18 ވަނަ މަޖިލީހުން ވަނީ 174 ބިލް ފާސްކޮށްފައި:ޤާސިމް

18 ވަނަ މަޖިލީހުން 174 ބިލް ފާސްކޮށްފައިވާ ކަމަށް ރައްޔިތުންގެ މަޖިލީހުގެ ރައީސް ގާސިމް އިބްރާހިމް ވިދާޅުވެއްޖެއެވެ.

ގާސިމް ރިޔާސަތު ބެލެހެއްޓެވި އެންމެ ފަހު ޖަލްސާގައި ވާހަކަ ދައްކަވަމުން ވިދާޅުވީ 18 ވަނަ މަޖިލީހުގެ މަސައްކަތުގެ ތެރެއިން 94 އިން ސައްތަ މަސައްކަތް ނިމިފައިވާ ކަމަށާއި، އެއީ އިންސައްތައިން ބަލާއިރު ވަރަށް ބޮޑު އަދަދެއް ކަމަށެވެ.

18 ވަނަ މަޖިލީހުން ނިންމާފައިވާ މަސައްކަތްތަކުގެ ތަފްސީލް ގާސިމް ވަނީ މަޖިލީހުގެ ތަޅުމަށް އިއްވާފައެވެ.

18 ވަނަ މަޖިލީހުން ވަނީ ހަތް ގަރާރާއި، ސަރުކާރުން ހުށަހެޅި 154 މައްސަލައެއް ނިންމާފައެވެ. ރިޔާސަތުން ހުށަހެޅި 26 މައްސަލައެއް ނިންމާފައިވާއިރު، އެކި މައްސަލަތަކާއި ގުޅޭ 156 މައްސަލައެއް މަޖިލީހުން ވަނީ ނިންމާފައެވެ. މެމްބަރުން ހުށަހެޅުއްވި 19 މައްސަލައެއް ނިންމާފައިވާއިރު، ދައުލަތުގެ ފަސް ބަޖެޓެއް ވަނީ ނިންމާފައެވެ. އޭގެ އިތުރުން ސަޕްލިމެންޓްރީ އެއް ބަޖެޓް ނިންމާފައިވާއިރު، އެކި މައްސަލަތަކާއި ގުޅޭ 151 ރިޕޯޓެއް ވަނީ ނިންމާފައިވެއެވެ. ވަޒީރުން ގެނެސްގެން 60 ސުވާލު ކޮށްފައިވެއެވެ.

ދައުރުގެ ފަހު ޖަލްސާ ހޯމަ ދުވަހު ބޭއްވިއިރު ، ސަރުކާރުން ހުށަހަޅާފައިވާ މުހިއްމު ބިލްތަކެއް އަދިވެސް ނުނިމި އެބަހުރި ކަމަށް ގާސިމް ވަނީ ވިދާޅުވެފައެވެ. އެ މަސައްކަތްތައް ނިންމާލަން އިތުރު ޖަލްސާތައް ބާއްވަން ބޭނުންވި ކަމުގައިވީ ނަމަވެސް، މަޖިލީހުގެ ގަވާއިދުގައިވާ ގޮތުގެ މަތިން އިތުރު ޖަލްސާއެއް ބޭއްވެން ނެތް ކަމަށާއި، އެ ކަމާއި ހިތާމަކުރައްވާ ގާސިމްވަނީ ވިދާޅުވެފައެވެ.

"ދައުރު އިތުރުކުރެވޭނީ ވެސް ގަވާއިދަށް ބަދަލުގެނެސްގެން. އަޅުގަނޑަށް ޖެހެނީ ހިތާމަ އާއި އެކީ ނަމަވެސް މަޖިލިސް ނިންމާލަން" ގާސިމް ވިދާޅުވިއެވެ.

މަޖިލިސް ކުރިއަށް ގެންދެވުމުގައި މެމްބަރުން ކޮށްދެއްވި މަސައްކަތްތަކަށް ގާސިމް ވަނީ ޝުކުރު އަދާކުރައްވާފައެވެ.