައިކަލެއް އެ ޒޯނަަށް ހަމަ ފްރީކޮށްވެއްދޭނެ."
އޭގެ އިތުރުން ޒަމީރު ވިދާޅުވީ ސޯސަންމަގު، ސިޓީ ބޭކަރީ ސަރަހައްދަކީ ރަމަޟާން މަހުގައި ވަރަށް ބާރު ބޮޑުވާ ސަރަހައްދަކަށް ވާތީ، އެ ސަރަހައްދުގެ ޓްރެފިކް ހައްލު ކުރުމުގެ ގޮތުން ހެންވޭރު ސަހަރާގެ ހުޅަނގު ފަރާތުގައިވާ ބިން ހުސްކޮށް ޕާކިން ޒޯނެއް ތަރައްޤީ ކޮށްފައިވާ ކަމަށެވެ. އަދި އެ ޕާކިން ޒޯން ބޭނުންކުރަން ފެށުމާއެކު ސޯސަން މަގު ދެކުނު ފަޅީގެ އިރަށްވާގޮތަށް އެއްވެސް ވެހިކަލެއް ޕާކްކުރުމަކީ މަނާ ކަމެއް ކަމަށް ޒަމީރު ވިދާޅުވި އެވެ.
މިހާރު އޮންނަ ގޮތުން ނަމަ ސޯސަން މަގުގެ ދެކުނު ފަޅީގެ މަގުގެ ދެ ފަރާތުގައި ވެސް ޕާކްކުރެވެ އެވެ. ޒަމީރު ވިދާޅުވީ ގެނެވުނު ބަދަލާއެކު އެ ސަރަހައްދުގެ ޓްރެފިކަށް ވެސް ބޮޑު ލުޔެއް ލިބިގެންދާނެ ކަމަށެވެ. އަދި މަޖީދިއްޔާ ސުކޫލް ދޮރުމަތީގައި ތަރައްްޤީ ކުރާ ޕާކިން ޒޯނާއެކު ސޯސަންމަގުގެ އުތުރު ފަޅީގެ މަގުގެ ދެ ފަރާތުގައި ޕާކްކުރުން ވެސް މަނާކުރެވޭނެ ކަމަށް ޒަމީރު ވިދާޅުވި އެވެ.
"މަޖީދިއްޔާ ސުކޫލް ސަރަހައްދުގައި އޮތް ޕާކިން ހުޅުވުމާއެކު، އަޅުގަނޑުމެން ސޯސަން މަގު އުތުރުކޮޅު ދެ ފަޅިއަށް އޮތް ޕާކިން އެއް ފަޅިއަށް ބަދަލުކޮށްލަދޭނަން" ޒަމީރު ވިދާޅުވިއެވެ.
