''ކަބީރް ސިންގް''ގެ ޓީޒާ ދައްކާލައިފި

ބޮލީވުޑް އެކްޓަރ ޝާހިދު ކަޕޫރު އޭނާގެ އަންނަން އޮތް ފިލްމް "ކަބީރް ސިންގް" ގެ ޓީޒާ ހޯމަ ދުވަހު ދައްކާލައިފިއެވެ.

މި ފިލްމަކީ ތެލެގު ބްލޮކްބާސްޓަރ "އަރުޖުން ރެޑީ" ގެ ރީމޭކް އެކެވެ.

މި ފިލްމްގައި ޝާހިދާ އެކު ފެނިގެންދާނީ ކިއާރާ އަދްވާނީ އެވެ.

މި ޓީޒާގައި ޝާހިދު ފެނިގެންދަނީ ރުޅިގަދަ ޑޮކްޓަރެއްގެ ރޯލުންނެވެ. މި ޓީޒާގައި އޭނާ މަސްތުވާތަކެތި ބޭނުންކުރާ މަންޒަރާއި މީހުންގައިގައި ތަޅާ މަންޒަރު ފެނިގެން ދާއިރު އޭނާއާ ދެކޮޅުވެރިވާ ކޮންމެ މީހާކާއި ހަޑިހުތުރު ބަހުން ވާހަކަ ދައްކާ މަންޒަރު ވެސް ފެނިގެންދެއެވެ.

"ކަބީރު ސިންގް" މި ފިލްމަކީ ކާމިޔާބު ޒުވާން ސަރޖަންއެއް ކަމުގައިވާ އަރްޖުން ރެޑީ ނަމަކަށް ކިޔާ މީހެއްގެ ހަޔާތުގެ މައްޗަށް ބިނާވެފައިވާ ވާހަކައެކެވެ. އޭނާ އަމިއްލަ ހަޔާތް ބަރުބާދުކޮށްލަން ނިކުންނަނީ އޭނާގެ ލޯބިވެރިޔާ އެހެން ފިރިހެނަކާ އިންނަން މަޖިބޫރުކުރާ ހިސާބުންނެވެ.

ޝާހިދާއި ކިއާރާ މި ފިލްމްގެ ޝޫޓިންތައް ނިންމާލާފައި ވަނީ މިދިޔަ މާރޗް މަހުގެ 29 ގައެވެ.

ސަންދީޕް ރެޑީ ވަންގާ ޑައިރެކްޓް ކޮށްފައިވާ މި ފިލްމް ރިލީޒް ކުރުމަށް ހަމަޖެހިފައި ވަނީ މި އަހަރުގެ ޖޫން މަހުގެ 21 ގައެވެ.

މި ފިލްމް ޕްރޮޑިއުސް ކޮށްފައި ވަނީ ބޫޝަން ކުމާރު، މުރާދް ޚެތާނީ، ކްރިޝާން ކުމާރު އަދި އަޝްވިން ވަރްދޭ އެވެ.