2016ން ފެށިގެން ޔަމަން ހަނގުރާމައިގައި 70،000އަށް ވުރެ ގިނަ މީހުން މަރުވެފައިވޭ:އަކްލެޑު
20 އެޕްރީލު 2019 | ހޮނިހިރު 07:25ޔަމަން ހަނގުރާމައިގެ ތެރެއަށް ސައުދީ ވަދެފައިވަނީ 2015 ވަނަ އަހަރުގެ މާރިޗު މަހު
އެންމެ ގިނަ އާއްމުން މަރުވެފައިވަނީ ސައުދީ ކޯލިޝަންގެ ހަމަލާތަކުގައި
ޔަމަނުގެ ހަނގުރާމައިގައި 2016 ވަނަ އަހަރުގެ ޖެނުއަރީ މަހުން ފެށިގެން 70،000އަށް ވުރެ ގިނަ މީހުން މަރުވެފައިވާ ކަމަށް ހަނގުރާމައިގެ ތަފާސް ހިސާބުތައް ބަލަމުންދާ ގްރޫޕަކުން ބުނެފިއެވެ.
އާމްޑް ކޮންފްލިކްޓް އެންޑް ލޮކޭޝަން އިވެންޓް ޑޭޓާ ޕްރޮޖެކްޓް(އަކްލެޑް) ން ބުރާސްފަތި ދުވަހު އާއްމުކުރި އަދަދުތައް ދައްކާގޮތުން ވޭތުވެދިޔަ ފަސް މަސް ދުވަހު އެކަނި ވެސް 10،000 މީހުން މަރާލެވިފައިވެއެވެ.
"ހަތިޔާރު ބޭނުން ކޮށްގެން ހިންގާ ހަނގުރާމަ މުޅިގައުމުގައި އަދިވެސް ދަނީ ކުރިޔަށް އަދި ޚާއްސަކޮށް ތާއިޒްއާއި ހައްޖާ ފަދަ މައި ގަވަރނަރޭޓްސް ތަކުގައި" އެ ގްރޫޕުން ނެރެފައިވާ ބަޔާނުގައި ބުނެފައިވެއެވެ. ނަމަވެސް އދގެ އެހީއާއެކު ކުރިޔަށް ގެންދާ ސުލްހައިގެ ޕްރޮގްރާމްގެ ސަބަބުން މީހުން މަރުވާ ނިސްބަތް މި އަހަރު ދަށަަށްދާން ފަށާފައިވާ ކަމަށް އެ ގްރޫޕުން ބުނެފައިވެއެވެ.
ވަކިން ޚާއްސަކޮށް ޔަމަނުގެ ހުދައިދާގައި މީހުން މަރުވާ ނިސްބަތް ދަށްވެފައިވެއެވެ. ބައިނަލްއަޤްވާމީ މުޖުތަމައުއިން ޤަބޫލުކުރާ ޔަމަނުގެ ސަރުކާރާއި ހޫޘީ ހަނގުރާމަވެރިންނާ ދެމެދު ހަމަލާ ބަދަލުކުރުން ހުއްޓާލުމަށް މިދިޔަ ޑިސެމްބަރު މަހު ސްވިޑެންގެ ވެރިރަށް ސްޓޮކްހޯމްގައި ވަނީ އެއްބަސްވެފައެވެ.
ޔަމަނަށް އެތެރެކުރާ މުދަލުގެ 70 އިންސައްތަ އެ ގައުމަށް އެތެރެކުރާ މައި ބަނދަރު އޮންނަ ހުދައިދާއިން ފައުޖުތައް ބޭލުމަށް ވެސް ހަނގުރާމަ ކުރަމުންދާ ފަރާތްތަކުން ވަނީ އެއްބަސްވެފައެވެ. ނަމަވެސް އެ އެއްބަސްވުން ތަންފީޒު ނުވާތީ އދގެ ސަލާމަތީ މަޖިލީހުންވަނީ ކަންބޮޑުވުން ފާޅުކޮށް ބުދަ ދުވަހު ބަޔާނެއް ނެރެފައެވެ.
ސިފައިންނާއި ހަނގުރާމަ ކުރަމުންދާ ޖަމާއަތްތައް އެ ސިޓީން ބާލައި ނިންމުމަށް ކަނޑައަޅާފައި އޮތް މުއްދަތަކީ ޖެނުއަރީ މަހުގެ 7 ވަނަ ދުވަހެވެ. ނަމަވެސް ރެޑްސީގެ އެ ބަނދަރުގެ ކޮންޓްރޯލް ބާއްވާނީ ކޮންފަރާތެއްގެ އަތުގައި ތޯ ޚިލާފް އުފެދި އެކަން ވަނީ ނުކުރެވިއެވެ.
އަކްލެޑުން ބުނެފައިވާ ގޮތުގައި ސީދާ އާއްމުންނަށް އަމާޒުކުރެވިގެން ދިން 3،155 ހަމަލާއެއް އެ ޖަމާއަތަށް ފާހަގަ ކުރެވިފައިވާއިރު އެ ހަމަލާތަކުގައި މަރުވި މީހުންގެ އަދަދު 7،000 އަށް ވުރެ އިތުރުވާނެއެވެ.
އެންމެ ގިނަ އާއްމުން މަރުވެފައިވަނީ ސައުދީ އަރަބިއާ އިސްވެ އުފައްދާފައިވާ ކޯލިޝަނުން ދީފައިވާ ހަމަލާތަކުގައި ކަމަށްވާއިރު އެ ގްރޫޕުން ބުނެފައިވާ ގޮތުގައި 2016 ވަނަ އަހަރުން ފެށިގެން އެ ކޯލިޝަންގެ ހަމަލާތަކުގައި 4،800 އަށް ވުރެ ގިނަ މީހުން މަރުވެފައިވެއެވެ.
އެ މުއްދަތުގައި ހޫޘީންގެ ސީދާ ހަމަލާތަކުގައި މަރުވި މީހުންގެ އަދަދު 1،300 އަށް އަރާކަމަށް އެ އަކްލެޑުން ބުނެއެވެ.
