އަލްޖީރިޔާގެ އާންމުން އަނެއްކާވެސް މަގުތަކަށް މުޒާހަރާއަށް ނިކުމެއްޖެ
19 އެޕްރީލު 2019 | ހުކުރު 15:57ވެރިކަމުގައި ތިއްބެވީ ހަމަ ކުރިންވެސް ތިއްބެވި ބޭފުޅުން ކަމަށް ބުނެ މުޒާހަރާކުރާ ފަރާތްތަކުން ހިތްހަމަނުޖެހުން ފާޅުކޮށްފައިވޭ
އަލްޖީރިޔާގެ ވެރިރަށް އަލްޖިއަރޒްގައި ކުރި މުޒާހަރާއެއްގެ ތެރެއިން
ބޫތެފްލިކާގެ އިސްތިއުފާއަކުން ނުފުދޭ ކަމަށާއި މިހާރު ގައުމުގެ އިސް މަގާމުތަކުގައި ތިއްބެވި ހުރިހާ ބޭފުޅުންގެ އިސްތިއުފާއަށް ގޮވާލާ އަނެއްކާވެސް އަލްޖީރިޔާގެ މަގުތަކަށް ގިނަ އަދަދެއްގެ އާންމުން މުޒާހަރާ ކުރަން ނުކުމެއްޖެއެވެ.
ހުކުރު ދުވަހު މުޒާހަރާ ކުރަން މަގުތަކަށް ނުކުތް މީހުން ވަނީ މިހާރު ވަގުތީ ރައީސް ކަމުގެ މަގާމުގައި ހުންނެވި ގާނޫނުހަދާ މަޖިލީހުގެ މަތި ގޭގެ ރައީސް އަބްދުލްކާދެރް ބެންސަލާހާއި ވަގުތީ ބޮޑުވަޒީރު ނޫރައްދީން ބަދަވީ އާއި ވެރިކަން ކުރާ ނެޝަނަލް ލިބަރޭޝަން ފްރަންޓް (އެފްއެލްއެން)ގެ ލީޑަރު މުއާދް ބޫޝާރެބްގެ އިސްތިއުފާއަށް ގޮވާލާފައެވެ. މުޒާހަރާ ކުރާ ފަރާތްތަކުން ބޭނުން ވަނީ އިސް މަގާމުތަކުގައި ތިއްބެވި ބޭފުޅުން އިސްތިއުފާ ދެއްވުމަށް ފަހު ގައުމު ޑިމޮކްރެޓިކް އުސޫލުތަކުގެ މަތިން ހިންގަން މަގު ފަހިކޮށް ދިނުމެވެ.
އެ ގައުމުގެ ގާނޫނު ހަދާ މަޖިލީހުން މި އަހަރުގެ ޖުލައި މަހުގެ ހަތަރު ވަނަ ދުވަހު އިންތިހާބެއް ބާއްވަނެކަން ވަނީ އިއުލާން ކޮށްފައެވެ. އަދި މި ނިންމުމަކީ އެ ގައުމުގެ ނުފޫޒުގަދަ އަސްކަރިއްޔާއިން ބަލައިގަނެފައިވާ ނިންމުމެކެވެ. އަންގާރަ ދުވަހު ނޫސްތަކަށް ދެއްވި އިންޓަވިއުއެއްގައި އަލްޖީރިޔާގެ އަސްކަރިއްޔާގެ ވެރިޔާ ލެފްޓިނެންޓް ޖެނެރަލް ގޭދް ސަލާހް ވިދާޅުވީ މިހާރު ދިމާވެފައިވާ ސިޔާސީ މައްސަލަތަކަށް ހައްލެއް ގެންނަން ކުރަންޖެހޭ ކޮންމެ ކަމެއް ކުރަން އަސްކަރިއްޔާއިން ތައްޔާރަށް އޮތް ކަމަށެވެ. އަދި މައްސަލަތަކަށް ހައްލެއް ގެންނަން ވަގުތު ކުޑަތަން ވަމުންދާ ކަމަށް ވެސް ސަލާހް ވިދާޅުވިއެވެ.
އަލްޖީރީޔާގެ ކެނޑިނޭޅި ކުރަމުން ދިޔަ މުޒާހަރާތަކާއި ގުޅިގެން ރައީސްގެ މަގާމުން އިސްތިއުފާދެއްވި ބޫތެފްލިކާއަށް ފަހު ގައުމާ ހަވާލުވެވަޑައިގެންފައި ވަނީ، 1962 ވަނަ އަހަރުގައި ފަރަންސޭސްވިލާތުން މިނިވަންވުމަށް ކުރި ހަނގުރާމައިގައި ކާމިޔާބީ ހޯދި އިރު އަސްކަރިއްޔާގެ އިސް ސަފުގައި ތިއްބެވި ބޭފުޅުންނެވެ. މުޒާހަރާކުރާ ފަރާތްތަކުގެ ނުރުހުން ހުއްޓަސް އަސްކަރިއްޔާގެ އެއްބާރުލުމާއި އެކުގައި ނޫނިއްޔާ އެބޭފުޅުން އިސްތިއުފާ ނުދެއްވާނެ ކަމަށެވެ. އަލްޖީރިޔާގެ އަސްކަރިއްޔާއަކީ ޒަމާނުއްސުރެން އެގައުމުގައި ސިޔާސީ އޮއިވަރު ދާނެ ދިމާލެއް ކަނޑައެޅުމުގައި ނުފޫޒު ބޭނުންކޮށްގެން މަސައްކަތް ކުރާ މުއައްސަސާއެކެވެ.
