ފަލަސްތީނުގެ އާ ސަފީރު ސަފީރުކަމުގެ ފަތްކޮޅު ރައީސް ސޯލިހަށް އަރުވައިފި
ފަލަސްތީނަކީ ދިވެހިންގެ ހިތްތަކުގައި ހާއްސަ މަގާމެއް ދެވިފައިވާ ޤައުމެއް
ފަލަސްތީނުގެ އައު ސަފީރު އަދި ރައީސް ސޯލިހު
ފަލަސްތީން ސަރުކާރުން ރާއްޖެއަށް ކަނޑައެޅުއްވި އާ ސަފީރު މިސްޓަރ ވަލީދު އޭ. އެމް. އަބޫޢަލީ އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް އަރުވައިފިއެވެ.
މިކަމާއި ގުޅިގެން އާދިއްތަ ދުވަހު ބޭއްވި ރަސްމިއްޔާތުގައި ރައީސް ސޯލިހު ވަނީ ފަލަސްތީނުގެ އައު ސަފީރަށް ތަހުނިޔާ ވިދާޅުވެ، ދެޤައުމުގެ ގުޅުމާބެހޭ ގޮތުން މަޝްވަރާ ކުރައްވައިފައެވެ .ރައީސްގެ ވާހަކަފުޅުގައި، ފަލަސްތީނަކީ ދިވެހިންގެ ހިތްތަކުގައި ހާއްސަ މަގާމެއް ދެވިފައިވާ ޤައުމެއްކަން ފާހަގަކުރައްވައި، ފަލަސްތީނުގެ މިނިވަން ކަމަށް ކުރެވޭ މަސައްކަތްތަކަށް ދިވެހި ސަރުކާރުން އަބަދު ވެސް ތާއީދު ކުރައްވާކަން ފާހަގަ ކުރެއްވިއެވެ. އަދި އެ ތާއީދު އެގޮތުގައި ދެމި އޮންނާނެކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.
މި ރަސްމިއްޔަތުގައި ވާހަކަ ދައްކަވަމުން ފަލަސްތީނުގެ ސަފީރު މިސްޓަރ ވަލީދު އޭ. އެމް އަބޫ ޢަލީ ވިދާޅުވީ ދެޤައުމުގެ ދެމެދުގައި އޮންނަ އެކުވެރިކަމުގެ ގުޅުން އެގޮތުގައި ދެމެހެއްޓުމަށް މަސައްކަތް ކުރައްވާނެ ކަމަށާއި ރާއްޖޭގައި ފަލަސްޠީނުގެ ރައްޔިތުން ތަމްޞީލު ކުރުމުގެ ފުރުޞަތު އެމަނިކުފާނަށް ލިބިވަޑައިގެންނެވުމުން އެކަމާ އުފާ ކުރައްވާ ކަމަށެވެ. އަދި ފަލަސްތީނަށް ރާއްޖެއިން އަބަދު ވެސް އެއްބާރުލުން ދެމުން އަންނަކަން ފާހަގަ ކުރައްވައި އެކަމަށްޓަކައި ރައީސުލްޖުމްހޫރިއްޔާއަށާއި ރާއްޖޭގެ ރައްޔިތުންނަށް ޝުކުރު އަދާކުރައްވައި އެމަނިކުފާނު ވަނީ ފަލަސްޠީނުގެ ރައީސް މަހްމޫދު ޢައްބާސްގެ ހެޔެއެދުންތައް ރައީސުލްޖުމްހޫރިއްޔާއަށް ރައްދު ކުރައްވާފައެވެ.
