ބްރެޒިލްގެ ރައީސްގެ މައްޗަށް ކޮރަޕްޝަނުގެ ތުހުމަތެއް!

ބްރެޒިލްގެ ރައީސް މިޝެލް ޓެމިއާގެ މައްޗަށް އެގައުމުގެ އެންމެ ބޮޑު އެއް މީޑިއާއިން ތުހުމަތުކުރި ބޮޑު ކޮރަޕްޝަނުގެ މައްސަލައެއް ތަހުގީގު ކުރުމުގެ މަސައްކަތް އެގައުމުގެ ހައިކޯޓަކުން ފަށައިފިއެވެ.

ސަރުކާރުގެ ފަރާތުން ހިންގާ ނޫހެއް ކަމަށްވާ "އޮގްލޮބޯ" އިން ތުހުމަތުކުރާ ގޮތުގައި ރައީސް ކަމުގައި ހުންނެވި ޓެމިއާ ވަނީ ބްރެޒިލްގެ ސެނެޓުގެ ކުރީގެ މެންބަރަކަށް ވަރަށް ގިނަ އަދަދެއްގެ ފައިސާދީފައެވެ.

އެނޫހުން ބުނާ ގޮތުގައި ޓެމިއާ، ބްރެޒިލް ސެނެޓުގެ ސްޕީކަރު އެޑުއާޑޯ ކުންހާއަށް ފައިސާދީފައި ވަނީ ކޮރަޕްޝަނުގެ ކުށް ސާބިތު ވެގެން ޖަލު ހުކުމެއް ތަންފީޒް ކުރައްވަމުން ގެންދެވިއިރު، އިތުރު ބަޔެއްގެ ވާހަކަ ނުދައްކާ ހަނު ބެހެއްޓެވުމުގެ ގޮތުންނެވެ.

އޮގްލޮބޯގެ މި ތުހުމަތުތައް ޓެމިއާވަނީ ދޮގުކުރައްވާފައެވެ. އަދި ބްރެޒިލްގެ ސުޕްރީމް ކޯޓުން އެމައްސަލަ ބަލަންފަށާފައިވާއިރު، ރިޕޯޓަރުންނާއި ވާހަކަ ދައްކަވަމުން ޓެމިއާ ވިދާޅުވީ އޭނަގެ މައްޗަށް ކުރެވިފައިވާ ތުހުމަތުތަކާ ގުޅިގެން އިސްތިއުފާ ދެއްވަން ބޭނުންފުޅު ނުވާ ކަމަށެވެ.

ޓެމިއާ ވިދާޅުވީ އެއްވެސް މީހަކު ހަނު ބެހެއްޓުމަށް، ރިޝްވަތުގެ ފައިސާ ދިނުމަށް އަންގާފައިނުވާ ކަމަށެވެ. ނަމަވެސް އޮގްލޮބޯ އިން ބުނާގޮތުގައި ކުންހާއަށް ރިޝްވަތު ދިނުމަށް ޓެމިއާ ވިދާޅުވާ ވާހަކަތައް ވަނީ ރިކޯޑް ކުރެވިފައެވެ.

އެ ނޫހުން ބުނާގޮތުގައި ޓެމިއާ މިގޮތައް ކަންތައް ކުރައްވާފައިވަނީ ހިނގަމުންދާ ކޮރަޕްޝަނުގެ ބޮޑު ތަހުގީގެއްގައި އެއްޗެއް ވިދާޅުނުވެ ހުންނަވައިފިނަމަ އޭގެ ބަދަލުގައި ކޮށްދެއްވާ ކަމެއްގެ ގޮތުގައެވެ.

ޓެމިއާ ވިދާޅުވި ގޮތުގައި އޭނާގެ ކުށެއް ނެތްކަން ސާބިތުކޮށް ދެއްވަން މަސައްކަތް ކުރައްވާނެއެވެ.

"އަޅުގަނޑަށް އެނގޭ އަޅުގަނޑުކުރީ ކީއްކަން، އަޅުގަނޑަށް އެނގޭ އަޅުގަނޑުގެ އަމަލުތައް ރަނގަޅުކަން، މި ތުހުމަތުތައް އަވަހަށް ތަހުގީގު ކުރުމަށް އަޅުގަނޑު ބާރު އަޅަން" ޓެމިއާ ވިދާޅުވެފައިވެއެވެ.