މަގުމަތީގެ އެކްސިޑެންޓްތައް ހިނގުމަށް މެދުވެރިވާ މައިގަނޑު އެއް ސަބަބަކީ ވަގުތު މެނޭޖު ނުކުރުން ކަމަށް ފުލުހުން ބުނެފިއެވެ.
ރާއްޖެޓީވީއާ ވާހަކަ ދައްކަވަމުން ޓްރެފިކް ފުލުހުންގެ ސްޓޭޝަން އިންސްޕެކްޓަރ މުހައްމަދު ވަހީދު ވިދާޅުވީ ވަޒީފާތަކުގައި އުޅޭ ގިނަ ފަރާތްތަކުން މަސައްކަތައް ދާން ނުކުންނަނީ ގިނަ ފަހަރަށް ފަސް މިނެޓައް ވުރެން ވެސް ވަގުތު ކުޑަތަން ވުމުން ކަމަށާއި އެ ވަގުތު ކޮޅުގެ ތެރޭގައި ގަޑި ނުޖެހި ދިއުމަށް ބައެއް ފަރާތްތަކުން ދުއްވަނީ ކަނޑައަޅާފައިވާ ސްޕީޑަށްވުރެ ބާރަށް ކަމަށެވެ.
"އެހެންވުމުގެ ސަބަބުން ގިނަ ފަހަރަށް ސްޕީޑް ކޮންޓްރޯލް ނުކުރެވި އެކްސިޑެންޓުތަކާ ކުރިމަތިލާން ޖެހޭ. ނަމަވެސް ވަގުތު އޮއްވާ ކޮންމެ ފަރާތަކުން ދާން ބޭނުންވާ ތަނަކަށް ދާން ނުކުންނަ ނަމަ އެކްސިޑެންޓްތައް ހިނގާ މިންވަރު މާ ބޮޑަށް ވެސް މަދު ކުރެވޭނެ،" ވަހީދު ވިދާޅުވިއެވެ.
މަގުމައްޗަކީ އެންމެންނަށް އަމާން ރައްކާތެރި ތަނަކަށް ހެދުމަށް ޓްރެފިކް ފުލުހުން ވަރަށް ގިނަ މަސައްކަތްތަކެއް ކުރަމުންދާ ދާކަން ފާހަގަ ކުރައްވައި ވަހީދު ވިދާޅުވީ މައިގަނޑު ގޮތެއްގައި ކުރާ އެއްކަމަކީ މީހުން ހޭލުންތެރި ކުރުވުމުގެ ގޮތުން ކުރޭވޭ މަސައްކަތްތައް ކަމަށެވެ.
އެގޮތުން ޓްރެފިކް ފުލުހުން ސްކޫލުތަކުގެ ދަރިވަރުންނަށާއި ޓެކްސީ ޑްރައިވަރުންގެ އިތުރުން އާންމު ރައްޔިތުންނަށް ވެސް މަގުމަތީގެ ގަވާއިދުތަކަށް ހޭލުންތެރިކުރުވުމުގެ ކުލާސްތައް ކުރިއަށް ގެންގޮސްފައިވާ ކަމަށެވެ.
ސިނަމާލެ ބްރިޖު ހުޅުވިގެން މި ވީ މަދު ދުވަސްކޮޅުގެ ތޭރެގައި ނުރައްކާތެރި އެކްސިޑެންޓްތަކެއް ހިނގުމުގެ ސަބަބުން މީހުންނަށާއި އަގު ބޮޑަތި މުދަލަށާއި އަދި ދައުލަތުގެ ތަކެއްޗައް ވެސް ބޮޑެތި ގެއްލުން ލިބިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ބުރިޖުގައި ދުއްވޭނެ އެންމެ ދަށް ސްޕީޑަކީ 25 ކިލޯ މީޓަރު ކަމަށާއި އެންމެ ބާރަށް ދުއްވޭނީ 50 ކިލޯ މީޓަރަށް ކަމަށެވެ.
