ލަންކާގެ ބޮމުގެ ހަމަލާތައް: މަރުވި މީހުންގެ އަދަދު 290 އަށް އަރައިފި
22 އެޕްރީލު 2019 | ހޯމަ 04:56ފުރަތަމަ ގޮވުމުގެ ވާހަކަ ރިޕޯޓް ކުރެވިފައިވަނީ އެ ގައުމުގެ ގަޑިން ހެނދުނު 08:45 ހާއިރު
މިއީ ދާޚިލީ ހަމަނުޖެހުން 2009 ވަނަ އަހަރު ނިމުނު ފަހުން އެ ގައުމުގައި ދެވުނު އެންމެ ނުރައްކާތެރި ހަމަލާ
ސްރީލަންކާގައި އާދީއްތަ ދުވަހު ދިން ސިލްސިލާ ބޮމުގެ ހަމަލާތަކުގައި މަރުވި މީހުންގެ އަދަދު 290 އަށް އަރާފައިވާ ކަމަށް ބީބީސީން ރިޕޯޓް ކޮށްފިއެވެ.
މިހާތަނަށް 24މީހަކު ހައްޔަރު ކޮށްފައިވާ ކަމަށް ފުލުހުން ބުނެފައިވާއިރު ހަމަލާދިނި ކޮންބައެއްކަން ސަރުކާރަށް ހޯދިފައެއް ނުވެއެވެ. ޒަޚަމްވެފައިވާ މީހުންގެ އަދަދު 500 އަށް އަރާއިރު މަރުވި މީހުގެ ތެރޭގައި ބޭރު ގައުމުތަކުގެ މީހުންވެސް ހިމެނެއެވެ. ލަންކާގައި ހިނގަމުންދިޔަ ދާޚިލީ ހަމަނުޖެހުން 2009 ވަނަ އަހަރު ނިމުނު ފަހުން އެ ގައުމުގައި ދެވުނު އެންމެ ނުރައްކާތެރި ހަމަލާއަށް ފަހު ގައުމު އޮތީ ކުއްލި ސިހުމެއްގައެވެ.
ދޮގު މައުލޫމާތު ފެތުރުން ހުއްޓުވުމަށްޓަކައި ސޯޝަލް މީޑިއާގެ އެކި ނެޓްވަރކްތައް ބްލޮކް ކުރެވިފައިވާ ކަމުގެ ރިޕޯޓްތައްވެސް ފެތުރެމުންދެއެވެ.
މެސެޖް ފޮނުވުމުގައި މަގްބޫލު އެޕްލިކޭޝަންތައް ކަމަށްވާ ވަޓްސްއެޕް އަދި ފޭސްބުކް ފަދަ ވަސީލަތްތަކުގެ ޚިދުމަތް އެތައް ބަޔަކަށް ނުލިބޭ ކަމަށްވެއެވެ.
ހަމަލާތައް ދެވުނީ ކިހިނެއް؟
ފުރަތަމަ ގޮވުމުގެ ވާހަކަ ރިޕޯޓް ކުރެވިފައިވަނީ އެ ގައުމުގެ ގަޑިން ހެނދުނު 08:45 ހާއިރު ކަމަަށްވާއިރު ކުޑަ ވަގުތު ކޮޅެއްގެ ތެރޭގައި ހަ ތަނަކަށް ހަމަލާ ދިންކަމަށް ރިޕޯޓް ކުރެވުނެވެ.
ނިގަމްބޯއާއި،ބައްޓިކަލޯއާ އަދި ކޮލަމްބޯގެ ކޮއްޗިކަޑެ ޑިސްޓްރިކްޓުން ޗަރޗްތަކަކީ އީސާއީ ދީނުގެ އީދެއް ކަމަށްވާ އީސްޓަރ ފާހަގަކުރަމުން ދަނިކޮށް ހަމަލާ އަމާޒުވި ތަންތަނެވެ. މީގެ އިތުރުން އެ ވަގުތުގައި ދިން ހަމަލާތައް ދެން އަމާޒުވެފައިވަނީ ވެރިރަށް ކޮލަމްބޯގައި ހުންނަ ޝަންގްރީލާ އާއި ކިންގްސްބަރީ އާއި ސިނަމަން ހޮޓަލަށެވެ.
މި ހަމަލާތައް ދިން މީހުން ހޯދުމުގެ މަސައްކަތް ފުލުހުން ކުރަމުން ދަނިކޮށް އިތުރު ދެ ތަނެއްގައި އެއްޗެއް ގޮއްވާލިކަމުގެ ރިޕޯޓް ލިބިފައިވެއެވެ.
އޭގެ ތެރެއިން އެއް ހަމަލާ ދީފައިވަނީ ދެހިވަލާގެ ޒޫ ކައިރީގައި ކަމަށްވާއިރު އަށްވަނަ ހަމަލާ ދީފައިވަނީ ދެމަޓަގޮޑާގައި ފުލުހުންގެ ރެއިޑް ކުރިޔަށް ގެންދަނިކޮށެވެ. މި ހަމަލާގައި ފުލުހުންގެ ތިން މީހަކު މަރުވިއެވެ.
ބޮން ގޮއްވުމުގެ އިތުރުން ގައުމުގެ މައި އެއަރޕޯޓް ކަމަށްވާ ބަންޑާރަނައިކެ އިންޓަރނޭޝަނަލް އެއަރޕޯޓްގެ ކައިރިން އިމްޕްރޮވައިޒްޑް އެކްސްޕްލޯސިވް ޑިވައިސްއެއް ފެނިފައިވާކަމަށް އާދީއްތަ ދުވަހުގެ ރޭ އެ ގައުމުގެ ވައިގެ ސިފައިންވަނީ ހާމަކޮށްފައެވެ.
" ގޮވާތަކެތި އަޅާފައި އޮތް ހަ ފޫޓުގެ ޕީވީސީ ހޮޅިއެއްވަނީ ފެނިފައި" ތަރުޖަމާނު ގިހާން ސެނެވިރަތުނެ އެ ގައުމުގެ މީޑިއާތަކަށް ވިދާޅުވެފައިއެވެ.
ހަމަލާ ދިން މީހުންނާ ބެހޭގޮތުން އެނގެނީ ކޮންކަމެއް؟
ހަމަަލާދީފައިވަނީ ކޮންބައެއްކަން އަދި މިހާތަނަށް ސާފުވެފައި ނުވިނަމަވެސް ފުލުހުންވަނީ 24 މީހަކު ހައްޔަރުކޮށްފައެވެ.
ސަރުކާރުން ބުނެފައިވަނީ ބައެއް ތަންތަނުގައި ހަމަލާ ދީފައިވަނީ ޖާނުގޮއްވާލައިގެންކަމަށެވެ.
އާދީއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބޮޑުވަޒީރު ރަނިލް ވިކްރަމަސިންހަ ވަނީ މި ހަމަލާ ދިނުމުގެ ކުރިން މި ހަމަލާގެ އިންޓެލިޖެންސް މައުލޫމާތު ކުރިން ލިބިފައިވާކަމަށް ވިދާޅުވެފައެވެ.
"އަޅުގަނޑުމެން ބަލަން ޖެހޭނެ ކީއްވެކަން އެކަށީގެންވާ ފިޔަވަޅު ނޭޅި އޮތީ. އަޅުގަނޑާއި މިނިސްޓަރާ ދެ މީހުންކުރެ އެކަކަށްވެސް މައުލޫމާތު ފޯރުކޮށްދީފައެއް ނުވޭ"
"މިހާރު އިސްކަން ދެނީ ހަމަލާ ދިން މީހުން ހައްޔަރުކުރުމަށް" އެ މަނިކުފާނު ވިދާޅުވިއެވެ.
ޝިކާރައަކަށްވީ ކޮންބައެއް؟
މަރުވި މީހުންގެތެރޭގައި ގިނައީ ސްރީ ލަންކާގެ ރައްޔިތުންނެވެ މީގެ ތެރޭގައި އީސްޓަރ ސަންޑޭގެ އަޅުކަމަށް ފައްޅިތަކަށް ގޮސްތިބި މީހުން ގިނަ އަދަދަކަށް ހިމެނެއެވެ.
އެ ގައުމުގެ ފޮރިން މިނިސްޓްރީން ބުނެފައިވަނީ އެހެން ގައުމުތަކަށް 36 މީހަކު މަރުވެފައިވާ ކަމަށް ބެލެވިފައިވާ ކަމަށެވެ. ކޮލަމްބޯގެ މޯޗަރީގައި މީހުންގެ ހަށިތައް ބާއްވާފައިވާއިރު ބައެއް މީހުން ނިސްބަތްވަނީ ކޮން ގައުމަކަށް ކަން ދެނެގަނެވިފާ ނުވާ މީހުން ވެސް އެބަ ތިއްބެވެ.
ބޭރު ގައުމުތަކުގެ މީހުން
އިނގިރޭސި ވިލާތަށް ނިސްބަތްވާ ފަސް މީހަކު ހިމެނޭއިރު މީގެ ތެރެއިން ދެ މީހަކީ އެމެރިކާގެ ރަށްވެހިކަން ވެސް އޮންނަ ދެ މީހުންނެވެ.
ޑެންމާކުގެ ތިން މީހަކާއި ޕޯޗުގަލްގެ ރައްޔިތަކުވެސް ހިމެނޭކަމަށް ސްރީ ލަންކާގެ އޮފިޝަލުން ވިދާޅުވެއެވެ.
މީގެ އިތުރުން ތުރުކީގެ ދެ އިންޖިނޭރަކު ހިމެނޭކަމަށް ތުރުކީގެ އަނަދޮލޫ ނޫހުން ބުނެއެވެ.
ދެން ހިމެނެނީ ނެދަލޭންޑްގެ މީހަކާއި ޖަޕާނުގެ މީހެކެވެ.
