ރައީސް ޔާމީންގެ ވެރިކަން ނިމުމުގެ ވަގުތު ދަނީ ކައިރިވަމުން: ރައީސް ނަޝީދު

ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ވެރިކަން ނިމުމުގެ ވަގުތު ކައިރިވެއްޖެ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު އެގޮތަށް ވިދާޅުވެފައި މިވަނީ މިހާރު ހިނގަމުންދާ ލޯކަލް ކައުންސިލްތަކުގެ އިންތިހާބުގައި ގުޅިފައިވާ އިދިކޮޅު ސިޔާސީ ޕާޓީތަކަށް ލިބެމުންދާ ކާމިޔާބު ފާހަގަ ކުރައްވާ އެމަނިކުފާނު ކުރެއްވި ޓްވީޓެއްގަ އެވެ.

ރައީސް ނަޝީދު ވިދާޅުވީ ލޯކަލް ކައުންސިލްތަކުގެ އިންތިހާބުގައި އެމްޑީޕީއާއި ގުޅިފައިވާ އިދިކޮޅު ސިޔާސީ ޕާޓީތަކުގެ ކެންޑިޑޭޓުންނަށް މަރުހަބާ ދަންނަވާ ކަމަށެވެ. ލޯކަލް ކައުންސިލްތަކުގެ އިންތިހާބުގެ ނަތީޖާއިން ރައީސް ޔާމީންގެ ވެރިކަން ނިމުމުގެ ވަގުތު ކައިރިވެއްޖެކަން ހާމަވާ ކަމަށެވެ. އަދި ރައީސް ޔާމީންގެ ވެރިކަންނިމި، ރައްޖޭގައި އަލުން ޑޮމިކްރެސީ ގާއިމު ކުރެވިގެންދާނެ ކަމަށް ކަމަށްވެސް ރައީސް ނަޝީދު ވިދާޅުވި އެވެ.

މިހާރު ހިނގަމުންދާ ލޯކަލް ކައުންސިލްތަކުގެ އިންތިހާބުގައި ގުޅިފައިވާ އިދިކޮޅު ސިޔާސީ ޕާޓީތަކަށް ހާއްސަކޮށް އިދިކޮޅު އެމްޑީޕީއަށް ދަނީ ބޮޑު ކާމިޔާބީއެއް ލިބެމުންނެވެ.

އެގޮތުން، ވަގުތީ ނަތީޖާ ދައްކާގޮތުން މާލެސީޓީގެ 13 ގޮނޑީގެ ތެރެއިން 12 ގޮނޑި އެމްޑީޕީން ކާމިޔާބު ކޮށްފައިވާއިރު، އައްޑޫ ސިޓީގެ ހަތް ގޮނޑި ވެސް ކާމިޔާބުކޮށްފައިވަނީ އެމްޑީޕީއެވެ. ފުވައްމުލަކު ސިޓީގެ މެޖޯރިޓީ ވެސް އެމްޑީޕީން ކާމިޔާބު ކޮށްފައިވާ ކަމަށް ވަގުތީ ނަތީޖާއިން ދައްކަ އެވެ.