މިނިވަން މުއައްސަސާތަކުގެ ޒިންމާ ހަރުދަނާ ކުރުމަށް ސަރުކާރުން ހުށަހެޅި ތިން ބިލް މަޖިލީހަށް ބަލައިގަނެ އިތުރަށް ދިރާސާކުރަން ބިލްތަކާއި ގުޅުން ހުރި ކޮމިޓީއަށް ފޮނުވައިފިއެވެ.

 ޒިންމާ ހަރުދަނާކުރުމުގެ ގޮތުން ގާނޫނަށް އިސްލާހު ގެންނަން ސަރުކާރުން ހުށަހަޅާފައިވާ ބިލްތަކުގެ ތަކުގެ ތެރެއިން އަންގާރަދުވަހުގެ ޖަލްސާގައި މަޖިލީހަށް ބަލައިގެންފައިވަނީ އިލެކްޝަންސް ކޮމިޝަނުގެ ގާނޫނު،އެންޓި ކޮރަޕްޝަން ކޮމިޝަނުގެ ގާނޫނުގެ އިތުރުން އޮޑިޓް ގާނޫނަށް އިސްލާހު ގެންނަން ހުށަހެޅި ބިލްތަކެވެ.

 ސަރުކާރުގެ ފަރާތުން މި ތިން ގާނޫނަށް އިސްލާހު ގެންނަން ހުށަހަޅާފައިވަނީ މުސްތަގިއްލު ކޮމިޝަންތަކާއި މުސްތަގިއްލު މަގާމްތައް އަދާކުރައްވާ ފަރާތްތައް ، އެ ފަރާތްތަކުގެ މަސްއޫލިއްޔަތުތަކާއި ވާޖިބުތައް މިނިވަންކަމާއެކު ހިންގޭނެ އުސޫލްތައް ފަހިކޮށްދިނުމުގެ ގޮތުން، އެކަމާއި ގުޅުން ހުރި ގާނޫނުތަކަށް އިސްލާހު ގެންނަންޖެހޭތީ،އެ އުސޫލްގެ ދަށުންނެވެ. މިއީ ސަރުކާރުގެ 100 ދުވަހުގެ ވައުދުގެ ތެރޭގައި ހިމެނޭ ކަމެކެވެ.

މި ގާނޫނުތަކަށް ގެނެވޭ އިސްލާހުގެ ސަބަބުން މިނިވަން ކަމާއެކު ހިންގަންޖެހޭ ކޮމިޝަންތައް އެއްވެސް ފަރާތަކަށް ޖެހިލުންވުމެއް ނެތި، ވަކި ފަރާތަކަށް ބުރަނުވެ، ވަކި ފަރާތަކަށް މަންފާއެއް ހޯދައިދިނުމެއް ނެތި، ތައައްސުބުން އެއްކިބާވެ ހުރެ މިނިވަންކަމާ އެކުގައި ހިންގޭނެއެވެ.

މީގެ އިތުރުން އަންގާރަ ދުވަހުގެ ޖަލްސާގައި ވަނީ މާލިއްޔަތު ކޮމިޓީން ދިރާސާކޮށްފައިވާ 20 އޮޑިޓް ރިޕޯޓެއް ފާސްކޮށްފައެވެ.