އެމެރިކާގެ ރައީސް ޑޮނަލްޑް ޓްރަމްޕް ޖޫން މަހުގެ 3ން 5އަށް ތިން ދުވަހުގެ ރަަސްމީ ދަތުރުފުޅެއްގައި އިނގިރޭސި ވިލާތަށް ވަޑައިގަންނަވާނެ ކަމަށް އިނގިރޭސި ޝާހީ ގަނޑުވަރު ބަކިންގަހަމް ޕެލަސްއިން އިއުލާނު ކޮށްފިއެވެ.

އިނގިރޭސި ރާނީގެ ޚާއްސަ މެހެމާނުންގެ ގޮތުގައި ރައީސް ޓްރަމްޕްއާއި ފަސްޓްލޭޑީ މެލަނިއާ ޓްރަމްޕް އެ ގައުމަށް ވަޑައިގަންނަވާއިރު ޑީ-ޑޭއަށް 75 އަހަރު ފުރުން ފާހަގަ ކުރުމަށް ޕޯޓްސްމަތްގައި ބާއްވާ ރަސްމިއްޔާތުގައި ދެކަނބަލުން ބައިވެރިވެ ވަޑައިގަންނަވާނެއެވެ.

އަދި ބޮޑުވަޒީރު ތެރީސާ މޭއާއި އެކު ޑައުނިންގް ސްޓްރީޓްގައި ރައީސް ޓްރަމްޕް ރަސްމީ ވާހަކަތައް ބާއްވަވާނެއެވެ.

ޓްރަމްޕް މީގެ ކުރިން ވަނީ 2018 ވަަނަ އަހަރުގެ ޖުލައިމަހު ކުރެއްވި ދަތުރުފުޅެއްގައި ވިންޑްސަރ ކާސްލްގައި ރާނީއާ ބައްދަލު ކުރައްވާފައެވެ.

މި ދަތުރުފުޅާ ބެހޭގޮތުން ވައިޓް ހައުސްއިން ބުނެފައިވަނީ މި ދަތުރުފުޅުގެ ސަބަބުން އިނގިރޭސި ވިލާތާއެކު އޮންނަ ޚާއްސަ ގުޅުން އިތުރަށް ބަދަހިވެގެންދާނެ ކަމަށެވެ.

ރައީސް ޓްރަމްޕް 2016 ވަަނަ އަހަރު ހުވާ ކުރެއްވުމަށްފަހު ވަނީ އިނގިރޭސި ވިލާތަށް ސްޓޭޓް ވިޒިޓެއް ކުރައްވާނެ ކަމަށް ވައުދުވެ ވަޑައިގެންފައެވެ. ނަމަވެސް ވަކި ތާރީޚެއް ކަނޑައެޅިފައެއްނުވެއެވެ.

ޓްރަމްޕްގެ ކުރީގެ ދަތުރުފުޅާ ބެހޭގޮތުން ބޮޑުވަޒީރު މޭ ވިދާޅުވީ އެ ދަތުރުފުޅަކީ ގާތް ގުޅުމެއް އޮތް ދެ ގައުމުގެ ގުޅުން، ވިޔަފާރިއާއި، އިންވެސްޓްމެންޓާއި، ސަލާމަތީ ކަންކަމާއި، އަދި ދިފާއީ ދައިރާއިން އިތުުރަށް ވަރުގަދަ ކުރެވިދާނެ ގޮތްތަކާ ބެހޭގޮތުން މަޝްވަރާކުރެވުނު ބައްދަލުވުމެއް ކަމަށެވެ.