ސިފައިންގެ ފޮޓޯ މައުރަޒު ހުޅުވައިފި
18 އެޕްރީލު 2019 | ބުރާސްފަތި 18:37މައުރަޒުގައި ދައްކުވައިދެނީ ސިފައިންގެ ހިދުމަތުގެ މަންޒަރުތައް
ޑިފެންސް މިނިސްޓަރ މާރިޔާ، ސިފައިންގެ ފޮޓޯ މައުރަޒު ބައްލަވާލައްވަނީ
ސިފައިންގެ 127 ވަނަ އަހަރީ ދުވަހުގެ މުނާސަބަތުގައި، ސިފައިންގެ ހިދުމަތުގެ މަންޒަރުތައް ދައްކުވައިދޭ ފޮޓޯ މައުރަޒެއް ހުޅުވައިފިއެވެ.
ބުރާސްފަތި ދުވަހު ރެހެންދި ސްކޫލްގައި ބޭއްވި ހަފުލާއެއްގައި މައުރަޒު ހުޅުވައިދެއްވީ މިނިސްޓަރ އޮފް ޑިފެންސް މާރިޔާ އަހްމަދު ދީދީއެވެ. މައުރަޒު ހުޅުވައިދެއްވުމަށް ފަހު މިނިސްޓަރ މާރިޔާ ވަނީ މައުރަޒުގެ ފޮޓޯތައް ބައްލަވާލަައްވާފައެވެ.
އެމްއެންޑީއެފް މާލެ އޭރިއާ ކޮމާންޑުން ރާވައިގެން ހިންގާ މައުރަޒުގައި ދައްކުވައިދެނީ ސިފައިންގެ 127 އަހަރުވީ ދިގު ތާރީހުގައި ހިނގާފައިވާ ކަންކަމާއި ގުޅޭ މަންޒަރުތަކާއި ކުރެހުންތަކެވެ. އެގޮތުން ތިނެއް ނޮވެމްބަރު 1988ގައި ރާއްޖެއަށް ދިން އުދުވާނީ ހަމަލާގެ މަންޒަރުތަކާއި، ރައްޔިތުންގެ ފުރާނަޔާ މުދާ ސަލާމަތްކުރުމަށް އަދި ގުދުރަތީ އެކިއެކި ކާރިސާތަކުގައި ސިފައިން ކޮށްފައިވާ ބައެއް މަސައްކަތްތައް ދައްކުވައިދޭ ފޮޓޯތަކާއި، ސިފައިން އިޖުތިމާޢީ ގޮތުން ބައިވެރިވެފައިވާ ހަރަކާތަކުގެ އިތުރުން، ސިފައިންގެ ތާރީޚާއި އަދި ސިފައިންގެ ތަމްރީންތަކާއި ގުޅުންހުރި ގިނަ ފޮޓޯތަކާއި ކުރެހުންތައް މައުރަޒުގައި ދައްކާލާފައިވެއެވެ.
އޭޕްރިލް 18އިން 19އަށް ބާއްވާ މި މައުރަޒު ވަނީ އާންމުންނަށް ހުޅުވާލައިފަ އެވެ.
ދިވެހި ސިފައިންގެ ހިދުމަތަށް 127 އަހަރު ފުރުން ފާހަގަކުރަން ގިނަ ހަރަކާތްތަކެއް ރާވާފައިވާއިރު، ހުކުރު ދުވަހުގެ ހަވީރުގެ ވަގުތެއްގައި މާލޭގެ މަގުތަކުގައި ސިފައިންގެ ޝަރަފުގެ ހިނގާލުމެއް ބާއްވަން ވަނީ ހަމަޖެހިފައެވެ.
