ގާސިމާއި އާދަމް ޝަރީފު އަދި ސައީދަށް ލިބުނު ވޯޓު އަލުން ގުނަނީ
10 އެޕްރީލު 2019 | ބުދަ 09:39ތިން ދާއިރާގެ ވޯޓުތައް ގުނަން ނިންމީ ބުދަ ދުވަހުގެ 3 ޖަހާއިރު
މަޖިލިސް އިންތިޚާބުގައި މީހަކު ވޯޓު ލަނީ
އިލެކްޝަންސް ކަމިޝަން(އީސީ)އަށް ހުށައެޅުނު ޝަކުވާތަކާއި ގުޅިގެން މާމިގިލީ ދާއިރާގެ 1 ވޯޓު ފޮށި، މަޑުއްވަރީ ދާއިރާގެ 4 ވޯޓު ފޮށި އަދި މާވަށު ދާއިރާގެ 69 ސެކިއުރިޓީ އުރަ އަލުން ގުނަން އެ ކަމިޝަނުން ނިންމައިފިއެވެ.
އީސީއިން އެ ތިން ދާއިރާގެ ވޯޓުތައް ގުނަން ނިންމީ ބުދަ ދުވަހުގެ 3 ޖަހާއިރަށެވެ.
އީސީއިން ގުނަން ނިންމި ތިން ދާއިރާ ތަކުގައި ހިމެނެނީ މާމިގިލީ ދާއިރާގެ ގޮނޑި ދިފާއު ކުރެއްވި ރައްޔިތުންގެ މަޖިލީހުގެ ރައީސް ގާސިމް އިބްރާހިމްއާއި ކުރީގެ އިކޮނޮމިކް މިނިސްޓަރު މުހައްމަދު ސައީދު ހޮވިވަޑައިގެންނެވި މާވަށު ދާއިރާގެ 69 ސެކިއުރިޓީ އުރައާއި ކުރީގެ ޑިފެންސް މިނިސްޓަރު އާދަމް ޝަރީފް ކާމިޔާބު ކުރެއްވި މަޑުއްވަރީ ދާއިރާގެ 4 ވޯޓު ފޮއްޓެވެ.
ތިން ދާއިރާތަކުގެ ވަގުތީ ނަތީޖާތައް އިއުލާންކޮށް ނިމިފައިވަނިކޮށް އަލުން އެދާއިރާތަކުގެ ވޯޓު ކަރުދާސް ގުނަން ނިންމީ ހުށައެޅުނު ޝަކުވާތަކާއި ގުޅިގެންނެވެ.
ޕީއެންސީ ކެންޑިޑޭޓް އާދަމް ޝަރީފް ކުރި ހޯއްދެވީ އެ ދާއިރާއަށް ކުރިމަތިލެއްވި އެމްޑީޕީގެ ކެންޑިޑޭޓް އާދަމް ޝިހާމާއި ވާދަކޮށް 17 ވޯޓުގެ ތަފާތަކުންނެވެ.
އާދަމް ޝަރީފްއަށް ލިބިލެއްވީ 868 ވޯޓެވެ. އަދި އާދަމް ޝިހާމަށް ލިބިވަޑައިގަތީ 851 ވޯޓެވެ. މިދާއިރާގައި 65 ވޯޓު ބާތިލު ކަމަށް ވަގުތީ ނަތީޖާއިން ދައްކައެވެ.
މީގެ އިތުރުން، ފަރަގު ކުޑަ ވުމުގެ ސަބަބުންނާއި ބާތިލު ވޯޓު ގިނަވުމުގެ ސަބަބުން މީގެ ކުރިން ވެސް އެދާއިރާގެ ޝަކުވާ ހުށަހަޅައިގެން އަންގާރަ ދުވަހު ގުނިއެވެ. ގުނިއިރު ސައީދަށް ވަނީ އެއް ވޯޓު މަދުވެފަ އެވެ. އެހެންކަމުން އޭނާ އާއި ފަލާހްއާ ދޭތެރޭގައި މިހާރު އުޅެނީ 5 ވޯޓުގެ ފަރަގެކެވެ.
ބާތިލް ވޯޓުތައް އަލުން ގުނިއިރު ގާސިމަށް 19 ވޯޓު ވަނީ އިތުރުވެފަ އެވެ. އޭގެ ކުރިން އެމަނިކުފާނާއި އެ ދާއިރާ އަށް ވާދަ ކުރެއްވި އެމްޑީޕީގެ ކެންޑިޑޭޓާ މެދު ހުރީ 80 ވޯޓުގެ ތަފާތެކެވެ.
މި އިންތިޚާބުގައި 65 ގޮނޑިއާ އެކު މަޖިލީހުގެ ސާފު އަޣުލަބިއްޔަތު ހޯދާފައި ވާއިރު މިއަދު އަލުން މި ގުނާ ތިން ދާއިރާގައި ވެސް ވަގުތީ ނަތީޖާތައް އާންމުކުރި އިރު ހޮވުނު ކެންޑިޑޭޓުން ވާދަކުރައްވަނީ އެމްޑީޕީގެ ތިން ކެންޑިޑޭޓުންނާއެވެ.
