ޔާމިން އާއި ރިލްވާނުގެ އިންސާފުގެ ހިނގާލުމުގެ އެންމެ ކުރީ ސަފުގައި ރައީސް!

އަނިޔާވެރިކޮށް މަރާލެވިފައިވާ ބްލޮގަރު ޔާމިން ރަޝީދާއި ވަގަށް ނަގާފައިވާ ނޫސްވެރިޔާ އަހްމަދު ރިލްވާނަށް އިންސާފު ހޯދައި ދިނުމަށް ގޮވާލާ ބޭއްވި ހިނގާލުމުގެ އެންމެ ކުރީ ސަފުގައި ހުންނަވައިގެން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެ ހިނގާލުމުގައި ބައިވެރިވެވަޑައިގެންފިއެވެ.

އަންގާރަ ދުވަހު ރަސްފަންނު ސަރަހައްދުން ފެށި ހިނގާލުމުގައި ރައީސްއާ އެކު ޔާމިންގެ ބައްޕަ އާއި އާއިލާގެ މެމްބަރުންނާއި ރިލްވާންގެ މަންމަ އަދި އާއިލާގެ މެމްބަރުން ބައިވެރިވެވަޑައިގެންނެވިއެވެ. މީގެ އިތުރުން މި ސަރުކާރުގެ އެންމެ ބޮޑު ހިއްސާއެއް އޮތް އެމްޑީޕީގެ ކެބިނެޓް މިނިސްޓަރުންނާއި އެމްޑީޕީގެ ޓިކެޓުގައި ނިމިދިޔަ އިންތިހާބުގައި ވާދަކުރައްވާ ކާމިޔާބީ ހޯއްދެވި މެމްބަރުން ވެސް ބައިވެރިވެ ވަޑައިގެންނެވިއެވެ. އަދި ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރައީސް ހުސްނުއް ސުއޫދުގެ އިތުރުން ނޫސްވެރިންނާއި ގިނަ އަދަދެއްގެ އާންމުން ވެސް ބައިވެރިވިއެވެ.

ޔާމިން ރަޝީދު މަރާލިތާ މިއަދަށް ދެ އަހަރު ފުރުމާ ގުޅިގެން ބޭއްވި ހިނގާލުމުގެ ބައިވެރިން ގޮވާލަމުން ދިޔައީ ދެ މީހުންގެ މަރަށް ވެސް އިންސާފު ނުލިބެނީސް "ދުލެއް ނުކުރާނަން" ކަމަށެވެ. ހިނގާލުމުގެ ބައިވެރިން ވަނީ ދެ މީހުންގެ މަރުގައި ވެސް ޝައްކު ކުރެވޭ ކަންތައްތަކެއް ހުރުމާ އެކު ވީހާ ވެސް ދެފުށް ފެންނަ ގޮތަކަށް އަލުން ތަހުގީގެއް ހިންގުމަށް ގޮވާލާ، ރައީސް ސޯލިހު އުފެެއްދެވި ކޮމިޝަނަށް ބާރުދެއްވުމަށް ރައްޔިތުންގެ މަޖިލިހަށް ގޮވާލާފައެެވެ. އަދި މިހާތަނަށް އައި އިރު މި މައްސަލަތަކުގައި އިންސާފު ނުލިބި އޮތުމާ އެކު މިކަމުގައި ފުލުހުންނާއި ޕީޖީ އޮފީހުގެ އިހުމާލު ވެސް އޮތް ކަމަށް ބުނެ އެކަންކަން ވެސް ތަހުގީގު ކުރުމަށް އެ މީހުން ވަނީ ގޮވާލާފައެވެ.

ބްލޮގާ ޔާމިން ރަޝީދު މަރާލީ 2017 ވަނަ އަހަރުގެ އޭޕްރިލް މަހުގެ 23 ވަނަ ދުވަހުގެ ރޭ އޭނާ އޭރު ދިރިއުޅެމުން ދިޔަ މ. ސްޕެކްޓިއުލާ ގޭގެ ތެރޭގައެވެ. އޭނާ މަރާލުމުގައި ބައިވެރިވި ހުރިހާ ފަރާތްތަކެއް ދެނެގަނެ ހައްޔަރުކުރެވިފައިވާ ކަމަށް ފުލުހުން ވަނީ ބުނެފައެވެ. އަދި މައްސަލައާ ގުޅިގެން އަށް މީހަކު ހައްޔަރުކޮށްފައިވާ ކަމަށް ފުލުހުން ބުނެފައިވާ އިރު، އަދި މި މައްސަލަތަކުގައި އެއްވެސް މީހެއްގެ މައްޗަށް ހުކުމެއް ކޮށްފައެއް ނުވެއެވެ. މި މައްސަލައާ ގުޅިގެން ހިނގާ ޝަރީއަތްތައް ކްރިމިނަލް ކޯޓުން ކުރިޔަށް ގެންދަނީ ސިއްރުކޮށްގެންނެވެ.