ނައިޖީރިއާގެ ރައީސްގެ ރަސްމީ އޮފީސް މީދާ ކެއުމުގެ ސަބަބުން އަމިއްލަ ގެކޮޅުގައި މަސައްކަތް ފައްޓަވައިފި

ތިން މަސްދުވަހު ގައުމުން ބޭރުގައި ބޭސްފަރުވާ ކުރައްވަން އުޅުއްވުމަށް މަހު ނައިޖިރީއާގެ ރައީސް މުހައްމަދު ބުޚާރީ އެނބުރި ގައުމަށް ވަޑައިގެންނެވި އިރު ކަމަކަދާކަށް ނެތެވެ. އެމަނިކުފާނުގެ ރަސްމީ އޮފީސް މީދާ ކައި ގެއްލުންދީއެވެ.

ސަރުކާރުގެ ތަރުޖަމާނު ގާބާ ޝެހޫ ވިދާޅުވީ، ރައީސްގެ ރަސްމީ އޮފީހުގެ އެއަރކޯން އާއި ފަރުނީޗަރުތައް މީދާ ކައި ގެއްލުންދީފައިވާތީ، އޮފީސް މަރާމާތު ކުރުމަށްޓަކައި، ކުރިއަށް އޮތް 3 މަސްދުވަހު ރައީސް މަސައްކަތް ކުރައްވާނީ އަމިއްލަ ގެކޮޅުގައި ކަމަށެވެ.

ތަރުޖަމާނު ބީބީސީ އަށް ދެއްވި އިންޓަވިއުއެއްގައި ވިދާޅުވީ، ސާމާނާ ތަކެއްޗާއެކު ހުރި ރަނގަޅު ފެންވަރުގެ އޮފީހެއްގެ ރައީސްގެ އަމިއްލަފުޅު ގެކޮޅުގައިވެސް ހުރުމާއެކު ރައީސަށް މަސައްކަތްޕުޅު ކުރައްވާކަށް އެއްވެސް ދައްޗެއް ނެތް ކަމަށެވެ.

ބުޚާރީ 3 މަސްދުވަހުގެ މުއްދަތައް ބޭސްފަރުވާ ކުރައްވަން ހުންނެވީ އިނގިރޭސި ވިލާތުގައެވެ.

ދިގު މުއްދަތެއްގައި ގައުމުން ބޭރުގައި ހުންނެވުމުގެ ސަބަބުން ނައިޖީރިއާގެ ބައެއް ރައްޔިތުން ވަނީ އެމަނިކުފާނުގެ އިސްތިއުފާއަށް ގޮވާލާފައެވެ. ރައީސް މިހާ ދިގު މުއްތަކަށް ފަރުވާ ހޯއްދެވާފައި ވުމާއެކު އެމަނިކުފާނުގެ އާލާސްކަންފުޅާ ބެހޭ މައުލޫމާތު ހާމަ ނުކޮށްގެންވެސް އެއްބަޔަކު އަނެއް ބަޔަކު ވަނީ ރުޅިއައިސްފައެވެ.

ބީބީސީން ބުނާގޮތުގައި އެމަނިކުފާނު ފުރަތަމަ ލަންޑަނަށް ވަޑައިގަތީ، ޖޫން 2016 ގައެވެ. އޭރު އެއީ ކަންފަތްޕުޅުގެ އިންފެކްޝަނަކަށް ފަރުވާކުރައްވަން ކަމަށް ރައީސް ބުޚާރީގެ އޮފީހުން ހަމަކޮށްފައިވެއެވެ.

އަނެއްކާ މިއަހަރުގެ ޖަނަވަރީ އާއި މޭމަހު އިނގިރޭސިވިލާތައް ވަޑައިގެންފައިވެއެވެ. ފަރުވާ ހޯއްދަވާ މައްސަލައާ ބެހޭ އެއްވެސް މައުލޫމާތެއް ހާމަކޮށްފައެއް ނުވެއެވެ.

އިދިކޮޅު ފަރާތްތަކުން ބުނަނީ އެމަނިކުފާނު ފަރުވާ ހޯއްދަވަމުން ގެންދަވަނީ ޕްރޮސްޓްރޭޓް ކެންސަރަށް ކަމަށެވެ. ނަވަމެސް ބުޚާރީ ވިދާޅުވެފައިވަނީ އެއީ ދޮގެއް ކަމަށެވެ.

ރައީސްގެ ސިއްހަތާ މެދު ކަންބޮޑުވާންޖހޭ އެއްވެސް ކަމެއް ނެތް، ރައީސްގެ ކިބައިން ފެންނަ ކަންކަމަށް ބަލާއިރު ބުނެވޭނީ، އަހަރެމެންނަށް ލިބިފައި މިވަނީ މުޅިން އައު ބުޚާރީއެއް، ހަކަތަ ހުރި، އަދި ވަރަށް ބޮޑަށް ކަންކަމަށް ސަލާމުކަން ދެއްވާ، ޔަގީން އެމަނިކުފާނު ހުންނެވީ ފުރިހަމަ ސިއްހަތެއްގައި ކަން – ބީބީސީ އަށް ރައީސް ބުޚާރީގެ ތަރުޖަމާނު ޝެހޫ ވިދާޅުވެފައިވެއެވެ.

އޭނާ އިތުރަށް ވިދާޅުވީ، އެމަނިކުފާނުގެ ސިއްހީ ހާލުކޮޅު ރަނގަޅު ކަމަށާއި އެހެން ކަމުން، ދެން އަލާސްކަންފުޅާ ބެހޭ ވާހަކަ ދައްކާކަށް ނުޖެހޭ ކަމަށެވެ.

ބުޚާރީ އަމިއްލަ ގެ ކޮޅުން މަސައްކަތް ކުރެއްވުމަށް ދެއްކެވި ސަބަބު ނައިޖީރިއާގެ ރައްޔިތުން ދެކެނީ ޝައްކުގެ ނަޒަރަކުންނެވެ. ސޯޝަލް މީޑިއާގައި މީހުން މިކަމާ ގުޅިގެން ފާޅު ކުރަމުންދާ ޚިޔާލު ތަކަށް ބަލާއިރު، ގިނަ ބަޔަކު ދަނީ މިކަމަށް ފާޑުކިޔާ ހަޖޫ ޖަހަމުންނެވެ.