ގޮވާތަކެތި ހުރި ލޮރީއަކާއި ވޭނެއް ކޮޅުނބަށް އެތެރެވެއްޖެ ކަމުގެ އިންޒާރާ އެކު ލަންކާ އެލާޓަށް!
ލަންކާ ފުލުހުންނަށް ޙޯދަން ބޭނުންވާ ވެހިކަލްތަކުގެ މައުލޫމާތު އިނގޭ
ލަންކާގައި ދިން ބޮމުގެ ހަމަލާތަކުގައި ގެއްލުންވި ޝަންގްރީލާ ހޮޓެލް
ގޮވާތަކެތިން ފުރާލާފައި ހުރި ލޮރީއަކާއި ވޭނެއް ލަންކާގެ ވެރިރަށް ކޮޅަނބަށް އެތެރެވެއްޖެ ކަމުގެ އިންޒާރު ލަންކާގެ ފުލުހުންނަށް ލިބުމާ އެ އުޅަނދުތައް ހޯދުމުގެ މަސައްކަތް އެ އަވަށުގެ ފުލުހުން ފަށައިފިއެވެ.
ފުލުހުންގެ ތަރުޖަމާނު ވިދާޅުވީ ގޮވުމުގެ ހާދިސާއާ ގުޅުން ހުރި ކަމަށް ޝައްކުކުރެވޭ އުޅަނދުތަކެއް ހޯދުމަށް ހުރިހާ ފުލުހުންގެ މަރުކަޒުތަކަކަށް މިހާރު އަންގާފައިވާނެ ކަމަށެވެ. އަދި މި އުޅަނދުތަކުގެ ތެރޭގައި ހިމެނެނީ ތިން ސައިކަލަކާއި، ކާރަކާއި ވޭނެއް ކަމަށް ވެސް ތަރުޖަމާނު ވިދާޅުވިއެވެ. ހުރިހާ ވެހިކަލެއްގެ ރަޖިސްޓްރޭޝަން ނަމްބަރުތައް ވެސް ފޯރުކޮށްދީފައިވާނެ ކަމަށް އޭނާ ވިިދާޅުވިއެވެ.
އާދިއްތަ ދުވަހު ލަންކާގައި ދިން ޖާނުން ފިދާވުމުގެ ބޮމުގެ ހަމަލާތަކާ ގުޅިގެން މިހާރު ފުލުހުންގެ ބެލުމުގެ ދަށަށް 40 މީހަކު ގެނެވިފައިވާ އިރު، ހަމަލާ ދިނީ ލަންކާގައި ހަރަކާތްތެރިވާ ހަރުކަށި ފިކުރުގެ މަދު ބަޔަކު ވެގެން ކަމަށް އެ ގައުމުގެ ފުލުހުން ވަނީ ބުނެފައެވެ. މި ހަމަލާތަކުގައި މަރުވި މީހުންގެ އަދަދު 310 އަށް އަރާފައިވާ އިރު، މުޅި ލަންކާ އަދިވެސް އޮތީ ބޮޑު ޝޮކެއްގައެވެ. އެ ގައުމުގެ ސްކޫލްތައް ދެން ހުޅުވޭނީ އަންނަ ހޯމަ ދުވަހުގައެވެ.
