ލަންކާގެ ރައީސްގެ ދައުރުގެ މުއްދަތު އިތުރު ކުރުމަށް ހުށަހެޅުއްވި މައްސަލައިގައި 5 މެމްބަރުންގެ ބެންޗެއް

ސްރީލަންކާގެ ރައީސް މައިތިރިޕަލަ ސިރިސޭނާ އަށް ވެރިކަމުގައި ހަ އަހަރު ހުންނެވިދާނެތޯ ބެލުމަށް އެގައުމުގެ ސުޕްރީމް ކޯޓުގެ ލަފަޔަކަށް އެމަނިކުފާނު އެދިވަޑައިގެންފައިވާ މައްސަލަ ބަލަން އެގައުމުގެ ސުޕްރީމް ކޯޓުން ފަސް މެމްބަރުންގެ ބެންޗެއް އެކުލަވާލައިފިއެވެ.

ފަސް މެންބަރުންގެ ބެންޗުގައި ހިމެނިވަޑައިގަންނަވަނީ އުއްތަމަ ފަނޑިޔާރު ޕްރިޔަސަތު ޑެޕްއާއި، ފަނޑިޔާރު އީވާ ވަނަސުންދެރާ، ބުވަނެކަ އަލުވިހަރެ، ސިސިރާ ޑެ އެބްރޫ އަދި ކޭ.ޓީ ޗިތުރަސިރީއެވެ.

ސިރިސޭނާ ވެރިކަމުގެ ދައުރަށް އެއް އަހަރު އިތުރު ކުރުމަށް އެގައުމުގެ ސުޕްރީމް ކޯޓަށް ހުށަހެޅުއްވިއިރު، 2015 ވަނަ އަހަރު ގާނޫނު އަސާސީ އަށް ބަދަލު ގެނެސް ރައީސްއަކަށް ވެރިކަމުގައި ހުންނެވޭނީ ހަ އަހަރުގެ ބަދަލުގައި ފަސް އަހަރު ކަމަށް ކަނޑައެޅުއްވުމުގައި އިސްކޮށް ހުންނެވީ ވެސް ރައީސް ސިރިސޭނާއެވެ.

ގާނޫނު އަސާސީ އަށް 2015 ވަނަ އަހަރު ގެނައި އިސްލާހާ އެކު ސިރިސެނާގެ ވެރިކަމުގެ ދައުރު ހަމަވާނީ 2020 ވަނަ އަހަރެވެ. ނަމަވެސް އިތުރު އެއް އަހަރު ވެރިކަމުގައި ހުންނެވުމަށް ސުޕްރީމް ކޯޓުން ހުއްދަ ދީފި ނަމަ 2021 ވަނަ އަހަރު ވަންދެން ސިރިސެނާ އަށް ވެރިކަމުގައި ހުންނެވޭނެއެވެ.

ސިރިސޭނާގެ ހުށަހެޅުއްވި މައްސަލައާ ގުޅިގެން ސުޕްރީމް ކޯޓުގެ ބެންޗުގެ ފުރަތަމަ ބައްދަލުވުން މިއަދު ބާއްވާއިރު މި މައްސަލާގައި ސުޕްރީމް ކޯޓަށް ފެންނަ ލަފާ މި މަހު 15 ވަނަ ދުވަހުގެ ކުރިން ސިރިސޭނާ އަށް އަރުވާނެއެވެ.

ސްރީލަންކާގެ ރައީސް އެމަނިކުފާނު ވެރިކަމުގެ ދައުރުގެ މުއްދަތު އިތުރު ކުރެއްވުމަށް މަސައްކަތްޕުޅު ކުރައްވާއިރު ސިރިސޭނާ ސަރުކާރުގެ ކޯލިޝަން ޕާޓްނަރު "ދަ ޔުނައިޓެޑް ނެޝެނަލް ޕާޓީ (ޔޫއެންޕީ)" އާ މެދު ވަނީ ނުތަނަވަސްކަން އުފެދިފައެވެ. ޔޫއެންޕީ ލީޑު ކުރައްވަނީ ލަންކާގެ ބޮޑުވަޒީރު ރަނިލް ވިކްރަމްސިންހައެވެ.