ވިކީލީކްސްގެ ފައުންޑަރ އަސާންޖް ހައްޔަރުކޮށްފި

ވިކީލީކްސްގެ ފައުންޑަރ ޖޫލިއަން އަސާންޖް އެކުއެޑޯގެ އެމްބަސީގެ ތެރޭގައި ހުއްޓާ އިނގިރޭސި ފުލުހުން އެތަނަށް ވަދެ އޭނާ ހައްޔަރުކޮށްގެން ގެންގޮސްފިއެވެ.

ބުރާސްފަތި ދުވަހުގެ ވަގުތެއްގައި އަސާންޖް ހައްޔަރު ކޮށްފައިވަނީ އެމެރިކާގެ އެދުމުގެ މަތިން ސްކޮޓްލެންޑް ޔާޑުން ވަނީ ބުނެފައެވެ. އެކުއެޑޯގެ އެމްބަސީ ތެރެއަށް އިނގިރޭސި ފުލުހުން ވަދެފައިވަނީ އެމްބެސަޑަރުގެ ހުއްދައާއި އެކުގައެވެ.

މިކަމާއި ގުޅިގެން ނެރުނު ބަޔާނެއްގައި އެކުއެޑޯގެ ރައީސް ލެނިން މޮރޭނޯ ވިދާޅުވީ އަސާންޖް އެމްބަސީއިން ބޭރުކޮށް އޭނާއަށް ދީފައިވާ ހިމާޔަތް އަނބުރާ ނަގަން ނިންމެވީ، އޭނާގެ އަމަލުތައް ހުރި ގޮތުން ކަމަށެވެ. އަދި އަސާންޖް ނިސްބަތްވެވަޑައިގަންނަވާ ވިކިލީކްސްއިން އެ ގައުމަށް ދީފައިވާ އިންޒާރުތަކާއި ބައިނަލްއަގްވާމީ މުއާހަދާތަކާއި ހުރި ފުށުއެރުންތައް ވެސް މޮރޭނޯ ވަނީ ފާހަގަ ކޮށްފައެވެ.

މޮރޭނޯ އިތުރަށް ވިދާޅުވީ މިކަންކަމާއި ގުޅިގެން އަސާންޖް އެ ގައުމުގެ އެމްބަސީ ތެރޭގައި ބެހެއްޓުން އެހާ ބުއްދިވެރިކަމެއް ކަމަށް ބެލެވެން ނެތް ކަމަށެވެ. އަސާންޖްގެ އަމަލުތައް ހުރިގޮތުން ބޭރުކުރަން މަޖުބޫރުވީ ކަމަށް ވެސް މޮރޭނޯ ވިދާޅުވިއެވެ. އަސާންޖް ބޭރުކުރުމުގެ ކުރިން ގާނޫނީ ލަފާ ހޯދާފައިވާ ކަމަށް ވެސް މޮރޭނޯ ވިދާޅުވިއެވެ.

އަސާންޖް ހައްޔަރުކުރުމާއި ގުޅިގެން އެކަމާއި ދެކޮޅަށް ގިނަ ބަޔަކު ވަނީ އަޑުއުފުލާފައެވެ. އޭގެ ތެރޭގައި މަޝްހޫރު ވިސްލްބްލޮވަރު އެޑްވަރޑް ސްނޯޑެން ވެސް ހިމެނެއެވެ.

އޮސްޓްރޭލިއާގެ ރައްޔިތެއް ކަމުގައިވާ ޖޫލިއަން އަސާންޖް އެކުއަޑޯގެ އެމްބަސީގެ ތެރޭގައި ހިމާޔަތް ހޯދައިގެން ހުންނަތާ ހަތް އަހަރުވެއްޖެއެވެ. އޭނާގެ މޭސްތިރިކަމުގައި ވިކިލީކްސްއިން ވަނީ ދުނިޔޭގެ ގިނަ ގައުމުތަކެއްގެ ސިއްރު ލިޔެކިޔުންތައް ލީކު ކޮށްލާފައެވެ.