ހުވަދު އަތޮޅަށް ޚާއްސަކޮށްގެން ސެމިނާއޮން ފައިބަރ ގުލާސް އެޕްލިކޭޝަން ބާއްވަނީ
ސެމިނާ އަމާޒުކޮށްފައި ވަނީ އޮޑިދޯނި ފަހަރުގެ ވެރިންނަށް
ގެރެންޓީ ފައިބަރ ގުލާސް ގެ ކޯޑިނޭޓަރ އަދުނާނު ޒަކަރިއްޔާ
ހުވަދު އަތޮޅަށް ޚާއްސަ ކޮށްގެން "ސެމިނާއޮން ފައިބަރ ގުލާސް އެޕްލިކޭޝަން" ބޭއްވުމަށް ހަމަޖެހިފައިވާ ކަމަށް ގެރެންޓީ ފައިބަރ ގުލާސް ގެ ކޯޑިނޭޓަރ އަދުނާނު ޒަކަރިއްޔާ ވިދާޅު ވެއްޖެއެވެ.
ރާއްޖެއެމްވީއާއި ވާހަކަ ދައްކަވަމުން އަދުނާނު ވިދާޅުވީ މިފަދަ ސެމިނާއެއް ހުވަދު އަތޮޅަށް ޚާއްސަކޮށްގެން ބޭއްވުމުގެ ބޭނުމަކީ މިވަގުތު އެންމެގިނައިން ބޮޑަތި އުޅަނދުތައް ބަނދެފައިވަނީ އެއަތޮޅުގައި ކަމަށްވާތީ ކަމަށެވެ. ގއ. ވިލިގިލީގައި ސެމިނާ ކުރިއަށް ދާއިރު އެ އަތޮޅުގެ އެހެން ރައްރަށުގެ އޮޑިދޯނި، ސްޕީޑް ބޯޓް ލޯންޗް ފަދަ ތަކެތި ގެންގުޅެ އެ ތަކެތީގެ ވެރި ފަރާތްތަކުން ވެސް މި ސެމިނާގައި ބައިވެރި ކުރުވުމަށް މަސައްކަތް ކުރަމުން ދާ ކަމަށް އޭނާ ވިދާޅުވިއެވެ.
" ސެމިނާ އަމާޒުކޮށްފައިވަނީ އޮޑިދޯނިފަހަރުގެ ވެރިންނަށް. އަދި ފައިބަރ އެޕލިކޭޝަންތައް ނުބައި ގޮތަކަށް ބޭނުން ކޮށްފައި ވުމުން ކަމެއް ދިމާވާ ހިނދު އޭގެ ހުރިހާ ގެއްލުމެއް ލިބޭ ބަޔަކީ އެއީ. އަދި މިތަކެތި ބަނުމުގައި މިއުޅެނީ ހަމަ އެކަނި ދިވެހިންނެއް ނޫން. ބޭރު މީހުން ވެސް އެބައުޅޭ. އަދި އެފަރާތްތަކަށް ފައބަރ މެޓީރިއަލް ފެންނަނީ ވެސް ރާއްޖެ އަންނަފަހުން . އެހެންވުމުން އެމީހުންނަކަށް ވެސް ނޭގެ ފައިބާރ ބޭނުންކުރަންޖެހޭ ގޮތެއް. އެހެންކަމުން އުޅަނދު ފަހަރުގެ ވެރިފަރާތް ތަކުންނާއި އަދި މަސައްކަތް ކުރާ މީހުން މި ސެމިނާގައި ބައިވެރި ވުމަކީ ވަރަށް މުހިންމު ކަމެއް" އަދުނާނު ވިދާޅުވިއެވެ.
އަދުނާނު ވިދާޅުވީ މިފަދަ ސެމިނާއެއް ބޭއްވުމުގެ މަގުސަދަކީ ފައިބަރުގެ ހުރިހާ މާއްދާ ތަކަކީ ވެސް ވިހަ މާއްދާތަކަކަށް ވާއިރު ފައިބަރު ބޭނުން ކުރަންޖެހޭ ޚާއްސަ އުސޫލުތަކަކާއި މިންގަނޑު ތަކަށް އުޅަނދުތައް ބަނުމަށް މީހުންނަށް ހިތްވަރު ދިނުން ކަމަށެވެ. އަދި އެކަންކަން މުޖުތަމައަށް ކިޔައިދީ މުޖުތަމައު ހޭލުންތެރި ކުރުވުން ކަމަށް އޭނާ ވިދާޅުވިއެވެ. އެނގިގެން މަސައްކަތް ކުރުމުން މަސައްކަތުގެ ކޮލިޓީ އެތައްގޮތަކުން ރަނގަޅުވެ ދިގު މުއްދަތެއްގައި އުޅަނދު ބޭނުން ކުރުމުގެ ފުރުސަތު ބޮޑުވާ ކަމަށް ވެސް އޭނާ ވިދާޅުވިއެވެ.
މީގެ އިތުރުން ވެސް އަދުނާނު ވިދާޅުވީ އުޅަނދުތައް ބަނުމުގައި މެރިން ގުރޭޑް ފައިބަރ ބޭނުން ކުރަންޖެހޭއިރު މި ސެމިނާގައި ފައިބަރުގެ ވައްތަރުތަކާއި، ފައިބަރު މިކްސް ކުރާނެ ގޮތުގެ އިތުރުން ފައިބަރު ގުދަން ކުރާނެ ގޮތްތައް ވެސް ކިޔައިދެވިގެން ދާނެކަމަށް އޭނާ ވިދާޅުވވިއެވެ
ގެރެންޓީ ފައިބަރ ގުލާހަކީ ދެ ދާއިރާއެއްގައި ފައިބަރު ގުލާސްގެ ވިޔަފާރިކޮށް އަދި ފައިބަރ ގުލާސްއިން ތަކެތި އުފައްދާ ކުންފުންޏެކެވެ.
ފައިބަރ ގުލާސްގެ ދެފިހާރަ މާލޭގައި ހުރެއެވެ. އެއީ ފައިބާރ ފިހާރައާއި ފައިބަރ ކިޓް އެވެ.މި ދެތަނުން ދެބްރޭންޑެއްގެ ފައިބަރ ވިއްކާއިރު އެއީ އިންޓާރނޭޝަނަލް ބޮޑީސް ތަކުން ގަބޫލުކުރާ ފެންވަރުގެ ފައިބަރ ތަކެއް ކަމަށް ފައިބަރ ގުލާސްއިން މައުލޫމާތު ދެއެވެ.
ކޮންމެ އަހަރަކު އެއްފަހަރު މިސެމިނާ ރާއްޖޭގެ ކޮންމެވެސް އެއް ހިސާބެއްގައި ބާއްވަމުންދާ ކަމަށްވެސް އެ ކުންފުނިން މައުލޫމާތު ދެއެވެ.
