ލަންކާގައި ޓެރަރިސްޓުންގެ މައުލޫމާތު ދިން ފުލުހުންނަށާއި އާންމުންނަށް ބޮޑެތި ފައިސާގެ އިނާމް!

ސައިންދަމަރްތޫގައި ތިބި ޓެރަރިސްޓުންގެ މައުލޫމާތު ފޯރުކޮށްދިން ފުލުހުންނަށާއި އާންމުންނަށް، ބޮޑެތި ފައިސާގެ އިނާމުތަކެއް ދޭން ލަންކާ ފުލުހުން ނިންމައިފިއެވެ.

މިކަމާއި ބެހޭގޮތުން މައުލޫމާތު ދެއްވަމުން ލަންކާ ފުލުހުންގެ ތަރުޖަމާނު ރުވާން ގުނަސޭކަރަ ވިދާޅުވީ މި ހަމަލާގެ މައުލޫމާތު އެންމެ ފުރަތަމަ ދިނީ ކަލްމުނާއީ ފުލުހުންގެ މަރުކަޒުގެ ޓްރެފިކް ޔުނިޓުގައި މަސައްކަތްކުރާ ފުލުހުންގެ ކޮންސްޓަބަލްއެއް ކަމަށެވެ. އޭނާ ޕޮލިސް ސާޖެންޓްގެ މަގާމަށް އިސްކުރުމަށް ފަހު، ފަސް ލައްކަ ސްރީ ލަންކަން ރުޕީޒް (43،440 ރުފިޔާ) ގެ ފައިސާގެ އިނާމެއް ދީފައެވެ.

މިކަމުގައި އޭނާއަށް އެއްބާރުލުންދީ އެކަމުގައި ބައިވެރިވި އިތުރު ކޮންސްޓަބަލްއަކަށާއި، ސާޖަންޓެއްގެ މަސައްކަތުގެ އަގު ވަޒަންކޮށް، ފަސް ލައްކަ ރުޕީޒްގެ އިނާމެއް ދީފައެވެ.

މީގެ އިތުރުން ތުހުމަތުކުރެވޭ މީހުންގެ މައުލޫމާތު ފުލުހުންނަށް ފޯރުކޮށްދިން އެ ސަރަހައްދުގައި އުޅޭ ތިން މުސްލިމް ރައްޔިތަކަށް ވެސް ފައިސާގެ އިނާމެއް ދީފައިވެއެވެ. އެއިން ކޮންމެ މީހަކަށް ވެސް އެއް މިލިއަން ރުޕީޒް (86،880 ރުފިޔާ) ގެ އިނާމެއް ވަނީ ދީފައެވެ.

ސައިންދަމަރްތޫގައި ދިރިއުޅެމުން ދިޔަ ޓެރަރިސްޓުންނަކީ އީސްޓަރ ސަންޑޭގައި ދިން ހަމަލާގެ މޭސްތިރި ޒަހްރާން ހާޝިމްގެ އާއިލާ މެމްބަރުންނެވެ. އެ މީހުން ލަންކާގެ ފުލުހުންނާއި އަސްކަރިއްޔާއާ ހަމަލާ ބަދަލުކުރުމަށް ފަހު، ވަޒަން ހުސްވުމުން ވަނީ ބޮން ހަރުކޮށްގެން އަމިއްލަ ހަށި ގޮއްވާލާފައެވެ. މި ހަމަލާގައި ފަނަރަ މީހަކު މަރުވެފައިވާ އިރު އޭގެ ތެރޭގައި ހަ ކުޑަކުދިން ވެސް ހިމެނެއެވެ. ހަމަލާގައި ސަލާމަތްވީ ޒަހްރާންގެ އަންހެނުންނާއި ތުއްތު އަންހެން ދަރިފުޅެވެ.