ބޭރުގެ ޕްރެޝަރަށް އިޖާބަ ނުދެއްވާނަން: ރައީސް ޔަހްޔާ ޖަމްމޭހު

ގެމްބިއާގެ ރައީސް ވެރިކަމުން ފައިބައިވަަޑައިގަތުމަށް ބޭރުގެ ފަރާތްތަކުން ގޮވާލާ ގޮވާލުމަށް އިޖާބަ ނުދެއްވާނެ ކަމަށާއި އެއީ ގަބޫލު ކުރެވޭނެ ކަމެއް ނޫން ކަމަށް ވިދާޅުވެ ބޭރު ދުނިޔެއަށް ވަރަށް ބޮޑަށް ފާޑުވިދާޅުވެ، ރައީސް ޔަހްޔާ ޖަމްމޭހު ވާހަކަފުޅުދައްކަވައިފިއެވެ.

ގެމްބިއާގެ ގައުމީ ޓީވީ މެދުވެރި ކުރައްވައި ވާހަކަފުޅު ދައްކަވަމުން ރައީސް ޖަމްމޭހު ވިދާޅުވީ ގެމްބިއާގައި ހިނގަމުންދާ ސިޔާސީ ހަމަނުޖެހުމާއި ގުޅިގެން ވަރަށް ބޮޑަށް ބޭރުގެ އެކިއެކި ފަރާތްތަކުން ނުފޫޒު ފޯރުވަމުންދާ ކަމަށެވެ. އަދި ހަގީގަތް އޮޅޭ ގޮތަށް މައުލޫމާތު ފަތުރަމުންދާ ކަމަށެވެ.

ގެމްބިއާގެ ރައީސް މިމޭރުމުން ވާހަކަފުޅުދެއްކެވިއިރު ގެމްބިއާގެ ސިޔާސީ ހަލަބޮލިކަމާއި ގުޅޭ ގޮތުން ވާހަކަފުޅުދެއްކެވުމަށް އިކޮނޮމިކް ކޮމިއުނިޓީ އޮފް ވެސްޓް އެފްރިކަން ސްޓޭޓްސް، އިކޯވާސްގެ ލީޑަރުން އަންނަ ހުކުރު ދުވަހު އަނެއްކާވެސް ގެމްބިއާއަށް ވަޑައިގަތުމަށް ވަނީ ހަމަޖެހިފައެވެ. މިވަފުދުގެ ވެރިޔަކަށް ހުންނަވަނީ ނައިޖީރިއާގެ ރައީސް މުހަންމަދު ބުހާރީއެވެ. މިދިޔަ ޑިސެމްބަރުމަހުގެ 1 ވަނަ ދުވަހު ގެމްބިއާގައި ބޭއްވި ރިޔާސީ އިންތިޚާބުގެ ނަތީޖާ ގަބޫލު ކުރެއްވުމަށް ރައީސް ޔަހްޔާ ޖަމްމޭހު ވަނީ ދެކޮޅު ހައްދަވާފައެެވެ.