ބޮމުގެ ހަމަލާދިން މީހުންގެ ތެރޭގައި ދެމަފިރިއަކާއި ދެބެއިން!
24 އެޕްރީލު 2019 | ބުދަ 14:16ލަންކާ ސަރުކާރުން ބުނެފައި ވަނީ ހަމަލާ ދީފައިވަނީ ނޭޝަނަލް ތައުހީދު ޖަމާއަތުން ކަމަށް
ލަންކާއަށް ހަމަލާ ދިނުމާއި ގުޅިގެން ގެއެއް ބަލައި ފާސްކުރަނީ
ލަންކާއަށް އާދީއްތަ ދުވަހު ދިން ހަމަލާތަކުގައި އަމިއްލަ ހަށިގަނޑުގައި ބޮން ހަރުކޮށްގެން މަރުވެފައިވަނީ ނުވަ މީހުން ކަމަށާއި އޭގޭ ތެރޭގައި ދެމަފިރިންނާއި ދެބެއިން ހިމެނޭކަމަށް ސްޓޭޓް މިނިސްޓަ އޮފް ޑިފެންސް ރުވާން ވިޖެވަރްދަނާ ވިދާޅުވެއްޖެ އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވިޖެވަރްދަނާ ވިދާޅުވީ ލަންކާއަށް ހަމަލާ ދިނީ ނުވަ މީހުން ކަމަށާއި އޭގެ ތެރެއިން އަށް މީހަކު ދެނެގަނެވިފައިވާ ކަމަށެވެ. އެމީހުންނަކީ މާލީ ގޮތުން ފުދިގެން އުޅޭ މީހުންކަމަށް އޭނާ ވިދާޅުވިއެވެ.
އެ އެންމެންނަކީވެސް ރަނގަޅަށް ތައުލީމު ހާސިލްކޮށްގެން ތިބި މީހުންކަމަށާއި އޭގެތެރެއިން އެކަކު ވަނީ އިނގިރޭސިވިލާތާއި އޮސްޓްރޭލިއާ އިން ތައުލީމު ހާސިލް ކޮށްފައި ކަމަށެވެ.
ހަމަލާދިނުމުގައި އެމީހުން ބޭނުންކޮށްފާ ދެތަނެއް ތަހުގީގު ޓީމުން މިހާރު ހޯދާފައިވާ ކަމަށާއި މިހާތަނަށް ތުހުމަތުކުރެވޭ 60 މީހުން ހައްޔަރުކޮށްފައިވާ ކަމަށް އޭނާ ވިދާޅުވިއެވެ.
ލަންކާގައި ދިން ބޮމުގެ ހަމަލާއާއި ގުޅިގެން މަރުވި މީހުންގެ އަދަދު 359 އަކަށް އަރާފައިވާއިރު ވިޖެވަރްދަނާ ވިދާޅުވީ ހަމަލާދިން މީހުންގެ ތެރޭގައި އެގައުމުގެ ބޭރުގެ އެއްވެސް މީހަކު ހިމެނިފައިވާކަމެއް އަދި ތަހުގީގުން ހާމަވެފައި ނުވާ ކަމަށެވެ. އެހެން ނަމަވެސް ބޭރުގެ ފަރާތްތަކާއި ގުޅުން އޮތްކަން ހާމަވާ ކަމަށް އޭނާ ވިދާޅުވިއެވެ.
ހައްޔަރުކުރި 60 މީހުންގެ ތެރޭގައި އަމިއްލައަށް މަރުވި ދެބެއިންގެ ބައްޕަ މުހައްމަދު އިބްރާހިމް ހިމެނޭކަމަށް ވެސް ވިޖެވަރްދަނާ ވިދާޅުވިއެވެ. ލަންކާ ފުލުހުން ބުނެފައި ވަނީ ސިނަމަން ގްރޭންޑް އާއި ޝަންގްރިއްލާގައި ހަމަލާދީފައި ވަނީ ދެބެއިން ކަމަށެވެ. އެހަމަލާއާއި ގުޅިގެން މުހައްމަދު އިބްރާހިމްގެ ގެ ފުލުހުން އާދީއްތަ ދުވަހުގެރޭ ޗެކް ވެސް ކުރިއެވެ.
ލަންކާ ސަރުކާރުން ބުނެފައި ވަނީ ހަމަލާ ދީފައިވަނީ ނޭޝަނަލް ތައުހީދު ޖަމާއަތް (އެންޓީޖޭ) ކަމަށެވެ.
