ހައްދުފަހަނައަޅާ ދިއުމާ ދެކޮޅަށް ކުރެވޭ ހަނގުރާމައިގައި މުސްލިމުން އިސްނެގުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވައިފިއެވެ.

ޓްރަމްޕް މިހެން ގޮވާލެއްވީ އާދީއްތަ ދުވަހު ހަވީރު ސަޢޫދީ ޢަރަބިއްޔާގެ ރިޔާޒުގައި ފެށި "ޢަރަބް އިސްލާމިކް އެމެރިކަން ސަމިޓް" ގައި ތަގުރީރު ކުރައްވަމުންނެވެ.

"އެމީހުން މި ބިމުން ނެރެ ފައްސާލާ" ސަރަހައްދުގެ ލީޑަރުންނަށް ޓްރަމްޕް ގޮވާލެއްވިއެވެ.

ވެރިކަމަށް ވަޑައިގެންނެވިތާ ހަތް ދުވަހުގެ ތެރޭގައި މުސްލިމުން އެމެރިކާއަށް އެރުން މަނާކުރެއްވުމުގެ އަމުރު ނެރުއްވި ޓްރަމްޕް މި ސަމިޓްގައި ތަޤުރީރު ކުރައްވާފައިވަނީ" ހައްދު ފަހަނައެޅުމާ" ބެހޭ ގޮތުންނެވެ.

ޓްރަމްޕްގެ ތަގްރީރު ފާހަގަކުރެވިގެންދިޔައީ ކެމްޕެއިން ދުވަސްވަރު މުސްލިމުންނަށް އިހާނެތި ބަސްތަކެއް ވިދާޅުވެ މުސްލިމް ގައުމުތަކުންލިބިފައިވާ ނަފްރަތު ކަނޑުވާލުމަށްދެއްވި ތަގުރީރެއް ގޮތުގައެވެ. ނަމަވެސް މި ތަގުރީރުގައި ޓްރަމްޕް ވިދާޅުވީ އެތަނަށް ވަޑައިގެން ހުންނެވީ އެމެރިކާގެ ދިރިއުޅުމުގެ އުސޫލުތައް ތަންފީޒުކުރުމަށް ލެކްޗަރުދެއްވަން ނޫންކަމަށާއި"މިއީ އާ ބާބެއް"ކަމަށެވެ

ހައްދު ފަހަނަ އެޅުމާ ދެކޮޅަށް ހަނގުރާމަ ކުރުމަކީ ވަކި އަގީދާއަކާ ދެކޮޅަށް ހަނގުރާމަ ކުރުން ނޫންކަމަށާއި އެއީ ހައްގާއި ބާތިލާ ދެމެދު ކުރެވޭ ހަނގުރާމައެއް ކަމަށް ޓްރަމްޕް ވިދާޅުވިއެވެ.

"އުޖާލާ މުސްތަގުބަލެއް އޮތީ ތިބޭފުޅުން ޓެރެރިސްޓުންނާއި ހައްދުފަހަނައަޅާފައިވާ ފަރާތްތައް ބޭރުކޮށްފިނަމަ" ޓްރަމްޕް ވިދާޅުވި އެވެ.

ނަމަވެސް ޓްރަމްޕްވަނީ އެމެރިކާއިން އައިސް ޓެރެރިސްޓުންނާ ދެކޮޅަށް ބާރުގެ ބޭނުން ކުރަންދެން އެ ގައުމުތަކަށް ތިބެވެން ނެތްކަމަށާއި އެ ގައުމުތަކުން އެ ގައުމުތަކަށް ދަތިވާ ކަންކަން ހައްލުކުރަން ޖެހޭނެ ކަމަށް އެ މަނިކުފާނު ވިދާޅުވެފައެވެ.

ސައުދީއާއެކު އެތައް ބިލިއަން ޑޮލަރެއްގެ ވިޔަފާރީގެ އެއްބަސްވުންތައްވި ދަތުރުފުޅުގައި ދެއްވި މި ތަގުރީރުގައި ޓްރަމްޕްވަނީ ސަރައްހައްދުގެ ހަމަނުޖެހުންތަކުގެ ތުހުމަތު ސައުދީއާ ވާދަވެރި އީރާނުގެ މައްޗަށް ކުރައްވާފައެވެ.އަދި ސީރިޔާގެ ރައީސް ބަޝާރުލް އަސަދުގެ ސަރުކާރުން ހިންގާ ޖަރީމާތަކަށް އިރާނުން ވާގިވެރިވާކަމަށް ތުހުމަތުކޮށްފައެވެ.

އެމެރިކާގެ ރައީސް ޑޮނަލްޑް ޓްރަމްޕް ވެރިކަމާ ހަވާލުވެ ވަޑައިގެންނެވުމަށްފަހު ގައުމުން ބޭރަށް ކުރައްވާ ފުރަތަމަ ދަތުރުފުޅުގައި އަރަބި އަދި އިސްލާމީ ގައުމުތަކުގެ 55 ގައުމެއްގެ ވެރިން ބައިވެރިވެ ވަޑައިގެންނެވި ސަމިޓްގައި ޓްރަމްޕް ވިދާޅުވީ"ދީނީ ލީޑަރުން އެބަ ޖެހިވަޑައިގަންނަވާ މިކަން ސާފުކޮށްދެއްވަން: ނުބައި ނުލަފާ ވުމަކުން އުޖާލާކަމެއް ނުގެނެވޭނެ-އަދި ޝައިތާނަށް ތަބާވުމަކުން ލިބޭނެ ގަދަރެއް ނޯންނާނެ" ކަމަށެވެ.

ޓްރަމްޕްވަނީ ޓެރެރިސްޓް ޖަމާއަތްތަކަށް މާލީ އެހީލިބޭ މަގު ބަންދުކުރުމަށްޓަކައި ތެޔޮވިއްކޭ މަގު ބަންދު ކުރަން ޖެހޭ ކަމަށްވެސް ވިދާޅުވެފައެވެ.

ދަތުރުގެ ބާކީބައިގެ އެޖެންޑާ

ރައީސް ޓްރަމްޕްގެ އަށް ދުވަހުގެ މި ދަތުރުފުޅުގައި އިސްރާއީލާއި، ފަލަސްތީނާއި،ބްރަސަލްސް،ވެޓިކަން އަދި ސިސިލީއަށް ވަޑައިގަންނަވާނެއެވެ.

އެމެރިކާގެ އެތެރޭގެ ސިޔާސީ ކަންކަން ހުރިގޮތުން މި ދަތުރުފުޅަށްވަނީ ހިޔަނިއެޅިފައެވެ. އެންމެ ބޮޑުކަމަކަށް ފާހަގަވަނީ އެފްބީއައިގެ ޑިރެކްޓަރކަމުގެ މަގާމުން ޖޭމްސް ކޯމީ ވަކިކުރެއްވި މައްސަލައިގައި ކުރިމަތިވެ ވަޑައިގަންނަވާ ކަންކަމެވެ.

* ހޯމަ-އަންގާރަ22-23 މެއި:ތެލްއަވީވް އަދި ގުދުސްއަށް ޒިޔާރަތްކުރައްވައި އަންގާރަ ދުވަހު ހުޅަނގު އައްސޭރިއަށް ވަޑައިގަތުން

* ބުދަދުވަސް 24 މެއި: ރޯމް އަދި ބްރަސަލްސްއަށް ވަޑައިގެން ކްރިސްޓިއަނުންގެ އިސް ފާދިރީއާ ބައްދަލުކުރެއްވުމަށްފަހު ބެލްޖިއަމްގެ އޮފިޝަލުންނާ ބައްދަލުކުރައްވާވެ

*ބުރާސްފަތި 25 މެއި: ބްރަސަލްސްގައި ބާއްވާ ނޭޓޯ ސަމިޓް

* ހުކުރު 26 މެއި ސިސިލީގައި ބާއްވާ ޖީ 7ގެ މެމްބަރުންގެ ބައްދަލުވުން