ދިވެހިން ބޭރުގައި އުޅޭ ވަގުތުތަކުގައި ޕާސްޕޯޓް ގެންގުޅުމަށް އެމްބަސީން އެދެފި
24 އެޕްރީލު 2019 | ބުދަ 18:46ޕާސްޕޯޓުގެ ވިސާގެ ކަންތައްތައް ފުރިހަމަ ވެފައިވޭތޯ ބެލުމަށް ޚާއްސަ ސަމާލު ކަމެއް ދިނުމަށް އެދޭ
ލަންކާގައި ހުންނަ ރާއްޖޭގެ އެމްބަސީ
މިދިޔަ އާދީއްތަ ދުވަހު ލަންކާގައި ހިނގާދިޔަ ބޮން ގޮއްވުމުގެ ހާދިސާއާ ގުޅިގެން އެ ގައުމުގެ ސަލާމަތީ ކަންތައްތަކުން ކުރިއަށް ގެންދާ ގޭގެ ބަލާ ފާސްކުރުމާއި ޕާސްޕޯޓް ބަލާ ފާސްކުރާ ކަމަށާއި ގެއިން ބޭރުގައި އުޅޭ ވަގުތު ތަކުގައި ވެސް ޕާސްޕޯޓް ގެންގުޅުމަށް ލަންކާގައި ހުންނަ ރާއްޖޭގެ އެމްބަސީން އިލްތިމާސްކޮށްފިއެވެ.
ލަންކާ އެމްބަސީން ބުނީ ލަންކާގެ ގާނޫނުތަކާއި ގަވައިދުތަކާ އެއްގޮތަށް ޕާސްޕޯޓުގެ ވިސާގެ ކަންތައްތައް ފުރިހަމަ ވެފައިވޭތޯ ބެލުމަށް ޚާއްސަ ސަމާލު ކަމެއް ދިނުމަށް އިލްތިމާސް ކުރާ ކަމަށެވެ.
ލަންކާ ސަރުކާރުން ބުނެފައި ވަނީ ހަމަލާ ދީފައި ވަނީ ނޭޝަނަލް ތައުހީދު ޖަމާއަތް (އެންޓީޖޭ) ކަމަށެވެ. އެ ހަމަލާގައި މަރުވި މީހުންގެ އަދަދު 359 އަކަށް އަރާފައިވާއިރު ހަމަލާދިން މީހުންގެ ތެރޭގައި އެ ގައުމުގެ ބޭރުގެ އެއްވެސް މީހަކު ހިމެނިފައިވާ ކަމެއް އަދި ތަހުގީގުން ހާމަވެފައި ނުވާ ކަމަށް އެ ގައުމުގެ ސަރުކާރުން ބުނެއެވެ. ނަމަވެސް ބޭރުގެ ފަރާތްތަކާ ގުޅުން އޮތްކަން ހާމަވާ ކަމަށް ސަރުކާރުން ބުނެއެވެ.
ލަންކާއަކީ ގިނަ އަދަދެއްގެ ދިވެހިން ދިރިއުޅެމުންދާ ގައުމެކެވެ. ލަންކާގައި ހިނގާދިޔަ ބޮން ގޮއްވުމުގެ ހާދިސާ އާއި ދިވެހިން ބައިވެރިވުމެއް އޮތްކަމުގެ އެއްވެސް އިޝާރާތެއް މިހާތަނަށް ވެފައި ނެތް ކަމަށާއި ބޮން ގޮއްވުމުގެ ހާދިސާގައި ދިވެއްސަކު މިހާތަނަށް މަރުވެފައިވާ ކަމުގެ ޚަބަރު ލިބިފައި ނުވާ ކަމަށް ފުލުހުން ވަނީ ބުނެފައެވެ.
