ތަންދޫރީއަށް ހާއްސަ މޯތީ މަހަލް ހުޅުވައިފި
24 އެޕްރީލު 2019 | ބުދަ 22:15ރެސްޓޯރަންޓް ހުޅުއްވައިދެއްވީ ޔޫތު މިނިސްޓަރު މަހުލޫފް
މޯތީ މަހަލް ހުޅުވުމުގެ ރަސްމިއްޔާތުގެ ތެރެއިން
މަޝްހޫރު ތަންދޫރީ އާއި ބަޓަރ ޗިކަން ފަދަ ކެއުންތައް ކަސްޓަމަރުންނާ ހަމައަށް ގެނެސްދިނުމުގައި މުޅި ދުނިޔޭގެ މަޝްހޫރުކަން ހޯދާފައިވާ "މޯތީ މަހަލް" ރެސްޓޯރަންޓް ރާއްޖޭގައި ހުޅުވައިފިއެވެ.
ބުދަ ދުވަހުގެ ރޭ އޮތް ރެސްޓޯރަންޓް ހުޅުވުމުގެ ރަސްމިއްޔާތު ޝަރަފްވެރި ކޮށްދެއްވީ މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަހުލޫފްއެވެ. މި ރަސްމިއްޔާތުގައި "މޯތީ މަހަލް" ރެސްޓޯރަންޓް ފްރެންޗައިޒްގެ އެމްޑީ މޮނިޝް ގުޖްރާލް ވެސް ބައިވެރިވިއެވެ.
މާފަންނުކޮޅުގައި ހުންނަ ރަސްފަންނު ޕެވިލިއަންގައި ހަދާފައި ހުރި މޯތީ މަހަލްއަކީ އިންޑިއާގެ ކެއުންތަކަށް ހާއްސަ ރެސްޓޯރަންޓެކެވެ. މި ރެސްޓޯރަންޓުން މަޝްހޫރުކަން ހޯދާފައިވާ ބަޓަރ ޗިކަން އާއި ތަންދޫރީގެ އިތުރުން އިންޑިއާގެ އެހެން ކެއުންތައް ވެސް ލިބެއެވެ. މޯތީ މަހަލްގެ ކެއުންތައް ތަފާތުވާ ކަމަކީ މިއީ މުޅި ދުނިޔެ މިހާރު މިދެކޭ އިންޑިއަން ފުޑްގެ މޭސްތިރި ކަމަށް ބުނާ ކުންޑަން ލާލް ގުޖްރާލްގެ ރެސިޕީތަކަށް ތައްޔާރުކޮށްފައިވާ ކެއުންތަކަކަށް ވުމެވެ.
މޯތީ މަހަލްއަކީ މީގެ 99 އަހަރު ކުރިން މޮނިޝްގެ ކާފަ ކުންޑަން ލާލް ގުޖްރާލް ހުޅުވި ކުޑަކުޑަ ކެފޭއެކެވެ. މިއަދު މި ނަމުގައި ފްރެންޗައިޒް އުސޫލުން އިންޑިއާގެ އެކި އަވަށްތަކުގައި 100އަށް ވުރެ ގިނަ ރެސްޓޯރަންޓް ހުންނަ އިރު، މެދުއިރުމަތީގައި ވެސް މި ރެސްޓޯރަންޓްގެ ފްރެންޗައިޒްއެއް ހުރެއެވެ.
ކުރިޔަށް އޮތް ތަނުގައި ހުޅަނގުގެ ގައުމުތަކަށާއި އެފްރިކާ ބައްރުގެ ގައުމުތަކުގައި ވެސް ފްރެންޗައިޒް އުސޫލުން ރެސްޓޯރަންޓްތައް ހުޅުވަން މަސައްކަތް ކުރަމުން އަންނަ ކަމަށް މޯތީ މަހަލް ހިންގާ މޯތީ މަހަލް ޑިލަކްސް މެނޭޖްމަންޓް ސާރވިސަސްއިން ވަނީ ބުނެފައެވެ.
