ތިލަދުންމަތީ ދެކުނުބުރީގެ ސްކޫލްތަކުގެ ޕްރިންސިޕަލުންނާއި އިސްވެރިންނަށް އަމާޒުކޮށް، "ދިވެހިރާއްޖެއަށް އޮތް ފިކުރީ ހައްދު ފަހަނައެޅުމާއި ޓެރަރިޒަމްގެ ނުރައްކަލަށް ތަޢުލީމީ ދާއިރާ އަހުލުވެރިކުރުމުގެ މަސައްކަތުބައްދަލުވުން'' ބާއްވައިފިއެވެ.
ހދ. ކުޅުދުއްފުށީ ޖަލާލުއްދީން ސްކޫލްގައި ބޭއްވި މި މަސައްކަތު ބައްދަލުވުން އިފްތިތާޙުކޮށްދެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން އަޙްމަދު ރިޔާޟްއެވެ.
އެމްއެންޑީއެފުން ބުނީ ދިވެހިރާއްޖެއަށް އޮތް ފިކުރީ ހައްދު ފަހަނައެޅުމާއި ޓެރަރިޒަމާ ބެހޭގޮތުން ތަޢުލީމީ ދާއިރާ އަހުލުވެރިކުރުމަށްޓަކައި ބޭއްވި ބައްދަލުވުމެކެވެ.
މި މަސައްކަތު ބައްދަލުވުމަކީ ނޭޝަނަލް ކައުންޓަރ ޓެރަރިޒަމް ސެންޓަރާއި މިނިސްޓްރީ އޮފް އެޑިޔުކޭޝަނާއި އެމް.އެން.ޑީ.އެފް ނޮދަން އޭރިއާ އަދި ޔު.އެން.ޑީ.ޕީ ގުޅިގެން، ތަޢުލީމީ ދާއިރާއަށް އަމާޒުކޮށް، ސްކޫލްތަކުގެ އިސްބޭފުޅުންނަށް ހިންގާ ޕްރޮގްރާމެކެވެ.
އެއްދުވަހުގެ މުއްދަތަށް ހިންގުނު މި މަސައްކަތު ބައްދަލުވުމުގައި ތިލަދުންމަތީ ދެކުނުބުރީގެ 15 ސްކޫލަކުން 34 ބޭފުޅުން ބައިވެރިވިއެވެ.
ތަޢުލީމީ ދާއިރާގައި މަސައްކަތް ކުރައްވާ އިސްބޭފުޅުންނަށް އަމާޒުކޮށްގެން ހިންގޭ މި ސިލްސިލާ މަސައްކަތު ބައްދަލުވުން، ދެފަހަރެއްގެ މަތިން "ގްރޭޓަރ މާލެ" ސަރަހައްދުގައިވާ ސްކޫލްތަކާއި އައްޑޫ ސިޓީގައިވާ ސްކޫލްތަކުގައި މަސައްކަތް ކުރައްވާ އިސްބޭފުޅުންނަށް ވެސް ވަނީ ހިންގިފައެވެ.
