ހދ. ނޮޅިވަރަންފަރުގައި 60 ހައުސިންގް ޔުނިޓް އެޅުމުގެ މަޝްރޫއުގައި ސޮއިކޮށްފި
މަޝްރޫގެ އަގަކީ 27.88 މިލިއަން ރުފިޔާ
ނޮޅިވަރަންފަރު ހައުސިންގ ޔުނިޓް މަޝްރޫގައި ސޮއިކުރުން
ހދ. ނޮޅިވަރަންފަރުގައި 60 ހައުސިންގް ޔުނިޓް އެޅުމުގެ މަޝްރޫއުގައި ހައުސިންގް މިނިސްޓްރީ އާއި، ސްވިފްޓް އިންޖިނިޔަރިންގ އަދި މާރސް ކޮންސްޓްރަކްޝަނާ ދެމެދު އެއްބަސްވުމެއްގައި ސޮއިކޮށްފިއެވެ.
އަންގާރަ ދުވަހު މިނިސްޓްރީގައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ ހައުސިންގ މިނިސްޓްރީގެ ޑެޕިއުޓީ މިނިސްޓަރ މުހައްމަދު ޚާލިސް ޝަރީފެވެ. މި އެގްރީމަންޓުގެ ދަށުން 2011 ވަނަ އަހަރުގެ ފެބްރުއަރީ މަހު ހދ. ފަރިދޫ، ކުނބުރުދޫ އަދި މާބައިދޫ އިން ނޮޅިވަރަންފަރަށް ބަދަލު ކުރި 181 އާއިލާއެއްގެ ތެރެއިން ބޯހިޔާވަހިކަން ނުލިބިވާ 53 އާއިލާއަށް ކުރިއަށް އޮތް 1 އަހަރުގެ ތެރޭގައި ބޯހިޔާވަހިކަން ފޯރުކޮށްދިނުމަށް ވަނީ އެއްބަސްވެވިފައެވެ. އެގޮތުން މި އެއްބަސްވުމުގެ އަގަކީ 27.88 މިލިއަން ރުފިޔާއެވެ.
މި އެއްބަސްވުމާ ގުޅޭ ގޮތުން މީޑިއާއަށް މައުލޫމާތު ދެއްވަމުން ހައުސިންގ މިނިސްޓަރ އާމިނަތު އާތިފާ ވިދާޅުވީ، މި މަޝްރޫއަކީ މީގެ ހަތް އަހަރު ކުރީގެ މަޝްރޫއެއް ކަމަށާއި، މި މަޝްރޫއު އެހާ ގިނަ ދުވަސްތަކެއް ވަންދެން ފަސްކުރެވިފައި އޮތީ އިޖުތިމާއީ ގޮތުން އާއިލާތަކަށް ބަލަން ޖެހޭ ވަރަށް ސަރުކާރުން ނުބެލުމުގެ ސަބަބުން ކަމަށެވެ. އެގޮތުން ހިިއުމަން ރައިޓްސް ކޮމިޝަނުން ވެސް މި މަޝްރޫއު އޭރުގެ ސަރުކާރުގެ ސަމާލުކަމަށް ގެނަ ކަމަށާއި އެކަމަށް އޭރު ސަރުކާރުން އެކަށީގެންވާ އަޅާލުމެއް ދީފައިނުވާ ކަމަށް ވެސް މިނިސްޓަރ ވިދާޅުވިއެވެ.
"މި މަޝްރޫއަކީ މީގެ ގާތްގަނޑަކަށް ހަތް އަހަރު ކުރިން ފަށައިގަނެ އެހެން ނަމަވެސް ދޫކޮށްލެވިފައި އޮތް މަޝްރޫއެއް، އަޅުގަނޑުމެން މި ސަރުކާރާ ހަވާލުވި އިރުގަ މި މަޝްރޫގެ ދަށުން ބަދަލުކުރެވިފައި ތިބި މި ދެންނެވި 53 އާއިލާއަކީ އެއްވެސް ކަހަލަ ގޯތިގެދޮރެއް އަޅުގަނޑުމެންނަށް ނުދެވި 7 އަހަރަށް ވުރެ ގިނަ ދުވަހު ނޮޮޅިވަރަންފަރުގައާ އަދި ރާއްޖޭގެ އެތަން މިތާނގައި ދިރިއުޅެމުން ދިޔަ އާއިލާތަކެއް،" މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، އޭގެ އިތުރުން ވެސް ރާއްޖޭގެ އެކި ހިސާބުތަކުގައި ފަށައި ނުނިމިވާ 1500 ހައުސިންގ ޔުނިޓް މަޝްރޫއުތަކެއްގެ ތެރެއިން ނުނިމި ހުރި މަޝްރޫއުތައް ނިންމުމަށް ދައުލަތުން 127.5 މިލިއަން ރުފިޔާގެ ޚަރަދު ކުރުމަށް ހަމަޖެހިފައިވާ ކަަމަށެވެ.
ނޮޅިވަރަންފަރަށް ދިމާވެފައިވާ ބޯހިޔާވަހިކަމުގެ ދަތިކަން ހައްލުކޮށްދިނުމަށް 60 ހައުސިން ޔުނިޓް އެޅުމުގެ މަސައްކަތް ބަޔަކާ ހަވާލުކޮށްފައިވާއިރު، އެކަން ކޮށްދެއްވާނެ ކަމަށް ރައީސް ސޯލިހު ރިޔާސީ އިންތިހާބުގެ ކެމްޕެއިންގައި ވަނީ ވައުދުވެވަޑައިގެންފައި ވެއެވެ.
