ލަންކާގައި ދިން ބޮމުގެ ހަމަލާ: ބޮންގޮއްވި މީހުން އުފުލި ވޭނު ފުލުހުންގެ ބެލުމުގެ ދަށަށް

ހޮނިހިރު ދުވަހު ލަންކާގައި ދިން ބޮމުގެ ހަމަލާގައި ޝާމިލްވާ ފަރާތްތައް ދެނެގަނެ، ބޮން ގޮއްވި މީހުން އުފުލަން ގެންގުޅުން ވޭނު ފުލުހުންގެ ބެލުމުގެ ދަށަށް ގެންގޮސްފިއެވެ.

ލަންކާގެ ފުލުހުން ނެރުނު ބަޔާނަކާ ހަވާލަދީ އެ ގައުމުގެ ނިއުސްފަސްޓް ނޫހުގައި ލިޔެފައި ވަނީ، ހަމަލާދިން ފަރާތްތައް އެއް ތަނުން އަނެއް ތަނަށް އުފުލައިދިން ވޭން ހިފަހައްޓާފައި ވަނީ ވެއްލަވައްތަ ސަރަހައްދުން ކަމަށެވެ. ވޭން ހިފެހެއްޓީ ވޭންގެ ޑްރައިވަރާ ވެސް އެކުގައި ކަމަށް ފުލުހުން ވަނީ ބުނެފައެވެ. ވެއްލަވައްތައަކީ ލަންކާގައި ދިރިއުޅޭ ގިނަ އަދަދެއްގެ ދިވެހިން ދިރިއުޅޭ ސަރައްދެކެވެ.

މީގެ އިތުރުން، ޕާނަދުރަ ނޯތު ޕޮލިސް ޑިވިޝަންގެ ބެލުމުގެ ދަށުގައި ހުންނަ ސަރަހައްދުގައި ހުންނަ ގެއަކާ ބެހޭ ތަފްސީލީ މައުލޫމާތު ވެސް ލިބިފައިވާ ކަމަށް ފުލުހުން ވަނީ ބުނެފައެވެ. މި ގެޔަކީ ހަމަލާދިން މީހުން ވަގުތީ ހިޔާވައްސެއްގެ ގޮތުގައި ބޭނުން ކުރި ތަނެއް ކަމަށާއި، ތަހުގީގުގައި މައުލޫމާތު ލިބުނު ވަރަކުން އާންމުންނާ ހަމައަށް އެ މައުލޫމާތު ގެނެސް ދޭން މަސައްކަތް ކުރާނެ ކަމަށް ވެސް ފުލުހުން ވަނީ ބުނެފައެވެ.

މިހާތަނަށް ލިބިފައިވާ މައުލޫމާތައް ބަލާއިރު، ޖުމްލަ 215 މީހަކު މަރުވެފައިވާ ކަމަށާއި، އޭގެ ތެރޭގައި ބޭރުގެ ގައުމުތަކަށް ނިސްބަތްވާ 35 މީހަކު ހިމެނެއެވެ. ހަމަލާތަކުގައި ޒަހަމްވީ 450 އަށް ވުރެ ގިނަ މީހުންނަށް މިހާރު ވެސް ހޮސްޕިޓަލުގައި ފަރުވާ ދެމުން ގެންދާ ކަމަށް ނެޝަނަލް ހޮސްޕިޓަލްސްގެ ތަރުޖަމާނު ވަނީ މީޑިއާތަކަށް މައުލޫމާތު ދީފައެވެ. މި ހަމަލާތަކުގައި ދިވެއްސަކަށް އެއްވެސް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައެއް ނުވެއެވެ.