މަޖިލީހުގެ ރައީސް ކަމަށް ކުރިމަތިލާނަން: ޖާބިރު
ރައީސް ކަމަށް ކުރިމަތިލެއްވުމާއި ގުޅޭ ގޮތުން ރައީސް ސޯލިހު އަދި ރައީސް ނަޝީދާއި މަޝްވަރާ ކުރާނަން
ޖާބިރު ރާއްޖެޓީވީގެ ފަށާއިރު ޕްރޮގްރާމްގައި
ރައްޔިތުންގެ މަޖިލިސްގެ ރައީސް ކަމަށް ކުރިމަތިލައްވާނެ ކަމަށް 19 ވަނަ ރައްޔިތުންގެ މަޖިލީހުގެ ކާށިދޫ ދާއިރާއަށް އިންތިޚާބުވެ ވަޑައިގެންނެވި އަބްދުﷲ ޖާބިރު ވިދާޅުވެއްޖެއެވެ.
އިންތިޚާބުވެވަޑައިގެންނެވި ފަހުން ފުރަތަމަ ފަހަރަށް ޓީވީއަކަށް ދެއްވި އިންޓަރވިއުއެއްގައި ރާއްޖެޓީވީ "ފަށާއިރު" ޕްރޮގްރާމްގައި ވާހަކަ ދައްކަވަމުން މަޝްހޫރު ވިޔަފާރިވެރިޔާ ޖާބިރު ވިދާޅުވީ ރައްޔިތުންގެ މަޖިލީހުގެ ރައީސް ކަމަށް ކުރިމަތިލެއްވުމުގެ ޝައުގުވެރިކަން އެބަހުރި ކަމަށާއި، އެކަމަށް ކުރިމަތިލައްވަން ތައްޔާރަށް ހުންނެވި ކަމަށެވެ.
މަޖިލީހުގެ ރައީސް ކަމަށް ހިތަދޫ އުތުރު ދާއިރާއަށް އިންތިޚާބުވެ ވަޑައިގެންނެވި އަދި މިހާރު ވެސް އެ ދާއިރާގެ ގޮނޑި ފުރުއްވަމުން ގެންދަވާ އަސްލަމް އަކީ މަޖިލީހުގެ ރައީސް ކަމަށް އެކަށީގެންވާ ބޭފުޅެއް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެފައި ވާތީ، އެކަމަށް އިޝަރާތް ކުރައްވާ ޖާބިރު ވިދާޅުވީ މަޖިލީހުގެ ރައީސް ކަމަށް ކުރިމަތިލެއްވުމާއި ގުޅޭ ގޮތުން އަސްލަމް އާއި މަޝްވަރާކުރައްވާނެ ކަމަށެވެ.
ޖާބިރު ވިދާޅުވީ އަސްލަމް އާއި މަޝްވަރާ ކުރެއްވުމަށް ފަހު، އަސްލަމް މަޖިލީހުގެ ރައީސް ކަމަށް ޝައުގުވެރިކަން ހުރެއްޖެނަމަ، ދެން އޮންނާނީ ދެ ބޭފުޅުންގެ ދެމެދުގައި ކޮމްޕެޓިޝަނެއް ކަމަށާއި، އެކަމަށް އެއްވެސް ޖެހިލުމެއް ނެތި އަސްލަމް އާއި ވާދަކުރައްވަން ތައްޔާރަށް ހުންނެވި ކަމަށެވެ. ކުރިމަތިލެއްވި ކަމެއް ވެއްޖިއްޔާމު މިހާތަނަށް ކާމިޔާބު ކުރައްވާފައިވާ ކަމަށާއި، އެހެންކަމުން މަޖިލިސްގެ ރައީސްކަމުގެ ރޭހުގައި ވެސް ކާމިޔާބު ހޯއްދަވާނެ ކަމަށް ޖާބިރު ވިދާޅުވިއެވެ.
މަޖިލީހުގެ ރައީސް ކަމަށް ކުރިމަތިލައްވާއިރު ރައީސް އިބްރާހިމް މުހައްމަދު ސޯލިހު އަދި ރައީސް ނަޝީދާއި މަޝްވަރާކުރައްވާނެ ކަމަށާއި، ނަމަވެސް އެއްވެސް ފަރާތަކުން ވިދާޅުވިޔަސް ރައީސް ކަމަށް ކުރިމަތިނުލައްވާ ދޫކޮށް ނުލައްވާނެ ކަމަށް ވިދާޅުވިއެވެ.
”މަޖިލީހުގެ ރައީސް ކަމަށް ކުރިމަތިލެއްވުމާއި ގުޅޭ ގޮތުން އަސްލަމް އާއި ވާހަކަދައްކާނަން. ގާބިލް ވެއްޖެއްޔާ އޮންނާނީ ކޮމްޕެޓިޝަނެއް. ކުރިމަތިލައިފިއްޔާމު އެކަން ކާމިޔާބުކުރާނަން" ޖާބިރު ވިދާޅުވިއެވެ.
ޓުއަރިޒަމް ތަރައްގީ ކުރައްވާނެ ގިނަ ކަންތައްތަކަށް އިޝާރާތްކުރައްވާ ޕްރޮގްރާމްގައި ވާހަކަ ދައްކަވަމުން ޖާބިރު ވިދާޅުވީ ކެސިނޯ އަޅަން ހުއްދަދޭނެ ކަމަށާއި، ގާނޫނުތަކަށް ބަދަލުގެނެސް މިޔަރު އަދި ކަހަނބު ނަގަން ހުއްދަކުރައްވާނެ ކަމަށެވެ. ކަހަނބު އަދި މިޔަރު ނެގުމަކީ ރާއްޖޭގެ ގާނޫނުތަކުން މިހާރު މަނާކޮށްފައިވާ ކަމެކެވެ.
ކާށިދޫ ތަރައްގީ ކުރައްވާނެ ކަމަށާއި، މުސްތަގްބަލްގައި ކާށިދޫ ގާފަރު ވެގެންދާނީ ރާއްޖޭގައި އެންމެ ތަރައްގީވެފައި އޮތް ދާއިރާއަށް ކަމަށް ޖާބިރު ވިދާޅުވިއެވެ.
ޖާބިރު ކާށިދޫ ދާއިރާގެ ގޮނޑި ކާމިޔާކުރައްވާފައިވަނީ 861 ވޯޓުންނެވެ. ޖާބިރާ އާއި އެންމެ ގާތުން ވާދަކުރެއްވި އެމްޑީޕީގެ ކެނޑިޑޭޓް އަބްދުﷲ ރިފްއަތާއި ދެމުދު އޮތީ 41 ވޯޓް ފަރަގެކެވެ. ރިފްއަތަށް ލިބިވަޑައިގެންނެވީ 820 ވޯޓެއެވެ.
17 ވަނަ ރައްޔިތުންގެ މަޖިލީހުގެ ކާށިދޫ ދާއިރާގެ ގޮނޑި ދުވަސްކޮޅަކަށް ޖާބިރު ފުރުއްވިއެވެ.
