އިންޑޮނޭޝިއާ ރައީސްގެ ކެމްޕެއިންގައި ހޮލޮގްރާމެއް!

އިންޑޮނޭޝިއާގެ ރައީސް ޖޯކޯ ވިދޯދޯ ކުރިޔަށް އޮތް ރިޔާސީ އިންތިހާބަށް ކެމްޕެއިން ކުރެއްވުމުގެ ގޮތުން އެމަނިކުފާނުގެ ހޮލޮގްރާމެއް ބޭނުންކުރައްވަން ފައްޓަވައިފިއެވެ.

އެމެރިކާއަށް ވުރެ ވެސް ބޮޑު ސަރަހައްދަކަށް ފެތުރިފައިވާ އިންޑޮނޭޝިއާގެ 17000 ޖަޒީރާ ރަށްތަކަށް ކެމްޕެއިންއަށް ދަތުރު ކުރެއްވުމުގައި އަވަދިނެތި އުޅުއްވަމުން، ރައީސް ވިދޯދޯ ވަނީ އެމަނިކުފާނަށް ވަޑައިނުގެންނެވޭ ސަރަހައްދުތަކަށް ހޮލޮގްރާމްގެ އެހީގައި އާއްމުންގެ ވޯޓު ހޯދަން ކެމްޕެއިން ރެލީތައް ބާއްވަވަމުންނެވެ.

އާދައިގެ ހުދު ގަމީހަކާއި ނޫ ޖިންސެއް ތުރުކުރައްވައިގެން ހުންނެވި ވިދޯދޯގެ ހޮލޮގްރާމް ފެނުމުން އެމަނިކުފާނަށް ތާއީދުކުރާ ފަރާތްތަކުން އަންނަނީ ފޯރިއާ އެކު ކެމްޕެއިން އިވެންޓްތަކުގައި ވެސް ބައިވެރިވަމުންނެވެ. އަދި މި ހޮލޮގްރާމަކީ ސައްތައިން ސައްތަ އިންޑޮނޭޝިއާގެ ޒުވާނުންގެ އުފެއްދުމެއް ކަމަށް ވެސް ވިދޯދޯގެ ހޮލޮގްރާމް ވިދާޅުވެއެވެ.

ރޮއިޓަރޒް ނޫސް އެޖެންސީއަށް އިންޓަވިއު ދިން ޒުވާނަކު ބުނެފައި ވަނީ އޭނާއަށް މިކަން ވަރަށް ކަމުގޮއްސި ކަމަށާއި، ހީވަނީ ހަމަ ރައީސް އެމީހުން ކައިރިއަށް އައިސް ބައްދަލުކޮށްލާހެން ކަމަށެވެ. ލޯބިން އެގައުމުގެ ރައްޔިތުން "ޖޮކޯވީ" ގެ ނަމުން މުހާތަބު ކުރާ ވިދޯދޯއަކީ ރައްޔިތުން، ހާއްސަކޮށް ޒުވާނުންގެ މެދުގައި މަގުބޫލު ރައީސްއެކެވެ.

އިންތިހާބުގެ ކެމްޕެއިންގައި ހޮލޮގްރާމްގެ ޒަރިއްޔާއިން ރައްޔިތުންނާ ބައްދަލުކުރުން އިންޑޮނޭޝިއާއަށް އައު ކަމަކަށްވީ ނަމަވެސް، މީގެ ކުރިން ތުރުކީގެ ރައީސް ތޮއްޔިބް އުރުދުޣާން އާއި އިންޑިއާގެ ބޮޑުވަޒީރު ނަރެންދުރަ މޯދީ ވެސް ވަނީ ކެމްޕެއިން ކުރައްވަން ހޮލޮގްރާމް ބޭނުން ކުރައްވާފައެވެ.

އިންޑޮނޭޝިއާގެ ރިޔާސީ އިންތިހާބުގެ ވޯޓުލުން ގާތްވެފައިވާ އިރު، މިފަހަރުގެ އިންތިހާބުގައި 192 މިލިއަން މީހުންނަށް ވޯޓުލުމުގެ ހައްގު ލިބިފައިވެއެވެ. ހިޔާލު ހޯދުމުގެ ވޯޓުތަކުން ދައްކާ ގޮތުގައި ވިދޯދޯ މިފަހަރުގެ އިންތިހާބު ވެސް ކާމިޔާބު ކުރައްވާނެ ކަމަށް ބެލެވެއެވެ. އެގޮތުން ވިދޯދޯ އުޅުއްވަނީ އެމަނިކުފާނާ އެއްމެ ގާތުން ވާދަކުރައްވާ ކުރީގެ އަސްކަރިއްޔާގެ ޖެނެރަލް ޕްރަބޯވޯއަށް ވުރެ އެތައް ގުނައެއް ކުރީގައި ކަމަށް މަސްރަހު ދިރާސާކުރާ ފަރާތްތަކުން ވަނީ ބުނެފައެވެ.