ލަންކާގެ ބޮމުގެ ހަމަލާ: އިންޓެލިޖެންސް މައުލޫމާތު ނުދޭ ކަމަށް އެމެރިކާއިން ބުނެފި
24 އެޕްރީލު 2019 | ބުދަ 19:00ރައީސް ސިރިސެނާ ވަނީ ސަލާމަތީ ޚިދުމަތްތަކުގެ މަގާމުތަކަށް ބަދަލު ގެންނަވަން ނިންމަވާފައި
ހަމަލާގައި މަރުވި މީހުންގެ އަދަދު 359 އަށްވަނީ އަރާފައި
ސްރީ ލަންކާގައި އާދީއްތަ ދުވަހު ދިން ބޮމުގެ ހަަމަލާތައް ދިނުމުގެ ކުރިން އެމެރިކާއިން އެކަމުގެ އިންޓެލިޖެންސް މައުލޫމާތު ލަންކާގެ ކަމާބެހޭ ފަރާތްތަކަށް ހިއްސާކުރައްވާފައި ނުވާނެ ކަމަށް އެމެރިކާއިން ސްރީލަަންކާ އާއި ރާއްޖެެއަށް ކަނޑައަޅުއްވާފައިވާ ސަފީރު އަލައިނާ ޓެޕްލިޒް ވިދާޅުވެއްޖެއެވެ.
ސީއެންއެއެންގައި ވާހަކަދައްކަވަމުން ލަންކާގެ މިނިސްޓަރ ހަރްޝާ ޑި ސިލްވަރ ވިދާޅުވެފައި ވަނީ ބޮމުގެ ހަމަލާގެ ކުރިން އިންޑިއާ އާއި އެމެރިކާއިން ލަންކާއަށް އިންޒާރު ދިން ކަމަށެވެ.
އެކަން އިތުރަށް ތަފްސީލް ކުރުމަށް ސީއެންއެންގެ ކްރިސްޓިއާނީ އަމަންޕޫރ އެމެރިކާ ސަފީރު ޓެޕްލިޒްއާ ސުވާލުދެންނެވުމުން އެ ކަމަނާ ވަނީ އެ ވާހަކަ ދޮގުކުރައްވާފައެވެ.
ސްރީ ލަންކާގައި އާދީއްތަ ދުވަހު ދިން ޖާނުން ފިދާވުމުގެ ބޮމުގެ ހަމަލާތަކުގެ ކުރިން އެކަމުގެ މައުލޫމާތު ލިބިފައިވީއިރު ވެސް އެ ހަމަލާތަކުން ސަލާމަތްވުމަށް ފިޔަވަޅުތަކެއް އެޅިފައި ނުވާތީ އެ ގަައުމުގެ ޑިފެންސް ފޯސްގެ ވެރިޔާ މަގާމުން ވަކިކުރައްވާނެ ކަމަށް ރައީސް މައިތިރިޕާލާ ސިރިސެނާ އަންގާރަ ދުވަހުވަނީ ވިދާޅުވެފައެވެ.
ސްރީލަންކާގައި އާދީއްތަ ދުވަހު ދިން ސިލްސިލާ ބޮމުގެ ހަމަލާތަކުގައި މަރުވި މީހުންގެ އަދަދު 359 އަށް އަރާފައިވާ ކަމަށް ލަންކާގެ ނިއުސްފަަސްޓްގައި ރިޕޯޓްކޮށްފައިވެއެވެ.
