ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާއަށް ކޮމިޓީން ހުށަހަޅާ ކަންތަކުގެ ތެރޭގައި، މާލިއްޔަތު ކޮމިޓީން ދިރާސާކޮށް ނިންމާފައިވާ 101 އޮޑިޓް ރިޕޯރޓް އެޖެންޑާކޮށްފިއެވެ.

މާލިއްޔަތު ކޮމިޓީން ދިރާސާކޮށް ނިންމާފައިވާ އޮޑިޓް ރިޕޯރޓްތަކުގެ ތެރޭގައި 2007 ވަނަ އަހަރާއި 2013 ވަނަ އަހަރާއި ދެމެދުގެ ރިޕޯރޓްތައް ހިމެނެއެވެ. މީގެ ތެރޭގައި ޕޮލިސް އިންޓެގްރިޓީ ކޮމިޝަނުގެ އޮޑިޓް ރިޕޯޓާއި، އިލެކްޝަންސް ކޮމިޝަނުގެ އޮޑިޓް ރިޕޯޓްތަކާއި، އެންޓި ކޮރަޕްޝަންސް ކޮމިޝަނުގެ އޮޑިޓް ރިޕޯޓާއި، އެކި ކައުންސިލްތަކުގެ އޮޑިޓް ރިޕޯޓްތަކުގެ އިތުރުން ސަރުކާރުގެ އެކި ވުޒާރާތަކުގެ އޮޑިޓް ރިޕޯޓްތައް ވެސް ހިމެނެއެވެ.

މާލިއްޔަތު ކޮމިޓީގެ ގިނަ އަދަދެއްގެ އޮޑިޓް ރިޕޯޓް ހޯމަ ދުވަހުގެ ޖަލްސާއަށް އެޖެންޑާކޮށްފައިވާއިރު، ޖަލްސާގެ ވަގުތު އިތުރުކުރަން އަދި މަޖިލީހުގެ ރިޔާސަތުން ނިންމާފައިނުވާ ކަމަށް މަޖިލީހުގެ އަމީން އާންމު ފާތިމަތު ނިއުޝާ ވަނީ ވިދާޅުވެފައެވެ. ނިއުޝާ ވިދާޅުވީ ހޯމަ ދުވަހުގެ ޖަލްސާގެ ވަގުތު ހަމަވާއިރު، ގޮތެއް ނުނިމި ބާކީ ހުރި ރިޕޯޓްތައް ދެން ޖެހިގެން އޮންނަ ޖަލްސާއަކަށް އެޖެންޑާކުރާނެ ކަމަށެވެ. މިހާރު ހިނގާ 18 ވަނަ މަޖިލިސް ނިމުމަކަށް އަންނައިރު، ފެންނަނީ މަޖިލީހުގައި ނުނިމި ގިނަ މަސައްކަތްތަކެއް ކޮމިޓީ މަރްހަލާގައި އޮތް ތަނެއެވެ.

އެއް ޖަލްސާއަކަށް މިހާތަނަށް އެޖެންޑާކުރި އެންމެ ގިނަ ބިލްތައް ވެސް އެޖެންޑާކޮށްފައި ވަނީ ހޯމަދުވަހުގެ ޖަލްސާއަށެވެ. ހޯމަ ދުވަހުގެ ޖަލްސާއަށް މަޖިލީހަށް ތައާރަފްކުރަންޖެހޭ ބިލްގެ ތެރޭގައި 12 ބިލެއް ވަނީ އެޖެންޑާކޮށްފައެވެ. އޭގެ ތެރޭގައި ސަރުކާރުގެ ފަރާތުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހަޅުއްވާފައިވާ ދިވެހިރާއްޖޭގެ ތަގާފީ ތަރިކައިގެ ބިލްގެ ފުރަތަމަ ކިޔުން އިއްވުމާއި، ސަރުކާރުގެ ފަރާތުން ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ ހުށަހަޅުއްވާފައިވާ ވިޔަފާރީގެ ވާދަވެރިކަން އުފައްދައި ދެމެހެއްޓުމުގެ ބިލްގެ ފުރަތަމަ ކިޔުން އިއްވުމުގެ އިތުރުން ސަރުކާރުގެ ފަރާތުން އަލިފުށީ ދާއިރާގެ މެމްބަރު މުހައްމަދު ރަޝީދު ހުށަހަޅުއްވާފައިވާ ދިވެހިރާއްޖޭގެ މަސްވެރިކަމުގެ ބިލްގެ ފުރަތަމަ ކިޔުން އިއްވުން ހިމެނެއެވެ.

މީގެ އިތުރުން ސަރުކާރުގެ ފަރާތުން މާފަންނު ހުޅަނގު ދާއިރާގެ މެންބަރު މުޙައްމަދު ފަލާހް ހުށަހަޅުއްވާފައިވާ، ސިވިލް ސަރވިސްގެ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުމުގެ އިތުރުން ސަރުކާރުގެ ފަރާތުން މެދު ހެންވޭރު ދާއިރާގެ މެންބަރު ޢަލީ އާޒިމް ހުށަހަޅުއްވާފައިވާ  ހިއުމަން ރައިޓްސް ކޮމިޝަނުގެ ޤާނޫނަށް އިޞްލާޙުގެ ގެނައުމުގެ ބިލުގެ ފުރަތަމަ ކިޔުން އިއްވުމާއި، ސަރުކާރުގެ ފަރާތުން މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ހުށަހަޅުއްވާފައިވާ އިންތިޤާލީ ޢަދާލަތުގެ ބިލުގެ ފުރަތަމަ ކިޔުން އިއްވުމާއި، ސަރުކާރުގެ ފަރާތުން ފެލިދޫ ދާއިރާގެ މެންބަރު އަޙްމަދު މަރުޒޫގު ހުށަހަޅުއްވާފައިވާ ދަނޑުވެރިކަމުގައި ބޭނުންކުރާ ޕެސްޓިސައިޑް ބެހޭ ބިލުގެ ފުރަތަމަ ކިޔުން އިއްވުން ހިމެނެއެވެ.

މީގެ އިތުރުން ސަރުކާރުގެ ފަރާތުން، އައްޑޫމީދޫ ދާއިރާގެ މެންބަރު ރޮޒައިނާ އާދަމް ހުށަހަޅުއްވާފައިވާ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުމާއި، ސަރުކާރުގެ ފަރާތުން، ގަލޮޅު އުތުރު ދާއިރާގެ މެންބަރު އީވާ ޢަބްދުالله ހުށަހަޅުއްވާފައިވާ، އެންޓި-ކޮރަޕްޝަން ކޮމިޝަނުގެ ޤާނޫނު އަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުން ހިމެނެއެވެ.

އަށާރަ ވަނަ މަޖިލިސް ނިމުމަކަށް އަންނާނީ އޭޕްރީލް 30 ވަނަ ދުވަހާއި ހަމައަށެވެ. ނަވާރަ ވަނަ މަޖިލިސް ހުވާކުރާނީ މެއި މަހުގެ 28 ވަނަ ދުވަހުއެވެ.

ހޯމަ ދުވަހު ޖަލްސާ އެޖެންޑާކޮށްފައި މި ވަނީ ޖަލްސާއެއް ނުބާއްވާތާ ގިނަ ދުވަސްތަކެއް ފަހުންނެވެ. އެންމެ ފަހުން ޖަލްސާއެއް ބާއްވާފައި ވަނީ މާރޗް 27 ވަނަ ދުވަހުއެވެ.