ލަންކާގައި ހަމަލާދިން މީހުންގެ މައުލޫމާތު އާންމުކޮށްފި

މިދިޔަ ހަފުތާގެ އާދިއްތަ ދުވަހު (އީސްޓަރ ސަންޑޭ) ގައި ލަންކާގައި ދިން ބޮމުގެ ހަމަލާތަކުގައި ބައިވެރިވީ ނުވަ މީހެއްގެ ވަނަވަރު އާންމުކޮށް، އެ މީހުންގެ މުދާ ހިފަހައްޓަން ނިންމައިފިއެވެ.

ލަންކާ ފުލުހުންގެ ތަރުޖަމާނު ރުވާން ގުނަސެކަރަ ވިދާޅުވީ އެ މީހުންގެ މުދާ ހިފަހައްޓަން ނިންމާފައި ވަނީ، ޓެރަރިޒަމް އަށް ހަރަދުކުރުން ހުއްޓުވުމުގެ ގާނޫނުގެ ދަށުން ލިބިދީފައިވާ ބާރުގެ ތެރެއިން ކަމަށެވެ.

ގުނަސޭކަރަ ވަނީ ލަންކާގެ ލަކްޒަރީ ދެ ހޮޓާ ކަމުގައިވާ ޝަންގްރީ-ލާއަށާއި ސިނަމަން ގްރޭންޑް ހޮޓަލަށް ދިން ހަމަލާގައި، ލަންކާގެ މުއްސަަންދި ވިޔަފާރިވެރިއެއް ކަމުގައިވާ މުހައްމަދު ޔޫސުފް އިބްރާހިމްގެ ދެބެއިން ބައިވެރިވެފައިވާކަން ކަށަވަރުކޮށްދެއްވާފައެވެ. އެ ދެބެއިންގެ ތެރެއިން އިލްހާމް އަހްމަދު ޝަންގްރީ-ލާއަށް ދިން ހަމަލާގައި ބައިވެރިވެފައިވާ އިރު، އޭނާގެ ބޭބެ އިންސާފް އަހްމަދު ގޮއްވާލީ ސިނިމަން ގްރޭންޑް ހޮޓަލުގައެވެ.

މި ހަމަލާގެ މޭސްތިރިކަމަށް ބުނާ ޒަހްރާން ހާޝިމް އިލްހާމާ އެކު ޝަންގްރީ-ލާއަށް ދިން ހަމަލާގައި ބައިވެރިވެފައިވާ އިރު، ޝަންގްރީ-ލާއަށް ދިން ހަމަލާ ފިޔަވައި އެހެން ހުރިހާ ތަނަކަށް ވެސް ހަމަލާދީފައި ވަނީ އެކަކެވެ. ޒަހްރާން ހާޝިމްއަކީ މި ހަމަލާގެ ޒިންމާ ލަންކާގެ ފުލުހުން އަޅުވާފައިވާ ނެޝަނަލް ތައުހީދު ޖަމާއަތު (އެންޓީޖޭ) ގެ ލީޑަރެވެ.

ތިންވަނައަށް ހަމަލާދިން ކިންގްސްބަރީ ހޮޓަލަށް ހަމަލާދިނީ މުހައްމަދު އައްޒާމް މުބާރަކް މުހައްމަދު ނަމަކަށް ކިޔާ މީހެކެވެ. އޭނާގެ އަންހެނުން ހުރީ ފުލުހުންގެ ބަންދުގައި ކަމަށް ގުނަސޭކަރަ ވިދާޅުވިއެވެ. މުހައްމަދު އައްޒާމް މުބާރިކަކީ ކޮލަމްބޯގެ ރައްޔިތެކެވެ.

ސެއިންޓް އެންތޮނީސް ޗަރޗަށް އަހްމަދު މުއާޒް ނަމަކަށް ކިޔާ މީހަކު ހަމަލާދިން އިރު، އޭނާގެ ބޭބެ ވަނީ ހައްޔަރުކޮށްފައެވެ. ސެއިންޓް ސެބެސްޓިއަން ޗާޗަށް ހަމަލާދިނީ ލަންކާގެ އިރުމަތީގެ އަވަށެއް ކަމުގައިވާ ވަލައްޗްނޭއަށް ނިސްބަތްވާ މުހައްމަދު ހަސްތުން ނަމަކަށް ކިޔާ މީހެކެވެ. އަދި ބަޓިކްލޯގައި ހުންނަ ޒިއޯން ޗާޗަށް ހަމަލާދިނީ ޒަހްރާން ހާޝިމް ނިސްބަތްވާ ކާއްތަންކުޑީގެ ރައްޔިތެއް ކަމުގައިވާ މުހައްމަދު ނަސީރު މުހައްމަދު އައްސަދެވެ.

ދެހިވަލައިގައި ހުންނަ "ޓްރޮޕިކަލް އިން" ގެސްޓް ހައުސްއަށް ހަމަލާދިނީ އަބްދުލް ލަތީފް ޖަމީލް މުހައްމަދެވެ. އޭނާ ގެސްޓް ހައުސްގައި ހަށި ގޮއްވާލައިގެން ހަމަލާދިނީ، ތާޖް ސަމުދްރާއަށް ހަމަލާދޭން އުޅެ ނާކާމިޔާބުވުމާއި ގުޅިގެންނެވެ. އޭނާއަކީ އޮސްޓްރޭލިއާއާއި އިނގިރޭސިވިލާތުން ކިޔަވައިގެން ހުރި މީހެކެވެ. ބެލެވޭ ގޮތުގައި މި ހަމަލާގައި ގޮއްވާލި ބޮންތައް އުފެއްދުމުގައި އެންމެ އިސްކޮށް އުޅުނީ އަބްދުލް ލަތީފެވެ. އޭނާއަކީ އައިސިސްއާ ގުޅިގެން ސީރިޔާގައި ހަނގުރާމަ ކުރުމަށް ފަހު އަނބުރާ ލަންކާއަށް އައިސްފައިވާ މީހެކެވެ.

ހަމަލާގައި ބައިވެރިވި ހަމައެކަނި އަންހެން މީހާ ކަމުގައިވާ، ފާތިމާ އިލްހާމް ބޮން ގޮއްވާލީ ފުލުހުން އޭނާ ދިރިއުޅޭ ގެ ބަލާފާސްކުރަން ދިޔުމުންނެވެ. ފާތިމާއަކީ މި ހަމަލާގައި ބައިވެރިވި އިލްހާމް އަހްމަދުގެ އަންހެނުންނެވެ. އޭނާ ހަށިގޮއްވާލައިގެން ދިން ހަމަލާގައި އޭނާގެ ދެ ދަރިންނާ ތިން ފުލުހަކު މަރުވެފައިވާ އިރު، ހަމަލާދިން އިރު އޭނާ އިނީ ތިންވަނަ ދަރިއަކަށް ބަލިވެއެވެ.

އީސްޓަރ ސަންޑޭގައި ލަންކާގައި ދިން ހަމަލާގައި 260އަށް ވުރެ ގިނަ މީހުން މަރުވެފައިވާ އިރު، އޭގެ ތެރޭގައި 40 އަށް ވުރެ ގިނަ ކުޑަކުދިންނާއި ބޭރުގެ ގައުމުތަކަށް ނިސްބަތްވާ 36 މީހަކު ހިމެނެއެވެ. މި ހަމަލާތަކާއި ގުޅިގެން ލަންކާ ފުލުހުން ކުރިޔަށް ގެންދާ އޮޕަރޭޝަންގައި 100 އަށް ވުރެ ގިނަ މީހަކު ވަނީ ހައްޔަރުކޮށްފައެވެ.