އެތައް ގޮނޑިތަކަކަށް މެމްބަރުން ހަމަނުވެ އަފްޣާނިސްތާނުގެ ގާނޫނުހަދާ މަޖިލީސް ހުވާކޮށްފި

އިންތިޚާބު އޮޅުވާލާފައިވާ ކަމުގެ ޝަކުވާތަކާއެކު އެތައް ގޮނޑިއަކަށް މެމްބަރުން ކަނޑަނޭޅިވަނިކޮށް އެ ގައުމުގެ ގާނޫނުހަދާ މަޖިލީސް ރައީސް އަޝްރަފް ޣަނީ ހުޅުއްވައި ދެއްވައިފިއެވެ.

ޤާނޫނުހަދާ މަޖިލީހުގެ މެމްބަރުން ބުރާސްފަތި ދުވަހު ހުވާކުރައްވާފައި މިވަނީ ބޮން ގޮއްވުމާއި ގަައުމުގެ އެކި ކަންކޮޅުތަކުގައި ބެހެއްޓިފައި ހުރި ވޯޓްލާ މަރުކަޒުތަކަށް ބޮމުގެ ހަމަލާތައް ދެމުންދަނިކޮށް އިންތިޚާބު ބޭއްވިތާ ހަ މަސްދުވަސް ފަހުންނެވެ.

މަޖިލީސް ހުޅުވުމުގެ ރަސްމިއްޔާތުގައި ވާހަކަދައްކަވަމުން ޣަނީ ވަނީ އިންސާނީ ހައްގުތައް ރައްކާތެރި ކޮށްދެއްވުމަށް ގޮވާލައްވާފައެވެ. އަދި 249 ގޮނޑި ހިމެނޭ ޤާނޫނުހަދާ މަޖިލީހުގެ ތިރިގޭގެ 33 ގޮނޑިއަކަށް މެމްބަރުން ކަނޑަނޭޅި އޮތުމުން ހިތާމަ ކުރައްވާކަމަށް ވަނީ ވިދާޅުވެފައެވެ.

" މިއަދު ގައުމުގެ ގޭގައި، އަލަށް ވަޑައިގެން ތިއްބެވި މެމްބަރުންގެ ތެރެއިން ގިނަ މެމްބަރުންނަކީ ތައުލީމީ، ޒުވާން ޖީލަކުން އައިސްފައިވާ އަންހެނުންގެ ހައްގުތައް އަދި އިންސާނީ ހައްގުތައް ރައްކާކޮށްދޭނެ މެމްބަރުން" ރައީސް ވިދާޅުވިއެވެ.

ގާނޫނުހަދާ މަޖިލީސް ހުޅުވުން ލަސްވުމުގައި އެ މަނިކުފާނުގެ ދައުރެއް ނެތްކަން ފާހަގަކުރައްވައި އެ ކަމަކީ ކުރީގެ އިލެކްޝަންސް ކޮމިޝަނުގެ ސަބަބުން ދިމާވި ކަމެއްކަން ފާހަގަ ކުރެއްވިއެވެ.

ރައީސް ޣަނީ ވަނީ ތާލިބާާނުންނާއެކު ކުރިޔަށް ގެންދާ ސުލްހައިގެ ވާހަކަތަކުގައި ބައިވެރިވުމަށް އަލަށް އިންތިޚާބުވި މެމްބަރުނަށް ބާރު އަޅުއްވާފައެވެ.

ރައީސް ޣަނީ ވަނީ 17 އަހަރުވީ ހަނގުރާމަ ނިމުމަކަށް ގެނެވޭނެ ގޮތްތަކާ ބެހޭގޮތުން މަޝްވަރާ ކުރުމަށް އެތައްހާސް ސިޔާސީ ލީޑަރުންނަށާއި، ދީނީ އިލްމުވެރިންނާއި، ހައްގުތަކަށް ގޮވާލައި އެކްޓިވިސްޓުން އަންނަ ހަފްތާގައި ބައްދަލުވުމަކަށް ގޮވާލައްވާފައެވެ.

ޣަނީގެ މަގާމުގެ މުއްދަތު މެއި މަހުގެ 22 އަށް ހަމަވި ނަމަވެސް އެތައް މަހަށްކަށް ވަނީ މުއްދަތު ދަންމާލާފައެވެ.

މިއީ އެ މަގާމަށް ދެން ވަޑައިގަންނަވާނެ ބޭފުޅަކު ހޮވުމަށް އިންތިޚާބު ބާއްވަންވީ ވަގުތު ކަމަށްވާއިރު މިހާރު ވެސްވަނީ ދެ ފަހަރެއްގެމަތިން އިންތިޚާބު ފަސްކޮށްފައެވެ.