ފުލުހުންގެ ސީރިއަސް ކްރައިމް ޔުނިޓްގެ އިސް ދެ ވެރިޔަކު ކުއްލި ގޮތަކަށް އެހެން ޔުނިޓްތަކަށް ބަދަލުކޮށްފި
25 އެޕްރީލު 2017 | އަންގާރަ 18:13ރިޔާޒާއި ސަތީހަކީ ބޮޑެތި މައްސަލަތައް ތަހުގީގު ކުރަމުންދިޔަ ދެ އޮފިސަރުން
ފުލުުންގެ އިސް ދެ އޮފިސަރުން ކަމަށްވާ ރިޔާޒާއި ސަތީހު
މޯލްޑިވްސް ޕޮލިސް ސާރވިސްގެ ކްރައިމް އިންވެސްޓިގޭޝަން ކޮމާންޑްގެ އިސް ދެ ވެރިޔަކު ކުއްލި ގޮތަކަށް އެކި ޔުނިޓްތަކަށް ބަދަލުކޮށްފި އެވެ.
"ރާއްޖެއެމްވީ" އެނގިފައިވާ ގޮތުގައި އެހެން ޑިޕާޓްމަންޓް ތަކަށް ބަދަލު ކުރީ ފުލުހުންގެ ކްރައިމް އިންވެސްޓިގޭޝަން ކޮމާންޑުގެ ޑެޕިއުޓީ ހެޑް ޗީފް ސްޕްރިންޓެންޑެންޓް މުހައްމަދު ރިޔާޒާއި ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ހެޑް ސްޕްރިންޓެންޑެންޓް އަބްދުﷲ ސަތީހު އެވެ.
އެނގިފައިވަ ގޮތުގައި ރިޔާޒު ބަދަލުކޮށްފައިވަނީ ކޮމިޝަނަރުގެ ބިއުރޯގަ އެވެ. ސަތީހު ބަދަލުކޮށްފައިވަނީ ފުލުހުންގެ އެކަޑަމީ އަށެވެ. މިބަދަލުތައް ގެނެސްފައިވަނީ އަންގާރަ ދުވަހު އެވެ.
މިކަމާ ގުޅިގެން ފުލުހުންގެ މީޑިއާއިން ބުނީ ފުލުހުންގެ އެތެރޭގައި ގެންނަ އެފަދަ ބަދަލުތަކާއި ގުޅޭގޮތުން މީޑިއާއަށް ހިއްސާ ނުކުރާ ކަމަށެވެ.
ރިޔަޒާއި ސަތީހު އަކީ ގިނަ ދުވަސްތަކެއް ވަންދެން ފުލުހުން ހިންގި ބޮޑެތި މައްސަލަތަކުގެ ތަހުގީގު ހިންގި ދެ ބޭފުޅުންނެވެ.
ރިޔާޒާއި ސަތީހުގެ ޑިޕާޓްމަންޓް ބަދަލުކުރި ދަނޑިވަޅަކީ، ސޯޝަލް މީޑީއާ އެކްޓިވިސްޓް އަދި ބްލޮގަރ ޔާމީން ރަޝީދު ވަނީ ވަރަށް އަނިޔާވެރި ގޮތަކަށް މަރާލުމާ ގުޅިގެން އެންމެ ސީރިއަސް ލެވެލްގައި މައްސަލަ ތަހުގީގު ކުރިއަށް ގެންދާ ކަމަށް ފުލުހުން ހާމަކޮށްފައިވާ ދަނޑިވަޅެއް ކަން ފާހަގަ ކުރެވެއެވެ. އަދި އެ މައްސަލަ މިހާރު ފުލުހުންދަނީ ވަކި ތަހުގީގު ޓީމެއް ނަގައިގެން ތަހުގީގު ކުރަމުންނެވެ.
މީގެއިތުރުން ފުލުހުން ދަނީ އިދިކޮޅު ސިޔާސީ ލީޑަރުންގެ މައްޗަށް ވެސް ގިނަ ތަހުގީގުތަކެއް ކުރަމުންނެވެ.
