ރަމަޟާން މަހަށް، އައްޑޫ ސިޓީ ސާފުކުރުމުގެ ޕްރޮގްރާމެއް ކުރިއަށްގެންދަނީ
މި ޕްރޮގްރާމްގެ ދަށުން ވެމްކޯ މެދުވެރިކޮށް ގޭގެއިން އުކާލަންޖެހޭ ކުނިތައް އުކާލާދިނުމަށް ހަމަޖެހިފައިވޭ
އައްޑޫ ސިޓީ
ރަމަޟާން މަހަށް ހާއްސަކޮށް، އައްޑޫ ސިޓީ ސާފުކުމުގެ ޕްރޮގްރާމެއް ކުރިއަށް ގެންދިޔުމަށް އައްޑޫ ސިޓީ ކައުންސިލްގެ އިދާރާއިން ނިންމައިފި އެވެ.
"ނަލަފެހި އައްޑޫ"ގެ ނަމުގައި ކުރިއަށް ގެންދިއުމަށް ނިންމާފައިވާ ސާފުކުރުމުގެ އެ ޕްރޮގްރާމާއި ގުޅޭގޮތުން ސިޓީ ކައުންސިލުން ކުރި އިއުލާނެއްގައި ބުނެފައިވަނީ އައްޑޫ ސީޓީގެ ރައްޔިތުންނަކީ ޒަމާނުއްސުރެ ސާފުތާހިރު ކަމަށް ލޯބިކުރާ، ޚާއްސަ ގޮތެއްގައި ރަމަޟާން މަހަށް ސާފުކުރުމުގެ މަސައްކަތްކުރައްވާ ރައްޔިތެއް ދިރިއުޅޭ ސިޓީއެއް ކަމަށެވެ. އަދި އައްޑޫ ސިޓީގައި ރަމަޟާން މަހަށް ޚާއްސަކޮށްގެން ކުރިއަށް ގެންދާ ސާފުކުރުމުގެ ޕްރޮގްރާމަށް އެހީތެރިވުމުގެ ގޮތުން ވެމްކޯއާއި އައްޑޫ ސިޓީ ކައުންސިލް އިދާރާއާއި ގުޅިގެން ވަނީ ކުނި ނަގާ ދިނުމުގެ ޕްރޮގްރާމެއް ހިންގުމަށް ހަމަޖައްސާފައި ކަމަށް އެ އިއުލާންގައި ބުނެފައިވެއެވެ.
އައްޑޫ ސިޓީ ކައުންސިލުން ވަނީ ރަމަޟާން މަހަށް ގެއާއި ގޯތިތެރެ ސާފުކުރުމުގެ މަސައްކަތާއި ގުޅިގެން އުކާލަންޖެހޭ ކުނި އުކާލުމަށް އެދޭ ފަރާތްތަކަށް އެ ގޭބީސީއެއް ހިމެނޭ އަވަށެއްގެ އަވަށު އޮފީހުގައި ނަން ނޯޓު ކުރުމުގެ ފުރުސަތު ހުޅުވާލާފަ އެވެ. އަދި މި ޕްރޮގްރާމްގެ ދަށުން ކުނި ނަގާ ދިނުމަށް ހަމަޖެހިފައިވަނީ ނަން ނޯޓު ކުރާ ކޮންމެ ގޭބީސީ 01 (އެކެއް) ދުވަހު ކަމަށާއި، މި ޕްރޮގްރާމްގެ ދަށުން ކުނިނެގުމަށް އެދޭ ފަރާތްތަކުން ކުނި ޖަމާކުރައްވާނީ ފަސޭހައިން ކުނި ނެގޭނެ ގޮތަށްކަމަށް ވެސް އެ އިއުލާންގައި ބުނެފައިވެއެވެ.
