މަޑަވެއްޔާއި ހޯޑެއްދޫ ކަރަންޓް އެއްވިއުގައިން ގުޅާލަނީ
12 އެޕްރީލު 2019 | ހުކުރު 10:18ސެންޓްރަލް ޕަވަރ ސްޓޭޝަނެއް ގާއިމްކުރާނެ
މަޑަވެއްޔާ ހޯޑެއްދޫގެ ކޯޒްވޭ
ގދ. މަޑަވެއްޔާއި ހޯޑެއްދޫ ކަރަންޓް އެއްވިއުގައިން ގުޅާލުމަށް ފެނަކަ ކޯޕްރޭޝަނުން މަސައްކަތް ފަށައިފިއެވެ.
ފެނަކަ ކޯޕަރޭޝަނުން ކޮށްފައިވާ އިއުލާނެއްގައި ބުނީ މަޑަވެއްޔާއި ހޯޑެއްދޫ ކަރަންޓް އެއްވިއުގައިން ގުޅާލުމަށް ސެންޓްރަލް ޕަވަރ ސްޓޭޝަނެއް ޑިޒައިންކޮށް އިމާރާތްކޮށް, އެތަނަށް ބޭނުންވާ އެންމެހާ ތަކެތި ސަޕްލައިކޮށް އިންސްޓޯލްކޮށްދޭނެ ފަރާތެއް ހޯދުމަށް ބޭނުންވާ ކަމަށެވެ.
ފެނަކައިން ބުނީ މިކަމަށް ޝައުގުވެރިވާ ފަރާތްތަކަށް މައުލޫމާތު ސާފުކުރުމުގެ ބައްދަލުވުމެއް އަންގާރަ ދުވަހުގެ މެންދުރުފަހު 2:00 ގައި އެ ކުންފުނީގެ ހެޑް އޮފީހުގައި އޮންނާނެ ކަމަށެވެ. އަދި ބިޑާއި ގުޅޭގޮތުން ސާފުކުރަންޖެހޭ މައުލޫމާތުތައް ސާފުކުރުން އޮންނާނީ ޕްރީބިޑް މީޓިންއަށްފަހު މި މަހުގެ 23ގެ ނިޔަލަށް ކަމަށް ފެނަކައިން ބުންޏެވެ.
މީގެ އިތުރުން އެކޯޕަރޭޝަނުން ބުނީ މި މަސައްކަތުގެ ބިޑް ސެކިއުރިޓީގެ ގޮތުގައި 10،000 ޑޮލަރު ހުށަހަޅަންޖެހޭ ކަމަށެވެ. އަދި މި ބިޑްގައި ބައިވެރިވެވޭނީ ބިޑް ޑޮކިއުމަންޓް ގަންނަ ފަރާތަކަށާއި ޕްރީބިޑް މީޓިންގައި ބައިވެރިވާ ފަރާތްތަކަށް އެކަނި ކަމަށް ވެސް ފެނަކާއިން ވަނީ ބުނެފައެވެ.
ފެނަކާއިން ބުނީ ބިޑް ހުށަހެޅުވުމަށް ހަމަޖެހިފައި ވަނީ މި މަހުގެ 30 ވާ އަންގާރަ ދުވަހުގެ 11:00ގައި އެ ކުންފުނީގެ ހެޑް އޮފީހުގައި މި މަސައްކަތަށް އަންދާސީ ހިސާބު ހުށަހަޅާ ފަރާތްތަކުގެ ހާޒިރުގައި ކަމަށެވެ. އަދި މިގަޑީގެ ފަހުން ހުށަހަޅާ އަންދާސީ ހިސާބު ބަލައި ނުގަންނާނެ ކަމަށް ވެސް އެކޯޕަރޭޝަނުން ބުންޏެވެ.
މައުލޫމާތު ސާފުކުރަން ވަޑައިނުގަންނަވާ ފަރާތްތަކުގެ އަންދާސީހިސާބާއި، ޕްރީބިޑް މީޓިންއަށް ހާޒިރުނުވާ ފަރާތްތަކުގެ އަންދާސީ ހިސާބާއި، ބިޑް ސެކިޔުރިޓީ އޮރިޖިނަލް ހުށަނާޅާ ފަރާތްތަކުގެ އަންދާސީ ހިސާބް އަދި ހަމަޖެހިފައިވާ ގަޑީގެ ފަހުން ހުށަހެޅޭ އަންދާސީހިސާބުތައް ބަލައިނުގަންނާނެ ވެސް ފެނަކައިން ބުންޏެވެ.
