އޭސީސީގެ ރައީސް ލުތުފީ ވަޒީފާ އަށް ނުނިކުންނަވައި މުސާރަ ނަންގަވާތާ ތިން މަސް ވަނީ

އެންޓި ކޮރަޕްޝަން ކޮމިޝަން (އޭސީސީ)ގެ ރައީސް ޙަސަން ލުތުފީ ވަޒީފާއަށް ނުނިކުންނަވާ މުސާރަ ނަންގަވަމުން ގެންދަވާތާ ތިން މަސް ވާން ކައިރިވެފައިވާ ކަމަށް ރާއްޖެއެމްވީއަށް މަޢުލޫމާތު ލިބިއްޖެއެވެ.

އޭސީސީގެ މަސްދަރަކުން ބުނީ، މި އަހަރުގެ ފެބްރުއަރީ މަހުގެ 10 ވަނަ ދުވަހުން ފެށިގެން ލުތުފީ އޮފީހަށް ނުނިކުންނަވާ ކަމަށެވެ. އެގޮތުން ފެބްރުއަރީ މަހުގެ 10 ވަނަ ދުވަހު ލުތުފީ ވަޑައިގެންނެވީ އަހަރީ ޗުއްޓީއަށް ކަމަށާއި، ނަމަވެސް މިހާރު ޗުއްޓީ ހަމަވެ، ވަޒީފާގެ އެހެނިހެން ލުއިތައް ވެސް ހަމަވެފައިވާ ކަމަށް މައުލޫމާތު ދިން ފަރާތުން ވަނީ ބުނެފައެވެ. އަދި މި މުއްދަތުގައި ލުތުފީ ފުރިހަމަ މުސާރަ ވެސް ނަންގަވަމުން ގެންދަވާކަން އޭސީސީގެ މަސްދަރު ވަނީ ޔަޤީންކޮށްދީފައެވެ.

Advertisement

ވަޒީފާއަށް ނުކުންނެވުން ހުއްޓަވާލެއްވިއިރު، އެމްއެމްޕީއާރްސީގެ ޚިޔާނާތުގެ ތަޙުޤީޤު ރިޕޯޓާ ގުޅިގެން ލުތުފީއަށް ވަނީ ރައްޔިތުންގެ ފާޑުކިޔުން ވަރަށް ބޮޑަށް އަމާޒުވެފައެވެ. އަދި ފެބްރުއަރީ މަހު ޗުއްޓީއަށް ވަޑައިގެންނެވިއިރު، ވެށިފަހި މާލެ ޕްރޮގްރާމްގެ ދަށުން ޕްލެޓް ލިބިވަޑައިނުގަތުމުން، އެކަމާ ހިތްހަމަޖެހިވަޑައިނުގެން ލުތުފީ ވަނީ ފްލެޓް ހޯއްދެވުމަށް ދައުލަތާއި ދެކޮޅަށް ދައުވާ ވެސް ކުރައްވާފައެވެ.

އަދި ލުތުފީ އޮފީހަށް ނުކުންނެވުން ހުއްޓަވާލައްވާފައިވާއިރު، ފުލުހުން ދަނީ ލުތުފީ އާއި ދެކޮޅަށް މަނީ ލޯންޑްރިންގ އާއި ގުޅޭ މައްސަލައެއް ބަލަމުންނެވެ. ލުތުފީއާ ދެކޮޅަށް ފުލުސް އޮފީހަށް މައްސަލަ ހުށަހެޅީ، މަނީ ލޯންޑްރިންގ އާއި ޓެރަރިޒަމަށް ފައިނޭންސް ކުރުން ހުއްޓުވުމަށް، މަރުކަޒީ ބޭންކު، އެމްއެމްއޭގައި އުފައްދާފައި އޮންނަ ގައުމީ އިދާރާ، ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިންނެވެ. ރާއްޖެއެމްވީއަށް މަޢުލޫމާތު ލިބިފައިވާ ގޮތުގައި ލުތުފީ އާއި ދެކޮޅަށް ބަލަމުންދާ މައްސަލައަކީ ކުރީގެ ރައީސް ޢަބްދުﷲ ޔާމީންގެ މައްޗަށް ތުހުމަތު ކުރެވޭ މަނީ ލޯންޑްރިންގގެ މައްސަލައަކާއި ގުޅިގެން އެފްއައިޔޫއިން އޭސީސީއަށް ފޮނުވި ސިއްރު ސިޓީތަކެއް، ކޮމިޝަންގެ އެހެން މެންބަރުންނާއި ހިއްސާ ނުކުރައްވައި އެ ސިޓީތައް ފޮރުވި މައްސަލައެކެވެ.

އޮފީހަށް ނުނިކުންނަވާ ސަބަބު ބެލުމަށް ލުތުފީ އަށް ގުޅުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.