ވެލާނާ އެއާޕޯޓްގެ އާ ރަންވޭގައި ތާރު އެޅުމުގެ މަސައްކަތް ފަށައިފި

ވެލާނާ އިންޓަނޭޝަނަލް އެއާޕޯޓްގެ އާ ރަންވޭގައި ތާރު އެންމެ ފަހުގެ ތައްޔާރީތައް މިހާރު ވާން ފަށާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.

އެމްއޭސީއެލްގެ ރަސްމީ ޓްވިޓާ އެކައުންޓުން ކުރި ޓްވީޓެއްގައި ބުނެފައި ވަނީ އާ ރަންވޭގައި ތާރު އެޅުމުގެ ކުރިން ސިމެންތި އަޅަން ފަށާފައިވާ ކަމަށެވެ. އެގޮތުން އާ ރަންވޭގައި ތާރު އެޅުމުގެ ކުރިން އަޅާ ސިމެންތީ 200 މިލިމީޓަރުގެ ބޯމިން ހުންނާނެ ކަމަށް އެ ޓުވިޓްގައި ބުނެފައިވެއެވެ.

ވެލާނާ އެއާޕޯޓްގެއާ ރަންވޭގެ ތާރު އެޅުމުގެ މަސައްކަތަށް އެމްއޭސީއެލް އިން ތައްޔާރުވަމުންދާއިރު ވެލާނާގެ އެއާޕޯޓް ތަރައްގީ ކުރުމުގެ މަޝްރޫޢު ކުރިއަށްދާ ގޮތް ބައިނައްލަޢުވާމީ ވައިގެ ދަތުރުފަތުރާ ބެހޭ ޖަމްއީއްޔާއެއް ކަމަށްވާ އިންޓަނޭޝަނަލް އެއާ ޓްރާންސްޕޯޓް އެސޯސިއޭޝަން (އަޔާޓާ) އިން ވަނީ ބަލާފައެވެ.

އެގޮތުން އެޔާޓާގެ ޓީމެއް މޭމަހުގެ 30 ވަނަ ދުވަހު ވަނީ ވެލާނާ އެއާޕޯޓަށް ޒިޔާރަތްކޮށްފައެވެ.

ވެލާނާ އިންޓަނޭޝަނަލް އެއާޕޯޓުގައި، އަޅާ އާ ރަންވޭގެ އަމަލީ މަސައްކަތް ރައީސް އަބްދުﷲ ޔާމީން ފައްޓަވައި ދެއްވާފައި ވަނީ މިއަހަރުގެ ފެބްރުއަރީ މަހުގެ 27 ވަނަ ދުވަހުއެވެ.

ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާ ޙަވާލުކޮށްގެން އަޅާ މި ރަންވޭއަކީ 3،400 މީޓަރު ދިގު އަދި 60 މީޓަރު ފުޅާ އާ ރަންވޭއެކެވެ.

ވެލާނާ އިންޓަނޭޝަނަލް އެއާޕޯޓުގެ އާ ރަންވޭގެ މަޝްރޫޢު އެކުލަވާލާފައިވަނީ އެންމެ ބޮޑެތި މަތިންދާބޯޓު ކަމަށްވާ އެއާބަސް އޭ 380 މަރުކާގެ ބޯޓު ވެސް ޖެއްސޭ ގޮތަށެވެ.

އާ ރަންވޭ ހެދުމުގެ އިތުރަށް މި މަޝްރޫއުގައި 45 މިލިއަން ލީޓަރުގެ ތެޔޮ ރައްކާކުރެވޭ ފިއުލް ފާމެއް ހެދުމާއި 120،000 ޓަނުގެ މުދާ ގުދަންކުރެވޭ ވަރުގެ ތަނެއް ހަދާނެ އެވެ.